लुम्बिनीका एमाले सांसद अमरबहादुर डाँगीले दिए पदबाट राजीनामा- समाचार - कान्तिपुर समाचार
कान्तिपुर वेबसाईट
AdvertisementAdvertisement

लुम्बिनीका एमाले सांसद अमरबहादुर डाँगीले दिए पदबाट राजीनामा

माओवादी केन्द्र प्रवेश गर्ने तयारी
अमृता अनमोल

बुटवल — लुम्बिनी प्रदेशका एमालेतर्फका प्रदेश सभा सदस्य अमरबहादुर डाँगी क्षेत्रीले पदबाट राजीनामा दिएका छन् । उनी दाङको निर्वाचन क्षेत्र नम्बर २ 'ख' बाट निर्वाचित भएका थिए । 

डाँगीले बुधबार प्रदेश सभा सचिवालयमा राजीनामा पत्र दर्ता गराएको प्रदेशसभाका सचिव दुर्लभकुमार पुन मगरले बताए । उनले हालको राजनीतिक अवस्था देखेर राजीनामा दिएको पत्रमा उल्लेख गरेका छन् । संविधानको धारा १ सय ८० को 'क' बमोजिम सभामुखले उक्त पत्रलाई प्रक्रियामा लगेको सचिव पुन मगरले बताए ।

डाँगीलाई आफ्नो पार्टीमा स्वागत गरिने माओवादी केन्द्रका प्रमुख सचेतक तुलाराम घर्तीमगरले बताए । यसअघि एमालेका प्रदेश सभा सदस्य कपिलवस्तुका दृगनारायण पाण्डेले राजीनामा दिएका थिए । उनी कांग्रेसमा प्रवेश गरेका छन् । नेकपाबाट उपचुनाव लडेकी सांसद विमला कुमारी खत्री माओवादी केन्द्रमा प्रवेश गरेकी छन् । योसँगै लुम्बिनीमा एमालेमा प्रदेश सभा सदस्य घटेर ३८ जना भएका छन् ।

८७ सदस्यीय प्रदेशसभा ७९ मा झरेको छ । जसमा २ जनाको स्वेच्छिक राजीनामा भएको छ भने माओवादी केन्द्रका २ र जसपाका ४ सदस्य निष्कासनमा परेका छन् ।

प्रकाशित : वैशाख २२, २०७८ १५:१८
प्रतिक्रिया
पठाउनुहोस्

गण्डकीका मुख्यमन्त्री गुरुङलाई कोरोना संक्रमण

प्रतीक्षा काफ्ले

कास्की — गण्डकी प्रदेशका मुख्यमन्त्री पृथ्वीसुब्बा गुरुङलाई कोरोना संक्रमण पुष्टि भएको छ । बुधबार गरिएको स्वाब परीक्षणमा उनलाई कोरोना पोजिटिभ देखिएको मुख्यमन्त्रीका प्रेस संयोजक विक्रम न्यौपानेले जानकारी दिए ।

न्यौपानेका अनुसार मुख्यमन्त्री गुरुङको मंगलबार स्वाब संकलन गरिएको थियो । मंगलबार मुख्यमन्त्री गुरुङ सभामुख नेत्रनाथ अधिकारीले बोलाएको सर्वदलीय बैठकमा समेत सहभागी थिए ।

बैठकमा कांग्रेस संसदीय दलका नेता कृष्णचन्द्र नेपाली,माओवादी केन्द्रका संसदीय दलका नेता हरिबहादुर चुमानलगायतको उपस्थिती थियो ।

प्रकाशित : वैशाख २२, २०७८ १५:०१
पूरा पढ्नुहोस्
प्रतिक्रिया
पठाउनुहोस्
×