अक्सिजन नपाएपछि छटपटिएरै मृत्यु- समाचार - कान्तिपुर समाचार

अक्सिजन नपाएपछि छटपटिएरै मृत्यु

प्रादेशिक अस्पतालले आईसीयू खाली छैन भनेर फर्कायो, जानकी हेल्थ केयर र रामजानकी अस्पतालले महँगो शुल्क भनेर पन्छिए
अजित तिवारी

जनकपुर — धनुषा, बटेश्वर गाउँपालिका–४ का ४५ वर्षीय लोकबहादुर परियारलाई चार दिनअघि ज्वरोले च्याप्यो । सामान्य ठानेर सिटामोल खाए । लगत्तै, रुघाखोकी थपियो । दुखाइले जीउ कटकटी बनायो । सोमबार बेलुका श्वास फेर्न सारो पर्न थालेपछि आफैं चोकको आरपी मेडिकल पसलमा गए ।

आफ्नो स्वास्थ्य अवस्था बताए र निको हुने औषधि मागे । उनमा कोरोना भाइरसको लक्षण हुनुका साथै स्वास्थ्य अवस्था गम्भीर देखेपछि उपचारका लागि जनकपुर जान पसलका सञ्चालक सुबोध साहले सल्लाह दिए । ‘मैले नै एम्बुलेन्स मगाइदिएर जनकपुर पठाइदिएँ,’ साहले कान्तिपुरलाई भने ।

पीपीई लगाएका एम्बुलेन्सका चालक रामबाबु महतो परियारलाई बोकेर राति करिब ७ बजे जनकपुरतिर हिँडे । बाटोमै परियार असहज महसुस गर्दै थिए । उनले चालकलाई ‘श्वासै फेर्न गाह्रो भयो, अक्सिजन लगाइदेउ’ भनेर अनुरोध गरे । चालक महतोले एम्बुलेन्समा रहेको अक्सिजनको सिलिन्डर जोडिदिए ।

करिब ८ बजेतिर परियारलाई लिएर एम्बुलेन्स चालक महतो जनकपुरस्थित प्रादेशिक अस्पताल आइपुगेका थिए । प्रादेशिक अस्पतालमा पुग्दा परियारको अक्सिजन लेबल ४८ थियो । परियारलाई तुरुन्तै सघन उपचारको खाँचो थियो । अस्पतालका चिकित्सकले सामान्य हेरेपछि आईसीयू खाली नरहेको उल्लेख गर्दै अन्तै लैजानू भनेर फर्काइदिए ।

परियारलाई चालक महतोले फेरि एम्बुलेन्समा बोके । अक्सिजन लगाइदिए । जनकपुरको जानकी हेल्थ केयर अस्पताल पुर्‍याए । त्यहाँ आईसीयू खाली थियो । परियारले बल्ल राहत महसुस गरे । तर भर्ना गर्नुअघि अस्पतालले आईसीयूको महँगो दर सुनाइदियो । एक दिनको १३ हजार । निम्न आर्थिक अवस्थाका परियार तर्सिए । उनले अर्को अस्पताल लैजान एम्बुलेन्स चालकलाई आग्रह गरे । परियार त्यसपछि रामजानकी हस्पिटल पुगे । त्यो हस्पिटल पनि आईसीयू खाली हुँदाहुँदै महँगो पर्छ भनेर उपचार गर्नबाट पन्छियो ।

परियारले हरेश खाए । जे पर्ला–पर्ला भनेर उनले घर फर्किने निधो गरे । राति करिब १० बजेतिर एम्बुलेन्स चालक महतोले परियारलाई बटेश्वर चोकमा छाडे । रात छटपटिएरै बित्यो । मंगलबार बिहान झन् असह्य भयो । उनी बिहान करिब ७ बजे एक जना सहयोगीसँगै फेरि आरपी मेडिकल पसलमा पुगे ।

सञ्चालक साह छक्क परे । उनलाई परियारले अनुनय गरे, ‘जनकपुरमा भर्ना गर्न मानेनन् । औषधि दिनुस् । मलाई निको पार्नुस् । श्वास फेर्न समस्या भइरहेको छ ।’ यति भन्दै परियार मेडिकल पसलकै बरन्डामा थचक्क बसे । र, निमेषभरमा त्यहीं ढले । ‘उपचारै नपाएरै उनको मृत्यु भयो,’ साहले भने ।

प्रादेशिक अस्पतालका मेडिकल सुपरिन्टेन्डेन्ट डा. प्रमोद यादवले १२ वटा आईसीयू बेड रहेको र सोमबार रातिसम्म १० जनालाई मात्र भर्ना गरिएको जानकारी दिए ।

‘बिरामी आए र बेड खाली छ भने भर्ना लिनैपर्छ,’ उनले भने, ‘तर परियारको केसमा के भएको हो, उनी आएका बेला आईसीयू खाली थियो कि थिएन्, यी सबै कुरा बुझ्दै छु ।’ परियार बटेश्वरको ससुराली घरमा बस्थे । प्रहरी चौकी बटेश्वरका अनुसार उनी बजारमा होटल चलाउँथे । उनका श्रीमतीसहित परिवारका अरू सदस्य भारतमा बस्छन् ।

प्रकाशित : वैशाख २२, २०७८ ०७:१५
प्रतिक्रिया
पठाउनुहोस्

म्यानचेस्टर सिटी पहिलोपल्ट च्याम्पियन्स लिग फाइनलमा

एजेन्सी

म्यानचेस्टर — रियाद मेहरेजले गरेको दुई गोलमा म्यानचेस्टर सिटीले मंगलबार पेरिस सेन्ट जर्मेन (पीएसजी) लाई इतिहाडमा २–० ले हराउँदै पहिलो पल्ट युरोपेली च्याम्पियन्स लिगको फाइनल यात्रा तय गरेको छ ।

यो जितपछि दुई लेगको सेमिफाइनलमा सिटी समग्रमा ४–१ ले अगाडि रह्यो । खेलमा सिटी हाबी भएपछि फ्रान्सेली प्रतिद्वन्द्वी पीएसजी सेमिफाइनलमै रोकियो ।

खेलको ६९ औं मिनेटमा एन्जेल डि मारियालाई रातो कार्ड देखाइएपछि पीएसजी १० खेलाडीमा सीमित रह्यो । अब पेप ग्वार्डिओलाको सिटीले मे २९ मा इस्टानबुलमा हुने फाइनलमा चेल्सी अथवा रियल म्याड्रिडको सामना गर्नेछ ।

बार्सिलोनाका लागि दुई पल्ट च्याम्पियन्स लिग जितेका ग्वार्डिओलाले फेरि एकपल्ट फाइनलमा प्रवेशका लागि भने १० वर्ष कुर्नु पर्‍यो । लिग चरणका सबै ६ खेल जितेको सिटी फाइनल प्रवेशका लागि पूर्ण हकदार पनि देखिएको थियो ।

मेहरेजले ११ औं मिनेटमा पहिलो गोल गरेपछि ६३ औं मिनेटमा दोस्रो गोल थपे । पीएसजीमा चोटग्रस्ट खेलाडी केलयिन एम्बापेको अनुपस्थिति महँगो सावित भयो ।

तस्बिरहरू : रोयटर्स

प्रकाशित : वैशाख २२, २०७८ ०७:१०
पूरा पढ्नुहोस्
प्रतिक्रिया
पठाउनुहोस्
×