भरतपुर अस्पतालमा कोरोना संक्रमित थप चार जनाको मृत्यु - समाचार - कान्तिपुर समाचार

भरतपुर अस्पतालमा कोरोना संक्रमित थप चार जनाको मृत्यु 

रमेशकुमार पौडेल

चितवन — कोरोना भाइरसको संक्रमण पुष्टि भएर भरतपुर अस्पतालमा उपचार गराइरहेकामध्ये मंगलबार चार जनाको निधन भएको छ । चितवन स्वास्थ्य कार्यालयले जारी गरेको विवरणअनुसार निधन हुनेमा तीनजना चितवनकै हुन् भने एकजना धनुषाका हुन् । चितवनमा सोमबार पनि चौबीस घण्टाभित्र कोरोना संक्रमण पुष्टि भएका चारजना बिरामीको निधन भएको थियो । 

योसहित चितवनमा हालसम्म कोरोना संक्रमण पुष्टि भएका १२१ जनाको निधन भएको स्वास्थ्य कार्यालयले जानकारी दिएको छ । स्वास्थ्य कार्यालयले चितवन जिल्ला ठेगना भएर चितवनमै निधन भएकाहरुलाई मात्रै यो तथ्याङ्कमा समेट्ने गरेको छ । भरतपुरका अस्पतालहरुमा उपचार गराउन आउँदा निधन भएका जिल्ला बाहिरका संक्रमितहरुको संख्या यसमा समावेश हुने गरेको छैन ।

स्वास्थ्य कार्यालयका अनुसार मंगलबारसम्म चितवनमा निको हुन बाँकी सक्रिय संक्रमितहरुको संख्या एक हजार ४०४ रहेको छ । अस्पताल भर्ना भएका संक्रमितहरु जम्मा ८९ जना छन् । मंगलबार चितवनका तीनवटा ठुला अस्पतालहरुमा उपचारका लागि भर्ना भएका कुल संक्रमितहरु २१६ जना रहेको स्वास्थय कार्यालयले जानकारी गराएको छ । चितवनका अस्पतालमा जिल्लाका भन्दा पनि चितवन बाहिरका संक्रमितहरु धेरै छन् ।

चितवनमा हालसम्म संक्रमित हुनेहरुको संख्या आठ हजार ४४५ पुगेको स्वास्थ्य कार्यालयको विवरणमा उल्लेख छ ।

प्रकाशित : वैशाख २१, २०७८ १६:४४
प्रतिक्रिया
पठाउनुहोस्

पाख्रिबासको राम्चेस्थित जंगलमा श्रीमान् श्रीमती मृत अवस्थामा फेला

रमेशचन्द्र अधिकारी

धनकुटा — धनकुटाको पाख्रिबास नगरपालिका-७ राम्चेस्थित जंगलमा मंगलबार एक जोडी मृत अवस्थामा फेला परेका छन् ।

मृत्यु हुनेमा पाख्रीबास-६ तिल्केका करिब २२ वर्षीय सुनिल थापा र २० वर्षीया श्रीमती सिर्जना गुरागाईं रहेको प्रहरीले जनाएको छ । युवक झुन्डिएको र युवती भुईमा मृत भेटिएको जिल्ला प्रहरी कार्यालयका सूचना अधिकारी सन्तुलाल जैशवालले जानकारी दिए ।

मृतक दुवै श्रीमान् श्रीमती पुष्टि भएको उनले बताए । प्रारम्भिक अनुसन्धानका आधारमा युवकले युवतीको हत्या गरी आफूले आत्माहत्या गरेको हुनसक्ने प्रहरीको अनुमान छ ।

घटनाबारे बिहान ११ बजे स्थानीयवासीले प्रहरीलाई खबर गरेका थिए । श्रीमतीको शव झाडीमा झ्यासले छोपिएको अवस्थामा फेला परेको घटनास्थलमा रहेका प्रहरी प्रमुख एसपी गोविन्द अधिकारीले बताए । ‘प्रारम्भिक अनुसन्धानका आधारमा पहिले श्रीमतीको हत्या गरी श्रीमानले आत्माहत्या गरेको हुनसक्ने देखिन्छ ।’ उनले भने, ‘घटनाबारे थप अनुसन्धान गरिनेछ ।’ काठमाडौं बस्दै आएका थापा केहि दिनअघि घर आएको आफन्तले बताए । माइतमा रहेकी श्रीमतीलाई साथमा लिएर चार दिन पहिले हिँडेका दुवै मंगलबार मृत फेला परेका हुन् ।

मृतकको साथबाट राहदानी, नागरिकता लगायतका सामग्री फेला परेको छ । कलिलै उमेरमा विवाह गरेका दम्पतीको ५ वर्षीय छोरा छन् । गत साता पनि पाख्रीबासमा एक महिलाको वेवारिसे शव फेला परेको प्रहरीले जनाएको छ । शवको हालसम्म सनाखत हुन सकेको छैन ।

प्रकाशित : वैशाख २१, २०७८ १६:४४
पूरा पढ्नुहोस्
प्रतिक्रिया
पठाउनुहोस्
×