सूर्य चिह्नबाट चुनाव लडेकालाई दल परिवर्तनको अधिकार छैन : मुख्यमन्त्री पोखरेल- समाचार - कान्तिपुर समाचार
कान्तिपुर वेबसाईट
AdvertisementAdvertisement

सूर्य चिह्नबाट चुनाव लडेकालाई दल परिवर्तनको अधिकार छैन : मुख्यमन्त्री पोखरेल

रासस

बुटवल — लुम्बिनी प्रदेशका मुख्यमन्त्री शंकर पोखरेलले संविधानले एउटा चुनाव चिह्न लिएर चुनाव जित्नेहरुलाई अर्को दल परिवर्तनको अधिकार नदिएको बताएका छन् । 

सोमबार बिहान उनले फेसबुक स्टाटस लेख्दै चुनाव चिह्न सूर्य लिएकाहरु आफ्ना पक्षमा भनेर देखाउने र त्यसका पक्षमा राष्ट्रिय पार्टीका नेताले वक्तव्य जारी गर्नु लज्जास्पद भएको बताएका छन् ।

मुख्यमन्त्री पोखरेलले सूर्य चुनाव चिह्न लिएर चुनाव लडेकाहरुको समर्थन कानुनी रुपमा समेत अन्य दललाई नहुने उल्लेख गर्दै संविधान निर्माणमा नेतृत्व गर्ने शेरबहादुर देउवा, पुष्पकमल दाहाल र उपेन्द्र यादवलाई सो कुरा जानकारी नहुनु आश्र्चयको कुरा भएको बताएका छन् । ‘अविश्वास प्रस्ताव दर्तापछि जनता समाजवादीका चार सदस्यलाई अल्पमतमा रहेका दलका सदस्यको सिफारिसका आधारमा कार्वाहीको षड्यन्त्रपूर्ण नाटक मञ्चन भएको छ,’ उनले भनेका छन् ।

मुख्यमन्त्री पोखरेलले कारबाहीपछि नेकपा (एमाले) बहुमतप्राप्त दल बनेको जिकिर गर्दै बहुमत प्राप्त दललाई सरकार सञ्चालनको संवैधानिक दायित्व रहने बताएका छन् । उनले संवैधानिक रुपमा उत्पन्न विवादको निरुपण भएर बहुमत गुमेका अवस्थामा सरकारमा रहिरहने कुरा सम्भव नभएको तर अहिलेको अवस्था त्यो नभएको पनि बताएका छन् ।

मुख्यमन्त्री पोखरेलले गत फागुन २३ को सर्वोच्च अदालतको फैसलापछि विमलाकुमारी खत्री एमालेको प्रदेशसभा सदस्यका रुपमा सहभागी हुँदै आएको जानकारी दिँदै उक्त विवरण त्यतिबेला नै प्रदेशसभामा दर्ता भइसकेको बताएका छन । मुख्यमन्त्रीको नियुक्तिपछि शपथ रोक्न प्रदेश प्रमुखको कार्यालयमा भएको धर्ना अनुचित भएको आरोप पनि उनले लगाएका छन् ।

आइतबार साँझ विपक्षी सांसदहरूमाथि बल प्रयोग गरेर लुम्बिनी प्रदेशमा मुख्यमन्त्रीसहित मन्त्रीहरूको शपथ गराइएको छ । बहुमत प्रदेशसभा सदस्यको हस्ताक्षर र उपस्थितिमा मुख्यमन्त्री शंकर पोखरेलको नियुक्ति बदर गर्न र शपथ रोक्न प्रदेश प्रमुखको कार्यालयमा धर्ना बसिरहेका विपक्षी दलका सांसदमाथि बल प्रयोग गरिएको हो ।

सम्बन्धित समाचार

बल प्रयोग गरेर मुख्यमन्त्रीको शपथ

लुम्बिनी घटनामा संवैधानिक नैतिकताको प्रश्न

मैले आफ्नै खुसीले माओवादी रोजेकी हुँ : वली

प्रकाशित : वैशाख २०, २०७८ १०:३९
प्रतिक्रिया
पठाउनुहोस्

उपभोक्ताले ‘होल्ड’ गर्दा अक्सिजन सिलिन्डर अभाव

व्यक्ति, अस्पताल, मोटर वर्कसप, खानेपानी र जलविद्युत् आयोजनालगायतले करिब १५ हजार सिलिन्डर फिर्ता गरेनन्
नगेन्द्र अधिकारी

काभ्रे — अक्सिजन सिलिन्डर उपभोक्ताले ‘होल्ड’ गरिदिँदा कोरोना संक्रमितको उपचारमा समस्या देखिएको छ । अक्सिजन सिलिन्डर व्यक्ति, अस्पताल, खानेपानी, जलविद्युत् आयोजनामा थुप्रिएपछि ग्यास भर्न समस्या भएको हो ।

काभ्रेको पनौतीस्थित नवज्योति ग्यास उद्योगमा अक्सिजन भर्न ल्याइएका खाली सिलिन्डर । तस्बिर : नगेन्द्र/कान्तिपुर

‘करिब १५ हजार सिलिन्डर विभिन्न उपभोक्ताले होल्ड गरेका छन्,’ पनौती–५ मा रहेको नवज्योति ग्यास उद्योग प्रालिका प्रबन्धक पद्मेशकुमार सुल्तानियाले भने, ‘भएका हजार–बाह्र सय सिलिन्डर भरेर दिने गरेका छौं ।’

उनका अनुसार व्यक्तिगत रूपमै अक्सिजन प्रयोग गर्ने, मेलम्ची खानेपानी आयोजना, विभिन्न जलविद्युत् आयोजनामा कम्पनीका सिलिन्डर थुप्रिएका छन् । ‘भएका सिलिन्डर मात्रै फिर्ता हुने हो भने पनि अहिलेको तुलना धेरै अक्सिजन सप्लाइ गर्न सक्छौं,’ सुल्तानियाले भने, ‘खानेपानी मन्त्रालय, मेलम्ची आयोजना, विभिन्न जलविद्युत् कम्पनीलाई पटक–पटक पत्रचार गरेपनि सिलिन्डर फिर्ता गरेका छैनन् ।’ हाल दैनिक ७ सय सिलिन्डर ग्यास कम्पनीबाट भित्रिने–बाहिरिने गरेको उनले बताए । विगतको तुलनामा माग पनि बढेकाले सिलिन्डरको अभावमा आपूर्तिमा समस्या भएको उनको भनाइ छ । नवज्योति जिल्लाको एक मात्र अक्सिजन उत्पादक कम्पनी हो ।

कम्पनीका व्यवस्थापक प्रकाश थापाका अनुसार खानेपानी आयोजना, जलविद्युत्त्, मोटर वर्कसप आदिमा फलाम काट्न अक्सिजन ग्यासको बढी प्रयोग हुन्छ । ‘संक्रमण बढ्न थालेपछि भने ती स्थानमा अक्सिजन पठाउन छोडेका छौं,’ उनले भने । नियमित विद्युत् आपूर्ति हुने हो भने विभिन्न क्षमताका दैनिक एक हजार सिलिन्डर अक्सिजन ग्यास उत्पादन गर्न सकिने उनले जानकारी दिए । प्रमुख जिल्ला अधिकारी शिवराम पोखरेल नेतृत्वको टोलीले उद्योगमा अनुगमन गरेर मेडिकल रिपोर्टबिना र अन्य उद्योगको लागि अक्सिजन उपलब्ध नगराउन निर्देशन दिइसकेको छ ।

यसबाहेक जिल्ला दुई अस्पतालमा अक्सिजन प्लान्ट छन् । धुलिखेल अस्पतालका प्रशासकीय निर्देशक डा. रमेश मकाजूका अनुसार दुई वटा प्लान्टबाट २४ घण्टामा विभिन्न क्षमताका ८० सिलिन्डर ग्यास उत्पादन हुन सक्छ ।

बनेपास्थित शिर मेमोरियल अस्पतालका निमित्त प्रमुख कार्यकारी अधिकृत सुन्दर थापामगरले अस्पतालको अक्सिजन प्लान्टले एक दिनमा २४ वटा ठूला सिलिन्डर भर्न सक्ने दाबी गरे । तर अस्पतालको लागि त्यति परिमाण पर्याप्त नहुने भन्दै उनले अन्य उद्योगको भर पर्नुपर्ने बाध्यता रहेको सुनाए । कोरोना संक्रमणको दोस्रो लहरमा धेरैलाई श्वासप्रश्वासमा समस्या देखिन थालेपछि अक्सिजन पनि अभाव हुन थालेको हो ।


प्रकाशित : वैशाख २०, २०७८ १०:३०
पूरा पढ्नुहोस्
प्रतिक्रिया
पठाउनुहोस्
×