लुम्बिनीमा मुख्यमन्त्रीको शपथ रोक्न माग गर्दै ४२ सांसद प्रदेश प्रमुखको कार्यालयमा- समाचार - कान्तिपुर समाचार

लुम्बिनीमा मुख्यमन्त्रीको शपथ रोक्न माग गर्दै ४२ सांसद प्रदेश प्रमुखको कार्यालयमा

दीपेन्द्र बडुवाल

रुपन्देही — लुम्बिनी प्रदेश सभाका चार विपक्षी दलले आइतबार दिउँसो एक बजे शंकर पोखरेलसँग बहुमत नभएकोले एकल सरकार बन्न नसक्ने जानकारी गराएपनि प्रदेश प्रमुखले एकतर्फी पोखरेललाई पुनः मुख्यमन्त्री नियुक्त दिएको दाबी गरेका छन् । उनीहरुले प्रदेश प्रमुखको कार्यालयमा ४२ जनाको हस्ताक्षर भएको पत्र दर्ता गराएर एक/डेढ घण्टामा सबै सांसदलाई उपस्थित गराउने जानकारी गराएको केहीबेरमै प्रदेश प्रमुखले पोखरेललाई मुख्यमन्त्री नियुक्त गरेको बताएका छन् ।

एक दलको सरकार बन्‍ने स्थिति नभएकोले संविधानको धारा १६८ को २ बमोजिम दुई वा दुईभन्दा बढी दलको सरकार बनाउन आफूहरुसँग मत पुग्ने र केहीबेरमा हस्ताक्षरसहित आउने जानकारी गराए पनि प्रदेश प्रमुखले आफूहरुलाई बेवास्ता गरेको नेपाली कांग्रेस संसदीय दलका प्रमुख सचेतक फकरुद्धिन खानले असन्तुष्टि पोखे ।

उनले प्रदेश प्रमुखले ‘एमालेको कार्यकर्ता’ झै व्यवहार गरेको आरोप लगाए । ‘४२ जना सांसदको हस्ताक्षर देखाएर माननीय शंकर पोखरेलले गरेको संविधानको धारा १६८ (१) बमोजिम एकल बहुमतको सरकारको दाबी अवैध हो भनेर जानकारी गरायौं,’खानलले भने, ‘पोखरेलले पुरानो हस्ताक्षर पेस गरेको पनि जानकारी गरायौं ।’ उनका अनुसार दाङबाट प्रतिनिधित्व गर्ने प्रदेश सांसद बिमला वली शनिबार माओवादी संसदीय दलको बैठकमा सहभागी भइसकेको र कपिलवस्तुको निर्वाचन क्षेत्र नम्बर १ (क)बाट निर्वाचित एमाले सांसद दुनारायण पाण्डेले राजीनामा गरिसकेका जानकारी पनि गराइएको थियो । तर, आफूहरुको दाबीलाई बेवास्ता गरेर पोखरेललाई मुख्यमन्त्री नियुक्त गरिएपछि शपथ रोक्न विपक्षी दलबाट प्रतिनिधित्व गर्ने सबै सांसद अहिले प्रदेश प्रमुखको कार्यालयमै रहेको खानले जानकारी दिए ।

‘हामी ४२ जना सांसद नै प्रदेश प्रमुखको कार्यालयमा छौं,’ खानले भने, ‘शपथ रोक्न निवेदन दिएका छौं । जबरजस्ती अगाडि बढाए प्रतिरोध गछौं ।’






प्रकाशित : वैशाख १९, २०७८ १६:३९
प्रतिक्रिया
पठाउनुहोस्

संसद् विघटन सामान्य घटना होइन : सीके राउत

दीपेन्द्र बडुवाल

भैरहवा — जनमत राष्ट्रिय पार्टीका राष्ट्रिय अध्यक्ष सीके राउतले प्रतिनिधिसभा विघटनलाई सामान्य घटनाका रूपमा लिन नसकिने बताएका छन् । यसलाई असामान्य र सोच्नै पर्ने बाध्यात्मक अवस्थाका रूपमा आफूहरूले लिएको उनको भनाइ छ ।

रूपन्देहीको भैरहवामा आइतबार बिहान लुम्बिनी प्रेस क्लबले आयोजना गरेको पत्रकार सम्मेलनमा राउतले जनताले दुई तिहाइ मत दिएको अवस्थामा काम गर्न बाधा पुगेको भन्नुपर्ने आधार नभएको बताए । ‘सरकारी पक्ष र विपक्षी सडकमा छन्,’ उनले भने, ‘यस्तो अवस्थामा राजनीतिबाट हामीले के अपेक्षा गर्ने ? यो आजको प्रश्न हो । करिब दुई तिहाइ पाएको बेला सरकार चल्दैन भने अब हामीले के गर्ने ?’

नेपालमा व्यवस्था धेरै फेरिएको तर अवस्था नफेरिनुमा सही व्यक्ति चयन गर्न नसक्नु कारण रहेको उनले बताए । ‘निर्वाचन भयो भने मुलुकको विकास गर्ने पात्रलाई चयन गर्नेतिर उन्मुख हुनुपर्छ,’ उनले भने, ‘अहिले सडकमा उत्रेका व्यक्ति पार्टीभन्दा मुलुक कसरी अगाडि बढाउनेतिर केन्द्रित हुनुपर्छ ।’

अहिले बुद्धिजीवी, पत्रकारलगायतले नागरिक आन्दोलन सुरु गरेको भन्दै उनले यस्तो आन्दोलन दलविशेषको हुन नहुनेमा जोड दिए । ‘नागरिक आन्दोलन पक्ष/विपक्ष भनेर हुँदैन, नागरिक सामाजले पुस्तौंदेखि भएका अन्यायलाई उठाउन सक्नुपर्छ,’ उनले भने, ‘होइन भने नागरिक आन्दोलनको औचित्य रहँदैन ।’

पर्दापछाडिका शक्तिबाट नेपालको राजनीति नियन्त्रित रहेको भन्दै राउतले जनप्रतिनिधिले जनताको अपेक्षा पूरा नगरे फिर्ता बोलाउन पाउनुपर्ने र त्यो अधिकार सुनिश्चित गरिनुपर्नेमा जोड दिए । वडादेखि राष्ट्रपतिसम्म प्रत्यक्ष चयन गर्न पाउनुपर्ने उनले बताए । ‘अहिले सञ्चालन गरिने विकास–निर्माणका कामबारे जनतालाई सोधिँदैन,’ उनले भने, ‘जहाँबाट कमिसन धेरै आउँछ, उसैलाई निर्माणको जिम्मा दिने गरिएको छ ।’

प्रकाशित : फाल्गुन ९, २०७७ ११:४८
पूरा पढ्नुहोस्
प्रतिक्रिया
पठाउनुहोस्
×