सरकारसँग जारी वार्ताबारे ठाकुरले सांसदलाई दिए जानकारी, भट्टराई र यादव पक्ष अनुपस्थित- समाचार - कान्तिपुर समाचार
कान्तिपुर वेबसाईट
AdvertisementAdvertisement

सरकारसँग जारी वार्ताबारे ठाकुरले सांसदलाई दिए जानकारी, भट्टराई र यादव पक्ष अनुपस्थित

कान्तिपुर संवाददाता

काठमाडौँ — जनता समाजवादी पार्टीका अध्यक्ष महन्थ ठाकुरले सरकारसँग जारी वार्ताबारे पार्टीका सांसदहरूलाई जानकारी गराएका छन् ।

जसपा अध्यक्ष महन्थ ठाकुर । तस्बिर : बिजु महर्जन/कान्तिपुर

सिंहदरबारस्थित संसदीय दलको कार्यालयमा ठाकुरले सांसदहरूलाई बोलाएर सरकारसँग भइरहेको वार्ताबारे जानकारी गराएको सांसद लक्ष्मणलाल कर्णले जानकारी दिए । 'सरकारसँग भइरहेको वार्ताबारे अध्यक्षज्यूले जानकारी गराउनुभयो । संविधान संशोधन आयोग, नागरिकता विधेयक, मुद्दा फिर्ता र बन्दी रिहाइलगायतका विषयमा उहाँले कुरा राख्नुभयो,' कर्णले भने ।

कर्ण र सर्वेन्द्रनाथ शुक्लाले जसपाकातर्फबाट सरकारसँग वार्ता गरिरहेका छन् । सरकारका तर्फबाट एमाले संसदीय दलका उपनेता सुवासचन्द्र नेम्वाङ, अर्थमन्त्री विष्णु पौडेल र प्रधानमन्त्रीका विदेश मामिला सल्लाहकार राजन भट्टराई रहेका छन् । वार्तामा भने प्रधानमन्त्री केपी शर्मा ओली र जसपा अध्यक्ष ठाकुरसँगै राजेन्द्र महतो पनि सहभागी हुँदै आएका छन् ।

ठाकुरले बोलाएको बैठकमा संघीय परिषद् अध्यक्ष बाबुराम भट्टराई र अध्यक्ष उपेन्द्र यादव भने सहभागी भएनन् । उनी निकट सांसदहरू पनि ठाकुरले बेलाएको बैठकमा गएका थिएनन् । बैठकमा सहभागी नेताहरूले जनाएअनुसार ११ जना सांसद मात्रै उपस्थित भएका थिए ।

अध्यक्ष यादवनिकट सांसद मोहम्मद इस्तियाक राईले भने आफूहरूलाई अध्यक्ष ठाकुरले बोलाएको बैठकबारे जानकारी नभएको बताए । बैठकमा अरु सांसद काठमाडौं बाहिर भएकोले उपस्थित नभएको भनेका थिए । तर, भट्टराई र यादव लगायत अधिकांश नेता काठमाडौंमै रहेको बताइएको छ ।

प्रकाशित : वैशाख ९, २०७८ १५:५९
प्रतिक्रिया
पठाउनुहोस्

वीरगन्जमा कोरोनाबाट थप दुई जनाको मृत्यु

शंकर आचार्य

पर्सा — कोरोना संक्रमणका कारण वीरगन्जमा थप दुई जनाको मृत्यु भएको छ ।

नारायणी अस्पतालमा उपचाररत वीरगन्ज महानगरपालिका–१९ बिन्दवासिनी निवासी ६३ वर्षीय पुरुषको बिहीबार उपचारका क्रममा बिहान ९ बजेर ५० मिनेटमा मृत्यु भएको हो ।

उनी वैशाख ५ गते अस्पतलामा भर्ना भएका थिए । अस्पतालका कोभिड संयोजक डा सरोज रोशन दासका अनुसार मृतकमा निमोनिया र श्वासप्रश्वासको समस्या थियो ।

यस्तै बिहीबार बिहान १ बजेर १५ मिनेटमा नारायणी अस्पतालमै उपचाररत वीरगन्ज १६ की ६१ वर्षीया महिलाको पनि कोरोना संक्रमणकै कारण मृत्यु भएको छ । उनी वैशाख ५ गते अस्पताल भर्ना भएकी थिइन् ।

यससँगै वीरगन्जमा दुई सातायता कोरोना संक्रमणका कारण मृत्यु हुनेको संख्या ९ पुगेको छ । नारायणी अस्पतालमा ८ र नारायणी वयोधा अस्पतालमा २ गरी कूल ९ जनाको मृत्यु भएको हो ।

नेपालमा संक्रमित थपिएसँग वीरगन्जस्थित नेपाल भारत सीमामा बिहीबारदेखि केही कडाइ गरिएको छ । सीमास्थित सशस्त्र प्रहरीले दुवै मुलुकबाट यात्रुवाहक सवारी साधनको आवागमनमा रोक लगाएको छ । अत्यावश्यक बाहेकका सवारी साधनको आवागमन बन्द गरिएको छ ।

यात्रुहरु वीरगन्ज भन्सारदेखि सीमा पारीसम्म पैदल आवागमन गरिरहेका छन् । सीमामा दुई मुलुकतर्फ आवागमन गर्नेहरुको लर्को लागेको छ । मुख्य बाटोबाट कडाइ गरिएकाले केही बटुवा खेतको बाटोबाट समेत सीमा वारपार गरिरहेका छन् ।

प्रकाशित : वैशाख ९, २०७८ १५:५३
पूरा पढ्नुहोस्
प्रतिक्रिया
पठाउनुहोस्
×