माओवादी केन्द्र कमजोर भएको छैन : दाहाल- समाचार - कान्तिपुर समाचार
कान्तिपुर वेबसाईट
AdvertisementAdvertisement

माओवादी केन्द्र कमजोर भएको छैन : दाहाल

'विदेशी शक्तिको आडमा यहाँ कानुन, संविधान मिच्ने, मूल्य मान्यता मिच्ने काम भएको छ'
कान्तिपुर संवाददाता

काठमाडौँ — नेकपा माओवादी केन्द्रका अध्यक्ष पुष्पकमल दाहालले माओवादी आन्दोलन कमजोर नभएको दाबी गरेका छन् । नेपाल कम्युनिस्ट पार्टीको स्थापना दिवस तथा लेनिन जन्म जयन्तीको अवसरमा बिहीबार पेरिसडाँडामा आयोजित कार्यक्रमलाई सम्बोधन गर्दै दाहालले आफूहरु कमजोर नभएको बरु प्रतिगमनकाविरुद्ध लडेर कम्युनिस्ट आन्दोलनको रक्षा गर्ने अवसर आएको बताए ।

‘अहिले अब के हुन्छ र भनेको जस्तो, अहिले प्रतिगमनकाविरुद्ध लडेर कम्युनिस्ट आन्दोलनको रक्षा गर्ने अवसर पनि हो । हामी कमजोर भएका छैनौं । माओवादी आन्दोलन, माओवादी केन्द्र कमजोर भएको छैन,’ दाहालले भने, ‘यो बीचमा सामान्य जनताकोबीचमा गएर उनीहरुको मनोभावनालाई नजिकबाट बुझ्ने कोशिस गरिराखेको छु । उहाँहरु सबैको कुरा हामी पहिलाको जस्तै क्रान्तिकारी भइदिऊन्, पहिलाको जस्तै माओवादी भएर आइदिऊन्, प्रचण्ड पनि पहिलाको जस्तै गर्जियोस्, पार्टी पनि त्यसरी आवोस् भन्ने जनताको चाहना छ ।’

जनता र कार्यकर्ताको भावना बुझेर जाँदा आफूहरुको अगाडि अहिले पनि विशाल सम्भावना रहेको दाहालले बताए । कम्युनिस्ट आन्दोलनभित्र घुसेको प्रतिक्रियावादलाई परास्त गर्न र वैचारिक आन्दोलनलाई उचाइ दिने अवसर फेरी आएको उनको भनाइ छ । ‘प्रतिक्रियावादीले कम्युनिस्ट आन्दोलनलाई धरासायी पार्न जो आँट गरेका छन्, त्यसको निम्ति हामीले राष्ट्रिय एकता कायम गर्दै राष्ट्रिय स्वाधिनताको आन्दोलनलाई नयाँ उचाइमा उठाउने संकल्प गर्नुपर्दछ,’ दाहालले भने, ‘चुनौती जहाँ छ अवसर पनि त्यही हुन्छ । कम्युनिस्ट क्रान्तिकारीहरुले त्यसको निम्ति आफूलाई तयार पार्नुपर्छ । हामी पहिला वैचारिक, राजनीतिक, संगठनात्मक रुपमा बलियो हुनुपर्छ । आफ्नै खुट्टामा उभिनु पर्छ । त्यसपछि वामपन्थी शक्तिबीच एकता गर्नुपर्छ ।’

एमालेसँग पार्टी एकता गरेर कुनै गल्ती नगरेको तर प्रतिक्रियावादी र अवसरवादी शक्तिले जबरजस्त रुपमा नेकपा विभाजन गरेको दाहालको दाबी छ । ‘हामीले एकता गरेर गल्ती गरेका थिएनौं । हाम्रो पक्षमा त्यति शक्ति सन्तुलन नभएको भएर विभाजन रोक्न त सकेनौं । तर हामी पराजित भएको हैन । पार्टी एकता गर्दा गलत प्रवृत्तिका नायकलाई गलत्याएका नै थियौं । वैधानिक ढंगले नै गलत प्रवृत्तिका खलनायकहरुलाई निकालेकै हो । त्यहाँ पराजित भएको थिएनौं,’ दाहालले भने, ‘पराजित उनीहरु भए जो प्रतिक्रान्तिको बाटो हिँडे जसको साथमा पार्टीको बहुमत थिएन । एक तिहाइ लिएर बसेकाहरुले विदेशी शक्तिको आडमा यहाँ कानुन, संविधान मिच्ने, मूल्य मान्यता मिच्ने काम भएको छ ।’

प्रकाशित : वैशाख ९, २०७८ १५:२९
प्रतिक्रिया
पठाउनुहोस्

पार्टी एकताका लागि खनाल–नेपाल समूहको अपिल

कान्तिपुर संवाददाता

काठमाडौँ — नेकपा एमालेको झलनाथ खनाल–माधव नेपाल समूहले अध्यक्ष केपी शर्मा ओलीले आफूहरुलाई पार्टीमा रहन नदिन अनेक दाउपेच गरेको आरोप लगाएका छन् । ७२ औं पार्टी स्थापना दिवसका सन्दर्भमा बिहीबार सामूहिक अपिल जारी गर्दै उनीहरुले सो कुरा बताएका हुन् ।

फाइल तस्बिर : बिजु महर्जन/कान्तिपुर

‘हामीलाई नेकपा (एमाले) मा रहन नदिन अनेक दाउपेचहरू गरिएका छन् । २८ फागुनको गुट भेलालाई नै पार्टी केन्द्रीय कमिटको बैठक मान्ने कुराले त्यही देखाउँछ । तर हामी पार्टी एकता जोगाउन चाहन्छौं । त्यसैले हामीले ‘नेकपा (एमाले) को एकतालाई बचाऔँ, कम्युुनिष्ट आन्दोलनको रक्षा गरौँ’ भनेका छौं’, अपिलमा भनिएको छ, ‘त्यसका निम्ति फागुन २८ र तत्पश्चात भएका कथित बैठक र तिनका अवैध निर्णय सबै रद्द गरिनुपर्छ र २०७५ जेठ २ गते जुन केन्द्रीय कमिटी थियो त्यसको पूर्ण बैठक बसेर अब कसरी अगाडि बढ्ने भन्ने सम्बन्धमा निर्णय गर्नुपर्दछ । यदि त्यसो भयो भने नेकपा एमाले) को एकता जोगिन्छ । एमालेको एकता जोगाउन सकियो भने नेपाली कम्युनिष्ट आन्दोलनको रक्षा गर्ने आधार जोगिन्छ ।’

पछिल्लो समय ओलीले चालेका कदम एमाले विभाजन हुनु साथै कम्युनिष्ट आन्दोलनको विसर्जनको दिशामा रहेको बताएका छन् । आफूहरु भने एकताको पक्षमा रहेको उनीहरुको भनाइ छ ।

‘केपी ओलीले जुन दिशामा लैजाँदै हुनुहुन्छ त्यो पार्टीको विभाजन र विघटनको दिशा र अन्त्यतः कम्युनिष्ट आन्दोलनकै विसर्जनको दिशा हो । यसरी पार्टी अध्यक्षका गलत वैचारिक तथा सैद्धान्तिक दिशा र उहाँको व्यक्तिवादी अहंकारका विरुद्ध उभिनु र त्यसको सामना गर्नु र पार्टी एकताको पक्षमा दृढतापूर्वक उभिनु हरेक पार्टी सदस्य, शुभचिन्तक र समर्थकको ऐतिहासिक कर्तव्य हुन गएको छ,’ अपिलमा छ, ‘हामीले चैत ४ र ५ गतेको राष्ट्रिय भेलाबाट पार्टीको एकता र कम्युुनिष्ट आन्दोलनको रक्षाका लागि संगठित अभियान सुरु गरेका छौँ । पार्टी अध्यक्षसँग अनेकौँ विषयमा हाम्रा असहमति छन् र हामीसँग उहाँका पनि अनेक असहमति हुन सक्छन् । जसका बारेमा पार्टी केन्द्रिय कमिटीको विधिवत बैठकबाट समाधान गर्न सकिन्छ । त्यसका लागि २०७५ जेठ २ गतेको बिन्दुबाट पार्टी जीवन आरम्भ गर्नुपर्छ भन्ने हाम्रो माग हो, दाबी हो ।’

यस्तो सामान्य प्रस्तावलाई स्वीकार नगर्नु नै ओली पार्टी विभाजनमा लागेको प्रमाणित भएको नेपाल समूहको आरोप छ ।

यस्तो छ अपिल :

प्रकाशित : वैशाख ९, २०७८ १४:५८
पूरा पढ्नुहोस्
प्रतिक्रिया
पठाउनुहोस्
×