सगरमाथासहित ६ हिमाल सफा गर्दै सेना- समाचार - कान्तिपुर समाचार
कान्तिपुर वेबसाईट
AdvertisementAdvertisement

सगरमाथासहित ६ हिमाल सफा गर्दै सेना

सैनिक र शेर्पा गरी ११२ जना खटिने
कुम्भराज राई

ओखलढुंगा — नेपाली सेनाको नेतृत्वमा ६ वटा हिमालको सफाइ गरिने भएको छ । सरकारको ‘सफा हिमाल अभियान’ अन्तर्गत सेनाले पहिलोपटक एकसाथ ६ वटा हिमाल सफाइको नेतृत्व लिएको हो । अभियानअन्तर्गत सगरमाथा, ल्होत्से, पुमोरी, आमादब्लम, मकालु र धौलागिरि हिमाल सफाइ गरिनेछ । त्यसका लागि सेनाको टोली राजधानीबाट हिँडिसकेको छ ।


सन् २०१९ मा सगरमाथा सफाइ गर्न सेना खटिएको थियो । सगरमाथा प्रदूषण नियन्त्रण समिति (एसपीसीसी) सँगको सहकार्यमा त्यसबेला १० टन फोहोर र ४ वटा शव संकलन भएको थियो । यस वर्ष सेनाले ह्यान्डलिङ एजेन्सीका रूपमा पिक प्रमोसन प्रालिलाई छनोट गरेको छ । वन तथा वातावरण मन्त्रालयले अघिल्ला वर्षहरूमा हिमाल सफाइका लागि बजेट विनियोजन गरे पनि खर्च नभई फर्कने गरेको थियो । यस वर्ष सेनालाई सफाइ अभियानका लागि सोझै १० करोड रुपैयाँ उपलब्ध गराइएको थियो । त्यसपछि सेनाले विभिन्न स्रोत जुटाएर कुल १२ करोड ५५ लाख रुपैयाँमा अभियान अघि बढाएको सेनाका तर्फबाट सगरमाथा, ल्होत्से र पुमोरी सफाइको नेतृत्व लिएका सेनानी आदित्य कार्कीले बताए । सेनाले ६ हिमाल सफाइ गर्न ४ वटा टोली बनाएर खटाएको छ । सगरमाथा, ल्होत्से र पुमोरी सफाइका लागि १३ जनाको टोली खटिएको छ । आमादब्लम, मकालु र धौलागिरिमा १०–१० जना गरी ३० जना सैनिक कार्यस्थल पुगिसकेका छन् । ‘अघिल्लोपटक सगरमाथा सफाइ गर्दा सेनाको उपस्थिति आधार शिविर व्यवस्थापनमा मात्र थियो,’ अभियानका फोकल पर्सनसमेत रहेका कार्कीले भने, ‘यस वर्ष आधार शिविर व्यवस्थापन र फोहोर उठाउने अन्तिम ठाउँसम्म अनुगमन गरी प्रमाणीकरण गर्ने काम सेनाले गर्छ ।’ उनका अनुसार फोहोर संकलन, रुट फिक्सिङ र हिमाल चढ्ने काम ‘ह्यान्डलिङ एजेन्सी’ का रूपमा रहेको पिक प्रमोसनका कामदारहरूले गर्नेछन् । सेनाले प्रत्यक्ष अनुगमन र प्रमाणीकरण गरी संकलित फोहोरलाई आधार शिविरदेखि ल्याउनेछ ।

सफाइ अभियानमा सैनिक र शेर्पा गरी १ सय १२ जना खटिने उनले जनाए । यसमध्ये ४३ जना सैनिक र ६९ जना शेर्पा छन् । आरोहणबाट रित्तो फर्किने अन्य कम्पनीका शेर्पाहरूलाई पनि फोहोर संकलन गरी आधार शिविर ल्याएबापत फोहोरको परिमाण हेरी पारिश्रमिक दिने व्यवस्थासमेत गरिएको सेनाले जनाएको छ । सफाइ अभियानको टोली मे २९ (वसन्तकालीन आरोहणको अन्तिम दिन) सम्म आधार शिविरमै बसेर फोहोर संकलनमा खटिनेछ ।


प्रकाशित : वैशाख ७, २०७८ १३:२१
प्रतिक्रिया
पठाउनुहोस्

त्रिकोणात्मक ट्वान्टी-२० : कुशलको लगातार तेस्रो अर्धशतक, नेदरल्यान्ड्सलाई नेपालको ठूलो लक्ष्य

विनोद पाण्डे

काठमाडौँ — कुशल भुर्तेल आफ्नो पहिलो तीन खेलमै ट्वान्टी-२० अन्तर्राष्ट्रियमा अर्धशतक बनाउने पहिलो खेलाडी बनाएका छन् । उनको र उपकप्तान दीपेन्द्रसिंह ऐरीको सानदार ब्याटिङमा नेपालले नेदरल्यान्ड्सलाई त्रिकोणात्मक ट्वान्टी-२० अन्तर्राष्ट्रिय शृंखलामा २ सय ७ रनको लक्ष्य दिएको छ ।

कुशलले यसै शृंखलाको नेदरल्यान्ड्ससँगको पहिलो खेलबाट ट्वान्टी-२० अन्तर्राष्ट्रियमा डेब्यु गर्दै ६२ रन बनाएका थिए । मलेसियासँग अघिल्लो दिन भएको खेलमा पनि उनले अविजित ६१ रन बनाएका थिए । कुशलले नेदरल्यान्ड्ससँग ४६ बल खेली ८ चौका र १ छक्का प्रहार गर्दै ६२ रन बनाए ।

उनको प्रयासमा नेपालले मंगलबार त्रिवि क्रिकेट मैदान कीर्तिपुरमा टस जितेर ब्याटिङ गर्दै ६ विकेट गुमाई २ सय ६ रन बनाएको हो । ट्वान्टी-२० अन्तर्राष्ट्रियमा नेपालको यो दोस्रो उच्च स्कोर हो । २०१९ को दक्षिण एसियाली खेलकुदमा नेपालले भुटानविरुद्ध २ सय ३६ रन बनाएको थियो ।

२९ बलमै अर्धशतक बनाएका दीपेन्द्रले ६० रन जोडे । ३० बल खेलेका उनले ३ चौका र ५ छक्का प्रहार गरी ६० रन बनाए । कुशलका ओपनिङ जोडी आसिफ शेख शुन्यमा आउट भए । कप्तान ज्ञानेन्द्र मल्ल २० रनमा आउट भए । कुशल मल्लले ३ छक्का प्रहार गर्दै ७ बलमा १८ रन बनाए ।

करण केसीले १ रनमात्र बनाउन सके । सोमपाल कामी १३ बल खेली २ चौका र १ छक्का प्रहार गर्दै २१ र विनोद भण्डारी ७ बल खेली ७ रनमा अविजित रहे । खेलमा नेपालले कुल ११ छक्का प्रहार गरेको थियो । नेदरल्यान्ड्सका भिभिएन किङमा र कप्तान पिटर सिलारले २/२ विकेट लिए ।

... [अपडेट]

नेपालले त्रिकोणात्मक ट्वान्टी-२० अन्तर्राष्ट्रिय क्रिकेट शृंखलाअन्तर्गत नेदरल्यान्ड्सविरुद्धको खेलमा टस जितेर पहिले ब्याटिङ रोजेको छ । त्रिवि क्रिकेट मैदानमा मंगलबार मध्याह्न भएको टसमा नेपालका कप्तान ज्ञानेन्द्र मल्लले टस जित्दै ब्याटिङ गर्ने निर्णय गरेका हुन् ।

नेपाली टोलीमा कुनै परिवर्तन गरिएको छैन । नेपालले नेदरल्यान्ड्स र मलेसियासँगका दुवै खेल समान ९ विकेटले जितेको थियो ।

मलेसियासँगको खेलमा नेपालले आरिफ शेखको स्थानमा कुशल मल्ललाई खेलाएको थियो ।

नेदरल्यान्ड्ससँगको आजको खेलमा विजय हात पारे नेपाल अपराजित रही फाइनल पुग्नेछ ।

नेदरल्यान्ड्सले नेपालसँगको खेल जिते फाइनल पुग्ने सम्भावना बलियो हुनेछ ।

प्रकाशित : वैशाख ७, २०७८ १३:१३
पूरा पढ्नुहोस्
प्रतिक्रिया
पठाउनुहोस्
×