काठमाडौँ — प्रतिनिधिसभाको अधिवेशन अन्त्य गर्नेबारे सरकारले संसद्सँग सल्लाह नगरेको सभामुख अग्निप्रसाद सापकोटाले बताएका छन् ।

मन्त्रिपरिषद्को सिफारिसमा राष्ट्रपति विद्यादेवी भण्डारीले सोमबार १ बजेदेखि लागू हुने गरी प्रतिनिधिसभा अधिवेशन अन्त्य गरेको बारे सञ्चारकर्मीलाई प्रतिक्रिया दिँदै सभामुख सापकोटाले भने, 'सरकारले प्रतिनिधिसभाको अधिवेशन अन्त्यबारे मसँग केही सल्लाह गरेको छैन ।' सभामुख सापकोटाले उक्त विषयमा थप प्रतिक्रिया नभएको बताए ।

त्यस्तै, कांग्रेस सचेतक पुष्पा भुसालले सरकारले कुनै पनि पक्षसँग सल्लाह नगरी प्रतिनिधिसभा अधिवेशन अन्त्य गरेकोमा असन्तुष्टि जनाइन् । 'सर्वदलीय बैठकमा पनि सल्लाहमै अधिवेशन अन्त्य गर्ने भनिएको थियो । सरकारले विधेयक अधिवेशनको औचित्य नै समाप्त पारेको छ,' उनले भनिन् ।

एमसीसी, नागरिकता विधेयक, निजामती विधेयकलगायत संसद्‌मा अगाडि बढाउन आफूहरूले माग गरिरहेको र त्यसबारे छलफल भइरहेका बेला हठात् अधिवेशन अन्त्य गरिएकोमा उनले आपत्ति जनाइन् । राज्यव्यवस्था तथा सुशासन समिति सभापति शशी श्रेष्ठले पनि कारागार विधेयकको प्रतिवेदन सदनमा प्रस्तुत गर्न तयार रहेकामा अधिवेशन अन्त्य गरिएकोमा असन्तुष्टि जनाइन् । राज्य व्यवस्थाबाट गएका नागरिकता, निजामती विधेयक अगाडि नबढेकोमा पनि उनले असन्तुष्टि जनाइन् ।

प्रतिनिधिसभाको सातौं अधिवेशनमा ९ बैठक बसेका थिए । पुस ५ गते प्रधानमन्त्रीको सिफारिसमा राष्ट्रपति भण्डारीले प्रतिनिधिसभा विघटन गरेकी थिइन् । जसलाई सर्वोच्च अदालतले फागुन ११ गते असंवैधानिक ठहर गर्दै पुन:स्थापनाको फैसला गरेको थियो । त्यसपछि फागुन २३ गते प्रतिनिधिसभा अधिवेशन सुरु भएको थियो । प्रतिनिधिसभा बैठकमा एउटा पनि विधेयक प्रस्तुत गरिएको थिएन । प्रधानमन्त्री केपी शर्मा ओली संसद्को पछिल्लो अधिवेशनको एउटा बैठकमा पनि उपस्थित भएनन् ।