सहरी क्षेत्रका विद्यालय वैशाखभर बन्द गर्ने सरकारको निर्णय- समाचार - कान्तिपुर समाचार
कान्तिपुर वेबसाईट
AdvertisementAdvertisement

सहरी क्षेत्रका विद्यालय वैशाखभर बन्द गर्ने सरकारको निर्णय

कान्तिपुर संवाददाता

काठमाडौँ — सरकारले सहरी क्षेत्रका विद्यालय वैशाखभर बन्द गर्ने निर्णय गरेको छ । सोमबार बिहान बसेको मन्त्रिपरिषद् बैठकले सहरी क्षेत्रका विद्यालय वैशाखभर बन्द गर्ने निर्णय गरेको सहरी विकासमन्त्री प्रभु साहले जानकारी दिए । 

उनले भने, 'कोभिड नियन्त्रणसम्बन्धी आदेश जारी भएको छ । त्यसमा के-के पर्छन् भनेर पछि जानकारी हुनेछ ।' त्यस्तै २५ जनाभन्दा बढीको भेलामा पनि रोक लगाउने निर्णय भएको उनले बताए । मन्त्री साहका अनुसार अनलाइन कक्षा सञ्‍चालन हुने गरी विद्यालय बन्द गर्ने निर्णय गरिएको छ ।

यसअघि शनिबार कोभिड–१९ संकट व्यवस्थापन केन्द्र (सीसीएमसी) ले कोरोना भाइरसको संक्रमण पुनः बढेसँगै अतिप्रभावित जिल्लामा वैशाख मसान्तसम्म भर्चुअल कक्षा मात्र लिन मन्त्रिपरिषद्लाई सिफारिस गरेको थियो  ।

पछिल्ला दिनमा कोभिड–१९ को संक्रमण बढेसँगै स्वास्थ्य मन्त्रालयले अतिप्रभावित जिल्लाहरूमा शैक्षिक संस्थालाई केही समय बन्द गर्न भनेको थियो । तर शिक्षा मन्त्रालयलाई निजी विद्यालय सञ्चालकहरूले अहिले नै विद्यालय बन्द गर्न नहुने भन्दै दबाब दिएपछि सरकारले के गर्ने भन्ने अन्योल थियो ।

स्वास्थ्य तथा जनसंख्या मन्त्रालयले कोरोना संक्रमणका हिसाबले अति प्रभावित भनी वर्गीकरण गरेका विभिन्न १४ जिल्लाका विद्यालय बन्द गर्नुपर्ने अवस्था रहेको बताएको थियो । काठमाडौं, ललितपुर, कास्की, रुपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा, बागलुङलाई मन्त्रालयले अतिप्रभावित भनी वर्गीकरण गरेको थियो ।

प्रकाशित : वैशाख ६, २०७८ १०:३१
प्रतिक्रिया
पठाउनुहोस्

भारतमा एकैदिन २ लाख ७३ हजारभन्दा बढीलाई कोरोना, १,६१९ को मृत्यु

एक हप्तामै थपिए करिब १५ लाख संक्रमित, अस्पतालमा बेड अभाव भएपछि केन्द्रीय मन्त्रीले नै मागे सहयोग
कान्तिपुर संवाददाता

काठमाडौँ — भारतमा कोरोना संक्रमण दिनदिनै तीव्र गतिमा बढिरहेको छ । भारतीय स्वास्थ्य तथा परिवार कल्याण मन्त्रालयका अनुसार पछिल्लो २४ घण्टामा मात्रै २ लाख ७३ हजार ८ सय १० जनामा कोरोना संक्रमण पुष्टि भएको छ ।

दिल्लीको लोकनायक जय प्रकाश(एलएनजेपी) अस्पतालमा उपचारका लागि भर्ना भएका कोरोना संक्रमित तस्बिर : रोयटर्स

भारतमा एकैदिन २ लाखभन्दा बढीलाई संक्रमण पुष्टि भएको यो चौथो दिन हो । त्यस्तै भारतमा पछिल्लो २४ घण्टामा १६ सय १९ जनाको मृत्यु भएको छ । योसँगै भारतमा संक्रमितको संख्या १ करोड ५० लाख ६१ हजार ९ सय १९ पुगेको छ । त्यस्तै अहिलेसम्म कोरोनाले १ लाख ७८ हजार ७ सय ६९ को मृत्यु भएको छ भने १ करोड २९ लाखभन्दा बढी संक्रमणमुक्त भएका छन् । भारतमा अहिले १९ लाख २९ हजारभन्दा बढी सक्रिय संक्रमित रहेका छन् ।

भारतले पछिल्लो समय कोरोनाविरुद्धको भ्याक्सिनलाई तीव्रता दिइए पनि कोरोनाको दोस्रो लहर रोक्न सफल भएको छैन । केही हप्तादेखि विभिन्न राज्यमा भइरहेका विधानसभा चुनावको प्रचार र हरिद्वारमा आयोजित कुम्भ मेलाले ‘सुपर स्प्रेडर’ को काम गरेको जनस्वास्थ्यविद्को भनाइ छ । भारतमा अहिलेसम्म १२ करोड ३८ लाख ५२ हजार ५ सय ६६ डोज खोप लगाइएको छ । जसमध्ये आइतबार मात्रै १२ लाख ३० हजारले कोरोना खोप लगाएका थिए ।

भारतमा पछिल्लो एक सातामा मात्रै करिब १५ लाख संक्रमित थपिएका छन् । जुन भारतमा अहिलेसम्म पुष्टि भएका संक्रमितको संख्याको १० प्रतिशत हो । अप्रिल ११ देखि अप्रिल १८ सम्म मात्रै १४ लाख ५० हजारभन्दा बढी संक्रमित थपिएका हुन् ।

अस्पतालमा बेड र औषधि अभाव

संक्रमण तीव्र बनेसँगै अस्पतालमा बेड, बिरामीहरुका लागि आईसीयू, भेन्टिलेटर, अक्सिजन र अन्य अत्यावश्यक औषधिको चरम अभाव हुन थालेको छ । अभावकै कारण आफन्तका लागि बेड, अक्सिजन र भेन्टिलेटरका लागि केन्द्रीय मन्त्रीदेखि पत्रकारहरुले समेतले सामाजिक सञ्जालमार्फत् गुहार लगाउन थालेका छन् । केन्द्रीय मन्त्री भीके सिंहले आइतबार मध्यान्ह कोरोना संक्रमित आफ्ना भाइका लागि बेडको आवश्यक भएको भन्दै ट्विटरमार्फत् सहयोग मागेका छन् ।

भारतीय सेनाका पूर्वप्रमुखसमेत रहेका सिंहले भनेका छन्, ‘कृपया मलाई सहयोग गर्नुहोस् मेरो भाइलाई कोरोना उपचारका लागि बेडको आवश्यकता छ, अहिले गाजियाबादमा बेडको व्यवस्था हुन सकिरहेको छैन ।’

उत्तरप्रदेशमा पर्ने गाजियाबाद मन्त्री सिंहको आफ्नै निर्वाचन क्षेत्र हो । उत्तरप्रदेशका मुख्यमन्त्री योगी आदित्यनाथका सूचना सल्लाहकार शलभमणि त्रिपाठीले ट्वीटमै आवश्यक प्रक्रिया सुुरु गरिएको जवाफ दिएका थिए ।

केन्द्रीय मन्त्रीले नै सहयोग माग्नु परेपछि भारतीय स्वास्थ्य प्रणालीबारे प्रश्न उठाउँदै सामाजिक सञ्जालमा कडा आलोचना भएको थियो । त्यसपछि मन्त्री सिंहले आफूले आफ्ना भाइका लागि नभएर संक्रमित व्यक्तिसम्म जिल्ला प्रशासन पुगोस् भनेर ट्विट गरेको स्पष्टीकरण दिएका थिए । तर उक्त स्पष्टीकरणको केही समयपछि भने उनले पहिलेको ट्वीट हटाएका थिए ।

प्रकाशित : वैशाख ६, २०७८ १०:०१
पूरा पढ्नुहोस्
प्रतिक्रिया
पठाउनुहोस्
×