डकैतीपछि सुनचाँदी व्यवसायीको गोली हानी हत्या 

इलाका प्रहरी कार्यालय लहानका डीएसपी डा. तपनकुमार दाहालका अनुसार शनिबार राति पौने १२ बजेतिर हतियारधारी समूहले लहान नगरपालिका–२३ गढिया चोकमा सुनचाँदी पसल गर्दै आएका प्रदिप मिझारको हत्या गरेका हुन् । टाउको, अनुहार र हातमा खुकुरी प्रहार र छातीमा गोली लागि घाइते मिझारको लहानस्थित सप्तऋषी अस्पतालमा उपचारको क्रममा आइतबार बिहान साढे चार बजे मृत्यु भएको प्रहरीले जनाएको छ । सो समूहले सुनचाँदी र नगद पनि लुटपाट गरेका छन् ।

हत्या गरिएका मिझारकी श्रीमती अनिता दुलाल पनि घाइते छन् । दाहिने हातमा खुकुरी प्रहारबाट घाइते भएकी अनिताको सप्तऋषी अस्पतालमा उपचार भइरहेको छ । हत्यामा संलग्न भएको आशंकामा प्रहरीले लहान नगरपालिका–७ का रामकृष्ण चौधरी र लहान नगरपालिका–२३ का सूर्य सहनीलाई फलामको छिनोसहित नियन्त्रणमा लिएर अनुसन्धान गरिरहेको डीएसपी दाहालले जानकारी दिए ।

हत्या भएका मिझार लहान नगरपालिका–२२ सिसवनी घरभई गढिया चौकमा वडाध्यक्ष कन्हैया गुप्ताको घरमा सुनचाँदी पसल गर्दै आएका थिए । श्रीमतीसँग त्यही बसेका बेला लुटेरा समूहले गोली चलाएको बुझिएको छ । घटनाको अनुसन्धान भइरहेको प्रहरीले जनाएको छ ।