प्रधानमन्त्री ओलीको प्रश्‍न- कहाँ भयो प्रतिगमन ?- समाचार - कान्तिपुर समाचार

प्रधानमन्त्री ओलीको प्रश्‍न- कहाँ भयो प्रतिगमन ?

कान्तिपुर संवाददाता

काठमाडौँ — प्रधानमन्त्री केपी शर्मा ओलीले जनताको चेतनालाई केहीले प्रतिगमन भयो भन्दै स्याल हुइयाँ मच्चाएको आरोप लगाएका छन् । शुक्रबार काठमाडौं उपत्यकामा मेलम्चीको खानेपानी वितरण कार्यक्रम उद्घाटनपछि ओलीले प्रतिगमनको परिभाषा नबुझ्नेले प्रतिगमन भयो भनेर जनतालाई अलमल्याएको टिप्पणी गरे ।

‘कतिपय कराउँदै गर्छन्, म निश्चिन्त रहन आग्रह गर्छु । जनताको जागेको चेतनालाई कसैले पनि प्रतिगमन भयो भन्ने स्याल हुइयाँ मच्चाए,’ ओलीले भने, ‘कहाँ भयो प्रतिगमन ? प्रतिगमन भनेको के हो ? परिभाषा नै नबुझी प्रतिगमन भयो । ख्यालठट्टा हो प्रतिगमन भनेको ? यति सारो जनता अलमल्याउने ?’

कोही प्रधानमन्त्री हुन पाए त्यो क्रान्ति हुने र नभए प्रतिगमन हुने ओलीको भनाइ छ । ‘कोही शासनमा पुग्न पायो भने क्रान्ति भइहाल्ने । कोही शासनमा पुग्न पाएन भने प्रतिगमन हुन्छ ? म प्रधानमन्त्री हुन पाउनु पर्छ भनेर कुद्ने, अवैध बाटोबाट, त्यो भएन भने प्रतिगमन भयो भन्ने गरेका छन्,’ ओलीले भने ।

माओवादी केन्द्रका अध्यक्ष पुष्पकमल दाहालले यो सरकार प्रतिगमनको बाटोमा हिँडेको आरोप लगाएका थिए । ओलीले त्यसको खण्डन गर्दै कसैका व्यक्तिगत आकांक्षा परिपूर्ति नहुँदा संघीयता, गणतन्त्र खतरामा रहेको अभिव्यक्ति दिने गरेको बताए । ‘संविधान मासियो, च्यातियो, मिचियो, गणतन्त्र खत्तम हुने भयो । लोकतन्त्र खत्तम हुने भयो । संघीयता त ध्वस्तै पार्न आँट्यो । यस्ता खालका कुराहरु व्यक्तिगत आकांक्षा परिपूर्ति नहुँदा असन्तुष्टि अभिव्यक्ति गर्ने कुरामात्र हुन् । देश अगाडि बढ्छ, विकासको क्रम अगाडि बढ्छ । सरकारको यसैमा ध्यान छ,’ उनले भने ।

प्रधानमन्त्री ओलीले संसद्‌ पुनःस्थापना भएपछि पनि केही नेताको तानातानले काम अघि बढ्न नसकेको बताए । ‘संसद्‌ पुनःस्थापना त भयो । न काम अगाडि बढाउन सक्छ, न केही गर्न सक्छ,’ उनले भने, ‘त्यस्तो स्थितिमा संसद् तानातानको थलो भएको छ । संसद् केही बलिया हुँ भन्नेहरुको तानातानको थलो बनाउन हुँदैन ।’

प्रमुख प्रतिपक्षी दल कांग्रेससहितका नेताहरुले सरकारले संसद्‌लाई विजनेस नदिएर बदला लिन खोजेको बताएका थिए । अहिले पनि सरकारलाई काम गर्न नदिएको ओलीको भनाइ छ । ‘सरकारलाई काम गर्न अहिले पनि दिइएको छैन । हामीले अन्योल अस्थिरतामा रुमल्लिइरहने हुँदैन । हामी विकासको बाटोमा अगाडि बढ्छौं,’ उनले भने ।

प्रकाशित : चैत्र २०, २०७७ १७:२२
प्रतिक्रिया
पठाउनुहोस्

कालोबजारी गर्ने र कृत्रिम अभाव सिर्जना गर्नेहरुलाई कारबाही गर्न संसदीय समितिको निर्देशन

कान्तिपुर संवाददाता

काठमाडौँ — संसदीय समितिले बजारमा कालोबजारी गर्ने र कृत्रिम अभाव सिर्जना गर्नेहरुलाई कारबाही गर्न सरकार मातहतका निकायलाई निर्देशन दिएको छ ।

राष्ट्रिय सभाको दीगो विकास तथा सुशासन समितिको शुक्रबारको बैठकले कालोबजारी गर्ने र कृत्रिम अभाव सिर्जना गर्नेहरुलाई कारबाही गर्न वाणिज्य, आपूर्ति तथा उपभोक्ता संरक्षण विभाग, औषधि व्यवस्था विभाग, भन्सार विभाग र आन्तरिक राजस्व विभागलाई निर्देशन दिएको हो । समितिले चारवटै विभागका महानिर्देशकहरुलाई बैठकमा बोलाई उपभोक्ता हकहित र बजार व्यवस्थापनमा सुशासनको अवस्था सम्बन्धमा छलफल गरेपछि यस्तो निर्देशन दिएको हो ।

नेपाली उपभोक्ताहरुको हकहितमा केन्द्रित हुन नेपालको कानुनबमोजिम आआफ्नो सीमाभित्र रही कालोबजारी गर्नेहरुलाई निरुत्साहित गर्न र सबै सम्बन्धित विभागले संवेदनशील हुनुपर्ने देखिन्छ । वर्तमान मार्केट गभर्नेन्सको व्यवस्था नियमित अनुगमन हुनुपर्दछ,' समिति सभापति तारादेवी भट्टले भनिन्, 'डाटाहरु सुव्यवस्थित राख्न, कृतिम अभाव सिर्जना गर्नेहरुलाई कडा कारबाही गर्न आज छलफल भएबमोजिम हाम्रो प्रणाली सुधारमा केन्द्रित हुन यो समिति नेपाल सरकार र सम्बन्धित सबै विभागहरुलाई निर्देशन दिन्छ ।’

यस्तै दर्ता भए पनि नभए पनि कर नतिर्ने तथा महँगो र चर्को मूल्यमा सामान बेच्नेलाई कडा कानुनी दायराभित्र ल्याई दण्ड र जरिमानासहित कारबाही गर्न पनि समितिले निर्देशन दिएको छ ।'

समितिले बिल बिजक लिनुपर्छ भन्ने सम्बन्धमा बढीभन्दा बढी जनचेतना फैलाउनु सरकारको दायित्व भएकोले त्यसतर्फ ध्यान दिनसमेत विभागहरुलाई निर्देशन दिएको छ ।

प्रकाशित : चैत्र २०, २०७७ १७:००
पूरा पढ्नुहोस्
प्रतिक्रिया
पठाउनुहोस्
×