खुवालुङ जोगाएर जेटबोट- समाचार - कान्तिपुर समाचार
कान्तिपुर वेबसाईट
AdvertisementAdvertisement

खुवालुङ जोगाएर जेटबोट

खुवालुङ क्षेत्रको बृहत्तर विकासको योजना निर्माण गर्न प्रदेश सरकारले अगुवाइ गर्ने मुख्यमन्त्री राईको प्रतिबद्धता
देवनाराण साह

मोरङ — मुख्यमन्त्री शेरधन राईले खुवालुङको संरक्षण गर्दै जेटबोट सञ्चालन गरिने बताएका छन् । मंगलबार खुवालुङ पुगेका राईले सरकारी तहमा खुवालुङ फुटाउने कुनै निर्णय नभएको भन्दै यो ठाउँलाई सांस्कृतिक तथा धार्मिक क्षेत्रका रूपमा विकास गर्ने घोषणा गरे ।

किरात राई यायोख्खाको टोलीलगायत स्थानीयको उपस्थितिमा राईले खुवालुङ क्षेत्रको बृहत्तर विकासको योजना निर्माण गर्न प्रदेश सरकारले अगुवाइ गर्ने प्रतिबद्धता जनाएका छन् । ‘सांस्कृतिक तथा धार्मिकस्थलको विकास गरी त्यस क्षेत्रका जनताको चौतर्फी विकासका लागि प्रदेश सरकारले अध्ययन गरिरहेको छ,’ उनले भने, ‘सामाजिक सञ्जालमा आजै खुवालुङ फुटाउँछ जस्तो भ्रामक प्रचारमा कुनै सत्यता छैन किनकि सरकारीस्तरमा यो विषयमा कुनै निर्णय भएको छैन ।’ सप्तकोसी नदीमा जल यातायात सञ्चालनका लागि अहिले अध्ययन मात्रै भइरहेको राईको भनाइ थियो ।

मुख्यमन्त्री शेरधन राईले धनकुटा र उदयपुरको सिमानास्थित दूधकोसी र तमोर नदीको दोभानमा रहेको खुवालुङमा मंगलबार सम्बोधन गर्दै । तस्बिरहरु : देवनारायण साह/कान्तिपुर

सप्तकोसीमा जल यातायात सञ्चालनका लागि अध्ययन गरिरहेका विज्ञ टोलीका विपलराज पाण्डेले ठूलो ढुंगाका रूपमा रहेको खुवालुङका विषयमा सरकारसँग राय मात्रै मागेको बताए । ‘खुवालुङको दायाँ–बायाँबाट जेटबोट सञ्चालनका लागि च्यानल मात्रै बनाउने र ५/५ मिटर वरिपरिबाट जहाज लग्न निषेधित क्षेत्र कायम गरेर सर्भे गर्छौं,’ उनले भने । सर्भे सकिएपछि सबैलाई जानकारी गराएर अघि बढ्ने उनले प्रतिबद्धता जनाए ।

धनकुटा र उदयपुरको सिमानास्थित दूधकोसी र तमोर नदीको दोभानमा रहेको खुवालुङ ।

यायोख्खाका अध्यक्ष दिवस राईले खुवालुङ फुट्दैन भन्नेमा विश्वस्त बने पनि यहाँको विकास आवश्यक रहेको बताए । खुवालुङ क्षेत्रको बृहत्तर विकासका लागि गुरुयोजना बनाएर अघि बढ्न उनले प्रदेश सरकारलाई आग्रह गरे । ‘यस क्षेत्रमा खुवालुङ पार गर्ने पुर्खाहरूको ठूलो प्रतिमा बनाएर धार्मिक, सांस्कृतिक तथा पर्यटकीयस्थलका रूपमा विकास गर्नु आवश्यक छ,’ उनले भने, ‘यसले यो क्षेत्रको बासिन्दाको जीवनस्तर उकास्न ठूलो मद्दत पुग्नुका साथै किरातहरूको ऐतिहासिक धरोहर क्षेत्रको विकासमा समेत टेवा पुग्छ ।’

मुख्यमन्त्री शेरधन राईले धनकुटा र उदयपुरको सिमानास्थित दूधकोसी र तमोर नदीको दोभानमा रहेको खुवालुङको अवलोकन गर्दै ।

धनकुटा र उदयपुरको सिमानास्थित दूधकोसी र तमोर नदीको दोभानमा रहेको खुवालुङ क्रेन लगाएर फुटाई जेटबोट सञ्चालन गर्ने प्रधानमन्त्री केपी शर्मा ओलीको अभिव्यक्तिपछि यसको विरोध भएको थियो ।

प्रकाशित : चैत्र १७, २०७७ २०:३७
प्रतिक्रिया
पठाउनुहोस्

अध्यक्ष दाहालले प्रधानमन्त्रीको राजीनामा मागेर लोकतन्त्रको खिल्ली उडाउनु भएको छ : नेता बाँस्कोटा

'कमानसिंह लामासँगको आर्थिक विवादको आरोप लागिसकेकाले पार्टी प्रवक्ताले नैतिकताका आधारमा राजीनामा दिनुपर्छ'
देवनाराण साह

मोरङ — पूर्वमन्त्री एवं नेकपाका केन्द्रीय सदस्य गोकुल बाँस्कोटाले पार्टीका कार्यकारी अध्यक्ष पुष्पकमल दाहालले प्रधानमन्त्री केपी शर्मा ओलीको राजीनामा मागेर लोकतन्त्रको खिल्ली उडाएको आरोप लगाएका छन् । 

विराटनगरमा आइतबार आयोजित पत्रकार सम्मेलनमा बाँस्कोटाले चुनावी अभियानमै प्रधानमन्त्री बन्ने नाराका साथ निर्वाचित भएर प्रधानमन्त्री बनेका व्यक्ति र पार्टी महाधिवेशनबाट निर्वाचित अध्यक्षलाई दुवै पदबाट राजीनामा माग गरेकोबाट मुलुकमा भइरहेको राजनीतिक षड्यन्त्र उजागर भएको बताएका हुन् ।

‘केपी ओलीलाई प्रधानमन्त्रीबाट राजीनामा गराउन संसदीय प्रक्रिया र अध्यक्षबाट हटाउन पार्टीको महाधिवेशनमा जानुको विकल्प छैन,’ उनले भने, ‘पार्टीको स्थायी कमिटी बहुमतको निर्णयले केपी ओलीलाई प्रधानमन्त्री र अध्यक्ष पदबाट हटाउन सक्दैन ।’ स्थायी कमिटी बहुमतको निर्णयले आफ्नो विचार र दृष्टिकोणमात्रै राख्न सक्ने बाँस्कोटाको तर्क थियो ।

‘पार्टीका कार्यकारी अध्यक्ष दाहालले पार्टीमा ल्याएको प्रतिवेदनमा प्रधानमन्त्री ओलीलाई लगाएको आरोप सबै पार्टीबाट समाधान हुँदैन,’ उनले भने, ‘कतिपय फौजदारी प्रकृतिका जघन्य आरोपहरु रहेकाले सम्पत्ति शुद्धीकरण, अख्तियार र अदालतबाट सिद्ध भए कानुनबमोजिम कारबाही हुनुपर्छ ।’

मुलुक र पार्टीको नेतृत्व परिर्वतनको वैधानिक विधि नअपनाई पार्टी कमिटीमा राजीनामा माग्नु छक्कापञ्जा भएकाले यसले पार्टी तथा मुलुक दुवैलाई भलो नगर्ने नेता बाँस्कोटाको भनाइ छ । पार्टीको अन्तरविरोध समाधान नेतृत्व परिवर्तनको माग गर्नुलाई उनले पार्टीभित्र विग्रहको संज्ञा दिए । जसले पार्टी अन्तहीन चक्रमा फस्ने भएकाले अहिलेको विवाद छलफल र संवादद्वारा अन्त्य गर्नुपर्ने उनले बताए ।

पार्टीमा दाहालको र प्रधानमन्त्री आलेलीले छुट्टाछुट्टै प्रतिवेदन ल्याएपछि जिल्ला जिल्लामा भइरहेको गुटगत भेलालाई बाँस्कोटाले पार्टी एकता प्रक्रियामा रहेकाले वैचारिक बहस हुनु स्वभाविक भएको तर्क गरे ।

नेकपाका प्रवक्ता तथा राष्ट्रियसभा सदस्य नारायणकाजी श्रेष्ठलाई कमानसिंह लामासँगको आर्थिक विवादको आरोप लागिसकेकाले नैतिकताका आधारमा राजीनामा दिनुपर्ने उनले बताए । उनले आफूलाई आरोप लागिसकेको २४ घण्टा नबित्दै राजीनामा दिएको स्पष्टिकरण दिए । प्रधानमन्त्रीलाई चारित्रिक प्रमाण पत्र दिने अग्रज नेताहरुको बारेमा आफूले धेरै भन्न नमिल्ने बाँस्कोटाको भनाइ थियो ।

प्रकाशित : मंसिर २८, २०७७ १४:५९
पूरा पढ्नुहोस्
प्रतिक्रिया
पठाउनुहोस्
×