नेता जोशीको निधनले पर्साको सुखचयना गाउँमा शोक छायो
पर्सा — पूर्वमन्त्री एवं कांग्रेस नेता नवीन्द्रराज जोशीको निधनले वीरगन्ज महानगरपालिका–२१ सुखचयना गाउँमा शोक छाएको छ । राजधानीका रैथाने भए पनि जोशीको मधेसको यो गाउँसँग पुर्ख्यौली सम्बन्ध छ ।
नवीन्द्रराजका हजुरबुबा शिवराजको पालादेखि नै यहाँ जोशी परिवारले शिक्षामा राम्रै लगानी गर्दै आएको छ । विसं. २०१९ ताका तत्कालीन नेपाल राष्ट्रिय विद्यालय सुखचयनाको भवन निर्माणका लागि ३ धुर र केहीपछि थप ८ कट्ठा जमिन जोशी परिवारले दान गरेको थियो ।
विद्यालय व्यवस्थापन समितिले २०६७ मा थप जग्गा मागेपछि यो परिवारले फेरि साढे ९ कट्ठा जमिन र ५० हजार रुपैयाँ दियो । ग्रामीण भेगका करिब १ हजार १ सय विद्यार्थी पढ्ने यो विद्यालयलाई भवन र मैदानका लागि अहिले पनि कुनै समस्या छैन ।
शनिबार बिहानै जोशीको अन्त्येष्टिमा सहभागी हुन सुखचयनाबाट एक टोली राजधानी जाने हतारोमा थियो । टोलीको अगुवाइ गरिरहेका थिए, विद्यालय व्यवस्थापन समिति अध्यक्ष अधिवक्ता जितेन्द्र पटेल । त्यतिबेला आफ्नो बुबा गजेन्द्रराजलाई जग्गा र नगद दान दिन नवीन्द्रराजले नै सहमत गराएको सम्झन्छन् पटेल ।
‘जोशी परिवारको यहाँ जिम्दारी थियो, उहाँहरूको हाम्रो गाउँप्रति जिम्दार र सामन्तजस्तो व्यवहार थिएन, गाउँमा शिक्षाको ज्योति फैलियोस् भन्ने चाहना थियो,’ पटेलले भने, ‘विद्यालयलाई सहयोग गर्नुभएकैले यसको नाम पनि नवीन्द्रजीका बुबाआमाकै नामबाट नेरा गीता गजेन्द्रराज जोशी मावि राखियो ।’
नेता जोशी विद्यालयको शैक्षिक तथा भौतिक अवस्थाबारे जानकारी लिन आइरहन्थे । ‘पछिल्लो पटक लकडाउनअघि बाराको कार्यक्रममा आउँदा यहाँ पनि आउनुभएको थियो,’ उनले भने, ‘उहाँ विद्यालयको भौतिक र शैक्षिक विकासमा कसरी योगदान गर्न सकिन्छ भनेर सधैं चिन्ता गरिरहनुहुन्थ्यो, निधनपछि घरकै अभिभावक गुमेजस्तो भइरहेको छ ।’
विद्यालय व्यवस्थापन समितिका पूर्वसदस्य ब्रह्मदेव साह विद्यालयलाई चाहिने प्राविधिक सहयोग जुटाउन जोशी सधैं प्रयासरत रहँदै आएको बताउँछन् । प्रधानाध्यापक राजकुमार सिंह आफूले जोशीसँग भेट्न नपाएकामा थकथक गर्छन् । ‘उहाँकै परिवारले खुला मनले गरेको दानले आज विद्यालय सहज रूपमा सञ्चालन गर्न ठूलो मद्दत मिलेको छ । तर उहाँसँग भेट्न पाइनँ, दुःख लागेको छ,’ सिंहले भने ।
सम्बन्धित समाचार
प्रकाशित : चैत्र १५, २०७७ ०८:५७
