नागरिक आन्दोलनको प्रश्न–‘राजनीतिको हलो किन अड्क्यो ?’- समाचार - कान्तिपुर समाचार

नागरिक आन्दोलनको प्रश्न–‘राजनीतिको हलो किन अड्क्यो ?’

समर्थन फिर्ता नलिनू भन्ने दबाब छ, म अब धेरै दिन पर्खिन सक्दिनँ : दाहाल
मलाई कुन दिन त्यहाँ (एमाले) बाट घोक्र्याएर निकाल्लान् भन्ने छ : नेपाल
कम्युनिस्ट पार्टीभित्रको स्वार्थको लडाइँमा हामीलाई किन तान्नुहुन्छ ? : ठाकुर
जनकराज सापकोटा

काठमाडौँ — प्रज्ञा प्रतिष्ठानको डबलीमा शनिबार दिउँसो राजनीतिशास्त्रका प्राध्यापक कृष्ण खनाल र नागरिक आन्दोलनकर्मी दोभान राईले प्रतिनिधिसभा विघटनको निर्णय बदरपछि पनि राजनीतिक गतिरोध नसुल्झिनुको कारणबारे माओवादी केन्द्रका अध्यक्ष पुष्पकमल दाहाल, एमाले नेता माधवकुमार नेपाल, जनता समाजवादी पार्टी (जसपा) का अध्यक्ष महन्थ ठाकुर र कांग्रेसका नेता मीनेन्द्र रिजाललाई प्रश्न गरे ।

बृहत् नागरिक आन्दोलनले शनिबार काठमाडौंको प्रज्ञा डबलीमा गरेको ‘नागरिकको प्रश्न दलहरूको जवाफ’ कार्यक्रमका सहभागी । अर्को तस्बिरमा बायाँबाट वक्ताहरू जनता समाजवादी पार्टीका अध्यक्ष महन्थ ठाकुर, एमाले नेता माधवकुमार नेपाल, माओवादी केन्द्रका अध्यक्ष पुष्पकमल दाहाल र कांग्रेस नेता मीनेन्द्र रिजाल । तस्बिर : बिजु महर्जन/कान्तिपुर

बृहत् नागरिक आन्दोलनअन्तर्गत गरिएको सवाल–जवाफले प्रधानमन्त्री केपी शर्मा ओलीइतरका नेताहरू के–कस्ता अप्ठ्यारोमा फसिरहेका छन् भन्ने पनि देखाएको छ । कार्यक्रममा एमाले नेता नेपालले आफू सबै कुरा प्रस्ट भन्न पनि नसक्ने खालको अप्ठ्यारोमा परेको बताए । माओवादी केन्द्रका अध्यक्ष दाहालले राजनीतिक रूपमा किनाराकृत पारिएकैले आफूहरू पीडित भएको उल्लेख गरे । उनले जसपा अध्यक्ष ठाकुरलाई लक्षित गर्दै भनेका थिए, ‘महन्थजीले म अहिले पीडित छु भन्नुभयो । तपाईं मात्रै पीडित हो र ? म पनि पीडित छु । मेरो टाउकामा मुद्दा छैनन् र ? मेरा साथीहरू पनि जेलमा छन् । त्यसैले हामी पीडित पीडित मिल्ने हो । पीडितहरूको मोर्चा बनाएर लडाइँ जित्ने हो ।’ जारी गतिरोधको निकास के हुन सक्छ भन्ने विषयमा चारै नेताले स्पष्ट नबताए पनि दाहालले केही दिनपछि परिस्थिति हेरेर आफूहरूले प्रधानमन्त्री ओलीलाई दिएको समर्थन फिर्ता लिने बताए । उक्त कार्यक्रममा भएको प्रश्नोत्तरको सम्पादित अंश :

000

‘प्रतिगामी सरकारलाई समर्थन गर्न सक्दिनँ’

प्रश्न : प्रतिनिधिसभा पुनःस्थापनापछि तपाईंहरूको दोस्रो योजना देखिएन । अहिले ओली सरकारलाई तपाईंहरूको समर्थन किन जारी छ ?

दाहाल : हामीले सोच्यौं, प्रतिनिधिसभा पुनःस्थापना भएपछि प्रधानमन्त्री ओलीले स्वतः राजीनामा दिने परिस्थिति बन्छ र राजनीति सहज ढंगले अगाडि बढ्छ । सायद प्रतिनिधिसभा पुनःस्थापना भएपछि हामी राजनीतिक नेतृत्वले थोरै रिल्याक्स गर्‍यौं । ठूलो लडाइँ त जितिहालियो, अब त के नै बाँकी होला र भन्ने लाग्यो । हामीसँग दोस्रो योजनामा गम्भीर नभएकै हो । हामीले गल्ती गर्‍यौं । लोकतन्त्र र परिवर्तनविरुद्ध ठूलो षड्यन्त्र छ भनेर एकपछि अर्को तयारी गर्नुपर्ने थियो । त्यहाँ थोरै हामी चुकेकै हो । हामीले जे सोचेको हो, त्योभन्दा फरक डिजाइनमा गयो । सर्वोच्च अदालतको विरोधाभासपूर्ण निर्णय देख्नुपर्‍यो ।

सर्वोच्चको निर्णय हामीले असहमतिका साथ मानेका छौं । यो निर्णयमाथि हामी पुनरावलोकनमा गएका छौं ।ओलीको कदम असंवैधानिक र अलोकतान्त्रिक भनेर सडकमा रहेका साथीहरूबाटै हत्तपत्ति समर्थन फिर्ता नलिनू है भनेर ममाथि जबर्जस्ती दबाब छ । नैतिक र राजनीतिक रूपले म अब धेरै दिन पर्खिन सक्दिनँ । मैले जुन सरकारलाई प्रतिगामी भनेको छु, त्यो सरकारलाई समर्थन गर्न सक्दिनँ, चाहे राजनीति जतासुकै जाओस् । मैले मेरो राजनीति र नैतिकतालाई बचाउनुपर्छ । म केही दिनभित्रै त्यो प्रक्रिया अगाडि बढाउँछु । अविश्वासको प्रस्ताव र समर्थन फिर्ता लिने प्रक्रिया विपक्षी राजनीतिक दलहरूसँगै होस् भनेर मात्रै मैले राजनीतिक समर्थनलाई केही दिन रोकेको हो ।

000

‘खुट्टा कमाएर भाग्नुपर्ने बेला भइसकेको छैन’

प्रश्न : प्रतिनिधिसभा पुनःस्थापना भएको २४ घण्टाभित्रै राजनीतिले नयाँ बाटो लिन्छ भन्ने हामी सबैलाई लागेको थियो । तर एक महिना बित्दा पनि केही भएन । किन यस्तो भइरहेको छ ? मुलुकले गति लिएको छैन । किन ? हामी विस्मयमा छौं, कुन नैतिकताका आधारमा प्रधानमन्त्री ओलीलाई समर्थन जारी छ ?

नेपाल : दुःखका साथ भन्नुपर्छ, अहिलेका हाम्रो पार्टी अध्यक्ष केपी शर्मा ओलीबाट जुन प्रतिगमनकारी कदम चालियो, त्यसविरुद्ध तपाईंहरू संघर्षको मैदानमा हुनुहुन्छ । आज म बडो अप्ठ्यारो महसुस गर्दै छु, त्यही पार्टीमा मलाई सर्वोच्च अदालतले घोक्र्याएर पठाइदिएको छ । सर्वोच्च अदालतले बढो विचित्रको फैसला गरेको छ । दुइटा पार्टी स्वतन्त्रताका साथ निर्णय गरेर एकताबद्ध भए । निर्वाचन आयोगले दर्ता प्रमाणपत्र पनि दियो । नेपाल राजपत्रमा प्रकाशित पनि भयो । नेपाल कम्युनिस्ट पार्टी (ने क पा) बन्यो । त्यसपछि उपनिर्वाचनहरू भए । कैयौं राजनीतिक गतिविधि भए । त्यसपछि सर्वोच्चले भन्यो– त्यो बेला गरिएको एकता मान्दैनौं । कस्तो विचित्र ! यो त दुइटाले विवाह गरे, बच्चा जन्माए, त्यसपछि बच्चा पनि मान्दिनँ, बिहे पनि मान्दिनँ भनेजस्तै भयो । सर्वोच्चको फैसला छ, पुरानो ठाउँमा फर्क । हामी पुरानो ठाउँमा फर्किन खोजिरहेका छौं ।

तर विडम्बना, यहाँ भन्न पनि गाह्रो छ । पार्टीभित्रको कुरा डबलीमा आएर भन्यो भन्ने आरोप लाग्ला । कुन दिन मलाई त्यहाँबाट घोक्र्याएर निकाल्लान् भन्ने छ । तर त्यस्ता कुराबाट म डराउने र तर्सिने मान्छे हैन । आन्दोलन र पार्टीको बीजारोपण गर्ने मान्छे म पनि हुँ । मलाई बडो गाह्रो छ । पार्टीभित्रका कुरा किन भनेको भन्ने पर्ला । पार्टीभित्रै ती कुरा भने हुन्छ नि भन्ने पनि आउँला । तर पार्टीमा त्यो ढोका बन्द गरिएको छ । सर्वोच्चले भन्यो– २०७५ जेठ ३ को पार्टी एकीकरणभन्दा अगाडिको अवस्थामा फर्क ।

हामी भनिरहेका छौं– २०७५ जेठ २ गतेको अवस्थामा पार्टीलाई फर्काऔं । तर प्रधानमन्त्री ओलीले बालुवाटारमा गोप्य भेला डाकेर महाधिवेशनमा उहाँलाई समर्थन नगरेका सबैलाई बाइकट गर्नुभयो । एकै दिनमा २ वटा विशेष बैठक डाक्नुभयो । अब सरकारबाट हटिदिए हुन्थ्यो भन्ने पनि होला । तर राजनीति सरल रेखामा अगाडि बढ्दैन । सोचेजस्तो हिसाब गरेर पनि हुँदैन । यहाँ अनेक दाउपेच भइरहेका छन् । गोयबल्स शैलीको प्रयोग भइरहेको छ । यी सबै कुरा ध्यानमा राखेर अगाडि बढ्नुपर्छ ।

प्रश्न : विधिविधानको आफ्नो ठाउँमा महत्त्व छ । तर अब पार्टीको विधिविधानले मात्रै पनि निकासमा पुगिँदैन होला । कठोर राजनीतिक निर्णयका निम्ति तयार हुनुहुन्छ कि हुनुहुन्न ?

नेपाल : मैले त हिजै संसदीय दलको बालुवाटारमा बोलाइएको बैठकमा जान्नँ भनिदिएँ । स्पष्टीकरणको जवाफमा प्रतिस्पष्टीकरण दिइसकेँ । सबै चुनौती सामना गर्न तयार छु । पार्टी आन्दोलनबाट खुट्टा कमाएर भाग्नुपर्ने बेला भइसकेको छैन ।

प्रश्न : तपाईंहरूको गठबन्धनले अघिल्लो चुनावमा ५२ प्रतिशत मत ल्याएको थियो । अहिलेको परिस्थितिमा नेपालमा कम्युनिस्ट पार्टीको भविष्य के छ ?

नेपाल : कम्युनिस्ट पार्टी लोकतान्त्रिक मूल्य र मान्यताअनुसार अघि बढ्छ । कसैले अधिनायकवादी शैली लागू गर्छ भने त्यो मान्य हुँदैन । पार्टीभित्र पार्टी विधान पालना गर्ने प्रवृत्ति मूलीबाटै हराउँदै गएको छ । हामी त्यसको उपचार खोजिरहेका छौं । समय विचार नगरी चल्दा परिणाम प्राप्त हुँदैन । मौकामा हामी अगाडि बढ्छौं ।

प्रश्न : ओलीलाई संसद्ले नै हटाएको कहिले देख्न सक्छौं ?

नेपाल : अहिले नै त्यो भन्ने बेला भइसकेको छैन ।

प्रश्न : आवश्यक पर्दा संसद्मा फ्लोर क्रस गर्नुहुन्छ कि हुन्न ?

नेपाल : यस्तो कुरा यहाँ सोधेर मलाई अप्ठ्यारोमा नर्पानुस् न ।

000

‘हामी न्यायको खोजीमा छौं’

प्रश्न : जारी राजनीतिक गतिरोधको निकास खोज्न जसपाले के गर्छ ?

ठाकुर : अहिलेको राजनीतिक परिस्थिति नेकपाभित्रको विग्रहले आएको हो । उहाँहरूको लडाइँमा हामीले के गर्ने ? यो मेरो प्रश्न हो । यसको समाधान उहाँहरूले नै गर्नुपर्छ । यसअघि पनि ओलीबाहेक सबै प्रधानमन्त्रीसँग हामीले लिखित सम्झौता गरेका थियौं । मधेस आन्दोलन र थरूहट आन्दोलनका कारण जेलमा परेकाहरू रिहा गर्ने, मुद्दा फिर्ता लिने र त्यसबापत उहाँहरूलाई सरकार बनाउन समर्थन गर्ने कुरा भएको थियो । त्यसबारे अहिले केही भएको छैन, न लिखित सहमति नै भएको छ ।

प्रधानमन्त्रीले हाम्रो माग पूरा गर्छु त भन्नुभयो । तर हामीले गरेर देखाइदिनुस्, त्यसपछि हामीले गर्नुपर्ने हो गर्छौं भनेका छौं । हामी सबै आन्दोलनबाटै राजनीतिमा आएका हौं । सबै गंगा नुहाएझैं गरेर पवित्र भए तर अपवित्र त हामी थारू र मधेसी मात्रै भएका छौं । हाम्रो मुद्दाको कुनै सुनवाइ छैन । हाम्रो कारणले न केही बनेको छ न केही बिग्रेको छ । हाम्रा सांसद जेलमा छन्, कार्यकर्ता र नेतामाथि मुद्दा छ । हामी त न्यायको खोजीमा छौं । त्यसपछि हाम्रो समर्थन र विरोधको कुरा आउँछ ।

प्रश्न : विश्वासको मत लिनुपर्ने अवस्थामा प्रधानमन्त्री पुगे भने तपाईंहरू के गर्नुहुन्छ ?

ठाकुर : हामी आफ्नै मुद्दामा अडिग छौं । अरू कुरामा पछि विचार गर्छौं । थारू र मधेसी भएकाले हामीले पीडा भोग्नुपरेको छ भन्ने हाम्रो बुझाइ छ । कम्युनिस्ट पार्टीभित्रको स्वार्थको लडाइँमा हामीलाई किन तान्नुहुन्छ ?

प्रश्न : नयाँ सरकारका लागि जसपा, कांग्रेस र माओवादी केन्द्र नमिली बहुमत पुग्दैन । त्यसैले राजनीतिको हलो तीनवटामध्ये जसले अड्काए पनि हुन्छ । यो हलोलाई अगाडि बढाउने जिम्मेवारी संसद्मा प्रतिनिधित्व भएको दलको हिसाबले जसपाको पनि हुन्छ नि ?

ठाकुर : हो, देशमा जब संकट आउँछ, त्यसपछि हाम्रो जरुरत पर्छ । अरू बेला हाम्रो जरुरत पर्दैन ।

000

‘अविश्वासको प्रस्ताव ल्याए पक्षमा मतदान’

प्रश्न : तपाईंहरूले यो विषयलाई संसद्मा प्रवेश गराएर किन निकास निकाल्नु भएको छैन ?

रिजाल : अरूले विश्वासको मत प्राप्त गर्न पनि नसक्ने र नयाँ सरकार बन्न नसक्ने अवस्थामा राजनीति जाओस् भन्ने प्रधानमन्त्रीको चाहना छ भन्ने लाग्छ । यतिबेला उहाँसँग राजनीतिक रूपमा बहुमत भए पनि प्राविधिक रूपमा बहुमत छैन । यही अवस्थाको फाइदा लिन उहाँ सरकारमा बस्नुभएको छ । राजनीतिक निर्णय गर्न समय आयो भने कांग्रेसले प्रस्ट अडान लिन्छ । जसले अविश्वासको प्रस्ताव ल्याए पनि हामी त्यसको पक्षमा मतदान गर्छौं । हामीले अहिलेसम्म पनि प्रधानमन्त्रीलाई विश्वासको मत दिएका छैनौं ।

प्रकाशित : चैत्र १५, २०७७ ०७:११
प्रतिक्रिया
पठाउनुहोस्

अर्काको नाममा बैंक खाता खोलेर ठगी

नेपालबाहिर रहेकाको कागजात प्रयोग गरेर खाता खोल्ने र रकम एटीएमबाट झिक्ने गरेको गिरोहबाट ठगिएकाहरु न्याय माग्दै
जनकराज सापकोटा

काठमाडौँ — नेपाल प्रहरी काठमाडौं उपत्यका अपराध अनुसन्धान टोलीले फागुनको अन्तिम साता चितवन स्थायी ठेगाना भएका सफल गुरुङको खोजी सुरु गर्‍यो । प्रहरीको अनुसन्धानले उनी वैदेशिक रोजगारीमा साइप्रसमा रहेको पत्तो मात्रै लाएन, उनको परिवारका सदस्यहरूको सम्पर्कमा पनि पुग्यो ।

एक ठगी घटनाका केही पीडितले गुरुङको नेपाली बैंक खातामा रकम जम्मा गर्ने गरेको देखिएपछि प्रहरीले खोजी गरेको थियो । तर साइप्रसमा रहेका उनी प्रहरीको सम्पर्कमा आएपछि खुल्यो, अरू कसैले उनको नाममा बैंक खाता खोलेर ठगी धन्दा चलाएको रहेछ ।

प्रहरीका अनुसार वैदेशिक रोजगारीमा जाने प्रक्रिया सिलसिलामा गुरुङले एक कन्सल्टेन्सीमा नागरिकतालगायत डकुमेन्टको फोटोकपी बुझाएका थिए । पछि अर्कै कन्सल्टेन्सीबाट साइप्रस उडे । ठगको गिरोहले उनको नागरिकताको दुरुपयोग गर्दै बैंक खाता खोलेछ । प्रहरी अनुसन्धानले कोरोना संक्रमण तीव्र भएका बेला उक्त गिरोहका सदस्यले मास्क लगाएर बैंकमा गई सजिलै खाता खोलेको देखिन्छ ।

यसरी खोलिएको खातामा गिरोहले वैदेशिक रोजगारीमा पठाइदिने भन्दै दर्जनौंलाई पैसा जम्मा गर्न लगाउने, अनि खातामा जम्मा हुनेबित्तिकै निकाल्ने गरेको देखिन्छ । प्रहरीले रकम निकाल्न प्रयोग भएका एटीएम बुथबाट सीसीटीभी फुटेज ल्याएर पनि हेरेको थियो । जसमा ठग समूहले समीर तामाङ नामका कर्मचारीलाई रकम जम्मा हुनासाथ एटीएमबाट पैसा निकाल्न पठाएको देखिन्छ । चलाख समीरले एटीएमबाट रकम निकाल्दा परिचय खुल्ने डरले प्रत्येक पटक मास्क र हेल्मेट लगाएको देखियो ।

फागुनको २३ गते प्रहरीले यही ठगी घटनामा संलग्न रहेको भन्दै आफूलाई सरोज अधिकारी पनि भनेर चिनाउने शिशिर बस्नेतलाई पक्राउ गरेको छ भने उनका दाइ माइकल बस्नेत र सहयोगी पदम आचार्य भनिने सुमितकुमार उपाध्याय र अर्का एक जनाको खोजी गरिरहेको छ । शिशिर पक्राउ परेपछिको प्रारम्भिक बयान र प्राप्त प्रमाणका अनुसन्धानबाट ठगीको सिलसिलाबारे धेरै तथ्य खुलेको प्रहरीले जनाएको छ । आफ्नो परिचय खुल्ने कुनै पनि कागजात उपयोग नगरी बैंक खातादेखि कम्पनीसम्म खोलेर यो समूहले डेढ दर्जनभन्दा धेरैबाट तीन करोडभन्दा बढी ठगी गरेको प्रारम्भिक अनुसन्धानमा भेटिएको छ ।

यो गिरोहले ललितपुरको कुमारीपाटीमा हाई सक्सेस म्यानेजमेन्ट ग्रुप प्रालि नामक कम्पनी खोलेको देखिए पनि उक्त कम्पनी न त कम्पनी रजिस्ट्रारमा न त अन्य कुनै पनि सरकारी संयन्त्रमा दर्ता भएको देखियो । अनुसन्धानमा संलग्न एक प्रहरीले भने, ‘आफ्नो परिचय सबै लुकाएर फर्जी कागजातका आधारमा कम्पनी खोल्ने, अर्काको कागजातमा बैंक खाता खोल्ने र ठग्ने गरेको देखियो ।’

घरमा रङ लगाउने काम गर्ने धुलिखेलका सुमन लामाको दम्पती पनि यही ठग गिरोहको पासोमा परे । पोर्चुगल पुर्‍याइदिने र मासिक ६ सय ५० युरो तलब हुने काम दिलाइने आश्वासनमा परेर ४ महिनाअघि ७ लाख रुपैयाँ सफल गुरुङको खातामा जम्मा गरिदिएका थिए । सुमनले भने, ‘काम हुन्छ भनेपछि मैले उनीहरूले दिएको बैंक खातामा रकम जम्मा गरिदिएँ । पछि पो थाहा भयो ठगीधन्दाको समूहले ठगेछ ।’

सुमनका अनुसार ठगिनेमा उनीसहित २० जनाभन्दा धेरै उनकै सम्पर्कमा छन् । उनले भने, ‘तीन/चार लाखदेखि आठ/दस लाखभन्दा धेरै पैसा फसेका पनि छन् ।’ नुवाकोट चौघडाका अनिल राईलाई पनि हंगेरी पठाएर जागिर मिलाइदिने सपना देखाएर यो समूहले साढे तीन लाख ठग्यो । गरगहना बनाउने काम गर्ने अनिलले एउटा फेसबुक पेजमा वैदेशिक रोजगारीको विज्ञापन देखेपछि यो समूहको सम्पर्कमा पुगेका थिए । उनले विदेश जाने आशामा पटकपटक गरेर साढे तीन लाख रुपैयाँ बुझाए । पैसा बुझाएपछि पनि काम नभएपछि उनले शंका गरेर थप सोधीखोजी सुरु गरे । ‘त्यसपछि पो थाहा भयो म त ठगीको जालोमा परेछु,’ उनले भने, ‘यो समूहले फरकफरक परिचय बताए पनि ठग्नेहरूको संख्या कम्तीमा दुई दर्जनभन्दा धेरै छ ।’

अपराध अनुसन्धान कार्यालयले प्रारम्भिक अनुसन्धान सुरु गरेर ठगीको यो मुद्दामा थप अनुसन्धान गर्न फाइल प्रहरी परिसर ललितपुरलाई बुझाइसकेको छ । परिसर ललितपुरका एसएसपी किरण वज्राचार्यका अनुसार यो समूहले नटवरलालकै शैलीमा शृंखलाबद्ध ठगी गरेको देखिन्छ । परिसर ललितपुरको सम्पर्कमा मात्रै यो समूहबाट पीडित हुने करिब १५ जना आइसकेका छन् । उनले भनिन्, ‘फर्जी कागजातका आधारमा ठग्दै हिँड्ने गरेको देखिन्छ ।’ प्रहरीका अनुसार शिशिरसहितको समूह यसअघि पनि यस्तै शैलीको वैदेशिक रोजगार ठगीमा पक्राउ परेर थुनामा बसेको थियो ।

अनुसन्धानमा संलग्न एक प्रहरीका अनुसार पक्राउ परेका शिशिरले निसानको गाडी चढ्ने गरेको र किस्ता तिर्न नसकेपछि उक्त गाडी बिक्रेताले तानेको बताए । उनले भने, ‘ठगी गर्ने र मोजमस्तीमा पैसा उडाउने गरेको देखियो ।’ प्रहरीले सफल गुरुङको नाममा भएका कारोबारको सबै विवरणहरू झिकाएर अध्ययन गरेको छ । प्रहरीका अनुसार ठगी मुद्दामा थुनाबाट निस्केपछि गत साउन २९ गतेबाट सफलको खाता सक्रिय पारेर ठगी गरेको देखिन्छ ।

यही समूहको ठगी जालोमा एक वर्षअघि परेका नवीन रम्तेल र उनका साथीहरूको दुःख झन् बेग्लै छ । नवीन दक्षिण कोरिया जान भनेर सुटकेस गुडाउँदै त्रिभुवन अन्तर्राष्ट्रिय विमानस्थल नै पुगेका थिए । उनलाई बिदाइ गर्न श्रीमती र सालोसहित अन्य तीन जना साथी पनि विमानस्थल पुगेका थिए । उनीजस्तै अन्य दुई साथी पनि घरबाट बिदाबारी भइवरी विमानस्थल पुगेका थिए । कृषि फार्ममा काम गरेर मासिक २ देखि साढे दुई लाखसम्म कमाइ हुने सपना देखेर विमानस्थल पुगेका उनीहरू तीनै जना त्यतिबेला झस्किए, जब बोर्डिङ पास निकाल्ने बेला सम्बन्धित विमान कम्पनीको डेस्कका प्रतिनिधिले बताए, ‘यो टिकट नै नक्कली छ ।’ एकैछिनको सोधखोजपछि थाहा भयो, उनीहरूको दक्षिण कोरियाको भिसा पनि नक्कली पो रहेछ ।

एक खाद्य उत्पादक कम्पनीको ललितपुर जिल्लामा वितरण प्रमुखको हैसियतमा नवीनले कोरिया जाने भनेरै काम छोडीवरी एजेन्टलाई ९ लाख ५५ हजार बुझाइसकेका थिए । अन्य दुई साथीले पनि त्यत्तिकै हाराहारीमा रकम बुझाएका थिए । २०७६ वैशाखको त्यो घटनापछि उनीहरू तीनै जनाको होसहवास उडेजस्तो भयो । नवीनसहित पैसा फसाउने हरिकृष्ण थापा र सोनी श्रेष्ठलाई कोरिया पठाइदिने प्रक्रिया तिरुपती भिसा सर्भिसेस नामक कम्पनी खोलेर बसेका माइकल बस्नेतले चालिदिएका थिए ।

तीनै जनाले प्रहरी परिसर काठमाडौंमा उजुरी गरेपछि माइकल पक्राउ परे । प्रहरीका अनुसार झन्डै ११ महिना थुनामा बसेर उनी धरौटी बुझाएर छुटेका थिए । ठगी मुद्दामा छुटेका माइकलसहित उनका भाइविरुद्ध त्यतिबेला अर्को किर्ते मुद्दा पनि दर्ता भएको देखिन्छ । प्रहरीका अनुसार माइकलले कीर्तिपुरका बाबुराम खरेलको फोटो र नागरिकता दुरुपयोग गरेर नक्कली कम्पनी खडा गरेका थिए ।

प्रहरी स्रोतका अनुसार किर्ते मुद्दामा पनि उनीहरू धरौटी बुझाएर उम्किन सफल भए । केही समय सुन्धारास्थित केन्द्रीय कारागार र केही समय नख्खु कारागारमा बसेर उम्केपछि उनीहरूले फेरि ठगी धन्दा थाल्न ललितपुरको कुमारीपाटीमा नयाँ अफिस खोले । पहिले जस्तै नेपालमा नभएका सफल गुरुङको कागजात दुरुपयोग गरेर बैंक खाता खोले । पछिल्लो ठगी पासोमा भने धुलिखेलका सुमन लामा जस्तै दर्जनभन्दा धेरै युवाहरू परे ।

प्रहरीका अनुसार पछिल्लो घटनामा जस्तै यसअघिको ठगी घटनामा पनि यो समूहले आफूले सोझै पैसा नबुझ्ने गरेको देखिन्छ । जस्तो कि माइकलले भनेअनुसार नवीनले राजुप्रसाद गौतमको खातामा एक लाख ४० हजार जम्मा गरिदिएका थिए भने उनका २ साथीहरूले माइकलले भनेअनुसार विष्णुप्रसाद पाण्डेको बैंक खातामा २ लाख ८० हजार डिपोजिट गरिदिएका थिए ।

पछिल्लो घटनामा माइकलका भाइ शिशिरलाई फागुन २३ गते पक्राउ गरी प्रहरीले म्याद थप्दै प्रहरी परिसर ललितपुरको थुनामा राखेको छ । अपराध अनुसन्धान कार्यालयका एसपी कृष्णराज कोइरालाले पछिल्ला दिनहरूमा फर्जी कागजातहरू खडा गरेर बैंक खाता खोल्ने वा ठगी काममा सोझासिधा मानिसको बैंक खाता प्रयोग गर्ने प्रवृत्ति देखिन्छ । उनले भने, ‘कोहीकोही त एकाध हजारको लोभमा आफ्नो बैंक खाता अरूलाई प्रयोग गर्न दिएको देखिन्छ । कसैले भने सानोतिनो प्रलोभनमा परेर खातामा जम्मा भएको रकम अरूलाई निकालेर दिने काम गरेको देखिन्छ ।’

राष्ट्र बैंकका सहायक प्रवक्ता नारायणप्रसाद पोखरेलले बैंक खाताको दुरुपयोग हुन नदिन प्रयोगकर्ता नै आफैं सचेत हुनुपर्ने बताए । उनले केही पैसाको लोभमा आफ्नो खाता कसैलाई प्रयोग गर्न दिने वा स्रोत नखुलेको रकम जम्मा गर्न लगाउने काम गैरकानुनी हुने बताए । उनले बैंक खाता खोल्नका लागि आवश्यक पर्ने नागरिकताको दुरुपयोग हुन सक्ने भन्दै आफ्नो नागरिकताको प्रतिलिपि जोकसैलाई बाँड्न नहुने बताए । उनले कालोधन वा ठगीका घटनामा बैंक खाता दुरुपयोग हुने खतरा औंल्याउँदै भने, ‘आफ्नो खाताको अनधिकृत प्रयोग गर्न नदिने वा स्रोत नखुलेको रकम जम्मा भएका बैंकलाई जानकारी गराउनुपर्छ ।’

प्रकाशित : चैत्र १४, २०७७ १०:०५
पूरा पढ्नुहोस्
प्रतिक्रिया
पठाउनुहोस्
×