सरकारले तीन वर्षमा गरेका काम अभूतपूर्व र असाधारण : प्रधानमन्त्री ओली
काठमाडौँ — प्रधानमन्त्री केपी शर्मा ओलीले सरकारले तीन वर्षमा गरेका काम अभूतपूर्व र असाधारण भएको बताएका छन् । शुक्रबार बालुवाटारमा आयोजित उद्योगी व्यवसायीसँगको छलफलमा उनले छोटो अवधिमा पूर्वाधार तथा विकासमा धेरै काम भएकाे बताएका हुन् ।
'हामी सम्पूर्ण रुपमा छोटो अवधिमा देशको आर्थिक परिचय बदल्न चाहन्छौं । छोटो अवधिमा पूर्वाधार विकासका काममा थुप्रै काम भएका छन्,' उनले भने, 'हामी नयाँ एरामा छौं । तीन वर्षमा गरेका काम अभूतपूर्व र असाधरण छन् । पूर्वाधार विकासका पक्षमा, सडक निर्माणमा धेरै काम भएका छन् ।'
त्यस्तै उनले नेपाल आधुनिकतामा प्रवेश गरेको बताए । 'आधुनिक नेपालको नारा मैले दिएको छु– कि इतिहास झल्कने, कि आधुनिकता टल्कने । हामी गौरवपूर्ण इतिहासलाई आत्मसात गर्दै आधुनिकताका काम गर्छाैं ।'
कोभिड कहर नभएको भए पर्यटनमा प्रशस्त काम भइसक्ने उनले बताए । 'होटल बन्द हुँदा र एयरपोर्टमा झार पलाएपछि, सबै क्षेत्र बन्द भएपछि पनि सर्भाइभ गरेर दुनियाँको तुलनामा धेरै क्षति हुन नदिइ जोगाएका छौं ।'
प्रकाशित : चैत्र ६, २०७७ १९:४२