परीक्षा नियन्त्रक त्रिपालमुनि- समाचार - कान्तिपुर समाचार
कान्तिपुर वेबसाईट
AdvertisementAdvertisement

परीक्षा नियन्त्रक त्रिपालमुनि

घर पायक परीक्षा केन्द्रको माग गर्दै विभिन्न विद्यार्थी संगठनले मूल गेटमा ताला लगाए
विनोद भण्डारी

विराटनगर — पूर्वाञ्चल विश्वविद्यालय परीक्षा नियन्त्रण कार्यालयको मूल गेटमा तीनवटा ताला छन् । नजिकै त्रिपाल टाँगिएको छ । कार्यालय समयमा त्रिपालमुनि परीक्षा नियन्त्रक सूर्यप्रसाद संग्रौला हुन्छन् । उनले यसरी काम गरेको एक साता भएको छ ।

त्रिपालमुनि बसेर कार्यालयको काम गर्दै पूर्वाञ्चल विश्वविद्यालयका परीक्षा नियन्त्रण सूर्यप्रसाद संग्रौला । तस्बिरः विनोद/कान्तिपुर


कार्यालयको मूल गेटमा विभिन्न विद्यार्थी संगठनले घर पायक परीक्षा केन्द्रको माग गर्दै ताला लगाएका हुन् । संग्रौलाले उपकुलपति यादवराज कोइरालाको गैरजिम्मेवार कामका कारण यो ताला लागेको दाबी गरे । परीक्षा नियन्त्रण कार्यालयको परीक्षा व्यवस्थापन समितिले व्यवस्थापन संकायको दोस्रो, चौथो, छैटौं र आठौं सेमेस्टरको वार्षिक परीक्षा फागुन २३, मेडिकलको २६ र विज्ञान तथा प्रविधि तथा इन्जिनियरिङ संकायको चैत ३ देखि कोरोनाकाल पहिलाको अवस्थामा परीक्षा लिने गरी कार्यक्रम प्रकाशन गरेको थियो । ‘तर उपकुलपति कोइरालाले परीक्षा नियन्त्रक कार्यालय र परीक्षा व्यवस्थापन समितिसँग समन्वय नै नगरी फागुन २५ गते कार्यकारी परिषद्मार्फत परीक्षा स्थगन गरेपछि समस्या सुरु भयो,’ नियन्त्रक संग्रौलाले भने ।

कोरोना महामारीका कारण गत वर्ष ती संकायका पहिलो, तेस्रो, पाँचौं र सातौं सेमिस्टरको परीक्षा लिइएको थियो । अहिले दोस्रो, चौथो, छैटौं र आठौं सेमिस्टरको परीक्षा भौतिक उपस्थितिमै लिने गरी कार्यक्रम प्रकाशन गरेको दुई सातासम्म कुनै पनि विद्यार्थी संगठनले विरोध जनाएका थिएनन् । नियन्त्रक संग्रौलाले भने आफू १० दिन बिदामा बसेका बेला उपकुलपति कोइरालाले विद्यार्थी संगठनलाई उकासेर परीक्षा स्थगन गर्नेदेखि कार्यालयमा तालाबन्दी गराउनेसम्मको काम गरेपछि समस्या जटिल बनेको दाबी गरे । उनका अनुसार फागुन २३ मा सुरु भएको व्यवस्थापन र २६ मा सुरु भएको मेडिकल संकायको परीक्षा उपकुलपतिले स्थगन गरे पनि जारी छ तर चैत ३ देखि हुने भनिएको परीक्षा स्थगन हुँदा इन्जिनियरिङका १५ हजार र विज्ञान तथा प्रविधि संकायका तीन हजार विद्यार्थी परीक्षा दिनवाट वञ्चित भएका छन् ।

सबै संकायका डिनसँगको परामर्शपछि परीक्षा कार्यक्रम सार्वजनिक गरेर आफू १० दिन बिदामा बसेका बेला उपकुलपति कोइरालाले अनेरास्ववियुको एक गुट र नेपाल विद्यार्थी संघमा आबद्ध विद्यार्थीसँग बसेर परीक्षा सार्ने निधो गरेको आरोप संग्रौलाको छ । उनका अनुसार फागुन २५ गते कार्यकारी परिषद्मार्फत परीक्षा स्थगन गरिएपछि भोलिपल्ट कोइरालाले सहपरीक्षा नियन्त्रक अजय साहलाई जबर्जस्ती परीक्षा स्थगन भएको सूचना सार्वजनिक गर्न लगाए । उपकुलपति कोइरालाले फागुन २८ गते अर्को परीक्षा तालिका प्रकाशन गर्न दबाब दिए । परीक्षा स्थगितको सूचना प्रकाशन गरेलगत्तै जनता समाजवादी दल निकट विद्यार्थी र अनेरास्ववियु विश्वविद्यालय राष्ट्रिय समितिले घरपायक परीक्षा केन्द्रको माग मूल गेटमा ताला लगाए ।

संग्रौलाले परीक्षा नियन्त्रक कार्यालय आफैंमा स्वतन्त्र रहेको बताएका छन् । विगतमा यो विश्वविद्यालयको परीक्षा तालिका नियमित र व्यवस्थित थिएन । पछिल्लो समय नियमित छ ।

उपकुलपति कोइरालाले इन्जिनियरिङ र विज्ञान संकायका क्याम्पस प्रमुख र विद्यार्थीले कोर्स पूरा हुन नसकेको भन्दै केही समय परीक्षा स्थगन गर्न आग्रह गरेपछि समन्वयबाटै निर्णय गरेको दाबी गरे । परीक्षामा समस्या आइपरेपछि आफू जोगिन माथिल्लो निकायलाई दोष देखाउन खोजिएको टिप्पणी उनले गरे ।

सेवा आयोग दुई वर्षदेखि खाली

पूर्वाञ्चल विश्वविद्यालय सेवा आयोगमा अध्यक्ष पद रिक्त भएको दुई वर्ष भएको छ । सेवा आयोग अध्यक्ष रिक्त हुँदा विश्वविद्यालयमा कर्मचारी र शिक्षक नियुक्ति हुन नसकेर समस्या भएको उपकुलपति कोइरालाले बताए । उनका अनुसार करिब सय कर्मचारी र त्यति नै मात्रामा शिक्षक नियुक्ति गर्नुपर्ने अवस्था छ ।

यो विश्वविद्यालयका तत्कालीन उपकुलपति घनश्यामलाल दास र सेवा आयोगका अध्यक्ष बदप्रसाद्र श्रेष्ठको साता अन्तरमा कार्यकाल सकिएको थियो । त्यसपछि सरकारले सेवा आयोग अध्यक्ष अझै नियुक्ति गरेको छैन ।

विश्वविद्यालय रजिस्ट्रार र सहरजिस्ट्रारविहीन छ । रजिस्ट्रार नहुँदा विश्वविद्यालयको प्रशासनिक काम प्रभावित भएको उपकुलपति कोइरालाले बताए । तत्कालीन रजिस्ट्रार प्रमिला थापाको दुई महिनाअघि र सहरजिस्ट्रार राजेश झाको एक महिनाअघि कार्यकाल सकिएको थियो ।

प्रकाशित : चैत्र ५, २०७७ ०७:४५
प्रतिक्रिया
पठाउनुहोस्

जसले धान मासेर साल हुर्काए

अढाई दशकदेखि वृक्षरोपण अभियानमा ‘सालबाजे’
विनोद भण्डारी

विराटनगर — मोरङको सुनबर्सी–६ टुपियाखाडीका नीलबहादुर चौहानलाई नामथरले चिन्ने थोरै मात्र छन् । उनी त्यसै ‘सालबाजे’ उपनामले परिचित भएका होइनन् । अढाई दशकदेखि आफ्नो निजी जग्गामा सालका रूख हुर्काउने काममा लागेका चौहानलाई जिल्ला वन कार्यालय मोरङले ‘सालबाजे’ को उपनाम दिएको हो ।

मोरङको सुनबर्सी–६ टुपियाखाडीका नीलबहादुर चौहान ‘सालबाजे’ ले पाँच बिघा निजी जग्गामा लगाएको सालको जंगल । तस्बिर : विनोद/कान्तिपुर

राष्ट्रिय वनमा समेत सखुवा (साल) का रूख मासिँदै गएको अवस्थामा चौहान अढाई दशकदेखि निजी जमिनमा सखुवा हुर्काउन खटिएका कारण यस्तो उपनाम दिइएको डिभिजन वन कार्यालय मोरङका सहायक वन अधिकृत नरेन्द्र गुरागाईं बताउँछन् ।

भोजपुरको कुलुङबाट २०३२ सालमा बसाइँ सरी आएका चौहानले २०५३ सालदेखि सुनबर्सी–६ टुपियाखाडीको निजी जमिनमा सखुवाका बिरुवा रोप्न थालेका हुन् । सुरुमा उनले १० कट्ठा धानखेत मासेर सखुवाका एक सय बिरुवा रोपे । त्यतिबेला छिमेकी र आफन्तले चौहानलाई ‘पागल’को संज्ञा दिएका थिए । उनको साल खेती अहिले पाँच बिघामा फैलिएको छ । ‘पहिला पागल भन्नेहरू अहिले मेरो जंगल हेर्न आउँछन् । तीमध्येका केहीले धान खेती छाडेर सखुवा रोप्न थालेका छन्,’ उनले भने, ‘जंगल र सखुवाको महत्त्व छिमेकीले बल्ल बुझ्दै छन् ।’

उनको कामलाई हेरेर चौहानलाई वन विभागबाट ५० हजार राशिको राष्ट्रिय पुरस्कारसमेत दिइएको छ । सालका बोट हुर्काउन पनि उनले धेरै संघर्ष गर्नुपर्‍यो । सुरुमा एक सय बिरुवा रोप्दा एउटा मात्र राम्ररी हुर्किएको थियो । त्यसपछि उनले बर्सेनि बिरुवा रोप्दै गए । उनले रोपेकामध्ये १ सय ७० वटा सखुवाका बिरुवा हुर्किएका छन् । थप १ सय ३८ वटा बोट पनि हुर्किंदै छन् । ५ बिघा निजी वनमा पछिल्लो समय सखुवाबाहेक मसला, टिक, कदम, रुद्राक्ष, रक्तचन्दन, आँच, लिची र मलेसियन सखुवाका बिरुवा पनि छन् । सालबाजेको जंगलमा करोडौं मूल्य बराबरका साल र अन्य जातका रूख छन् । ‘एकै जातका सखुवा मात्र रोप्दा हुर्कन गाह्रो हुँदोरहेछ,’ चौहानले भने, ‘बहुजातका बिरुवा रोप्दा चाँडो सप्रिने विज्ञको सुझावका आधारमा अरू जातका पनि रोपेँ ।’ उनको जंगल निजी वनका नाममा दर्ता छ ।

भोजपुरको कुलुङमा हुँदा नै चौहानलाई बिरुवा रोप्ने रहर थियो । मधेस झरेपछि उनी भारतको जलपाइगुढी पुगे । त्यहाँको गरकट्टा र सालबन्दीमा सखुवाको निजी वन देखेपछि उनको रहरले थप हौसला बढायो । ‘सुरुमा त्यहीँको नर्सरीबाट बिरुवा ल्याएर रोप्न सुरु गरेको हुँ,’ उनले भने ।

प्रकाशित : फाल्गुन २०, २०७७ ०८:००
पूरा पढ्नुहोस्
प्रतिक्रिया
पठाउनुहोस्
×