राष्ट्रपति भण्डारीले लगाइन् कोरोना खोप- समाचार - कान्तिपुर समाचार
कान्तिपुर वेबसाईट
AdvertisementAdvertisement

राष्ट्रपति भण्डारीले लगाइन् कोरोना खोप

निर्धक्क भएर खोप लगाउन अपिल
कान्तिपुर संवाददाता

काठमाडौँ — राष्ट्रपति विद्यादेवी भण्डारीले कोरोना भाइरसविरुद्धको खोप लगाएकी छिन् । सोमबार महाराजगञ्जस्थित त्रिभुवन विश्वविद्यालय शिक्षण अस्पताल पुगी उनले खोप लगाएकी हुन् ।

खोप लगाएपछि सञ्चारकर्मीलाई संक्षिप्त प्रतिक्रिया दिँदै राष्ट्रपति भण्डारीले सबैलाई निर्धक्क भएर खोप लगाउन अपिल पनि गरिन् । नयाँ भएको हुनाले केही शंका हुनु स्वभाविक भ एपनि धेरै चरणको परीक्षण पछि मात्रै खोप आएकाले ढुक्क भएर खोप अभियानमा सहभागी हुन उनले आग्रह गरिन् । अग्रपक्तिमा रहेको, जोखिममा काम गर्ने र वृद्धवृद्धालाई लगाएपछि मात्रै लगाउने सोच आफ्नो हुँदा हुदै पनि देशबाहिर जानुपर्ने भएकाले खोप लगाउन आएको पनि उनले स्पष्ट पारिन् ।

राष्ट्रपति भण्डारीले भनिन्, ‘मचाहिँ मेरै उमेर समूह पर्खिएर बसेकी थिएँ । मलाई एउटा मित्रराष्ट्रको भ्रमण गर्नुपर्ने भयो । टार्न नसकिने पर्यो । मैले खोप नलगाईकन जाँदाखेरी मिश्रित प्रतिक्रिया आउने भएकाले । म हेरिरहेकी थिएँ । सबैले लगाइसकेपछि लगाउनुपर्ने भए पनि ठीकै छ भनेर बसेकी थिएँ ।

अग्रपंक्तिमा बसेका र जोखिममा भएकाहरुलाई नै पहिले गर्नुपर्छ । म त त्यसै पनि एकदम ठूलो सुरक्षामै छु । बाहिर जानुपर्ने भएको हुनाले मेरो प्रतिनिधिमण्डलमा सामेल हुन सक्ने सम्भावना भएका सदस्यहरुलाई पनि लगाउनुपर्यो । म दाजुभाइ दिदीबहिनीहरुलाई पूर्ण विश्वस्त भएर लगाउन अपिल गर्छु । निर्धक्क भएर लगाउँदा हुन्छ । नयाँ भएको हुनाले अलि अलि शंका हुनु स्वभाविकै हो । तर धेरै चरणको परीक्षण भएको हुनाले ढुक्क हुन अनुरोध गर्दछु ।’

राष्ट्रपति भण्डारीले नेपालमा अन्यत्रभन्दा कोभिडको असर न्यून परेको भन्दै त्यस किसिमको सफलता प्राप्त गर्न सकेकोमा त्यसको जस नेपाल सरकार, चिकित्सक, जनप्रतिनिधि, अग्रपंक्तिमा खटिने सबै भोलिन्टियर र सामाजिक संघ संस्थाहरुलाई दिनुपर्ने र मुक्तकण्ठले प्रशंसा गर्नुपर्ने बताइन् । राष्ट्रपति भण्डारी आगाम चैत ९ गते बंगलादेश भ्रमणमा जाँदैछिन् ।

प्रकाशित : चैत्र २, २०७७ १९:२८
प्रतिक्रिया
पठाउनुहोस्

सत्ता समीकरणबारे कुनै निर्णय भएको छैन : जसपा नेता राई

पार्टी समायोजनका बाँकी काम टुंग्याउन मंगलबार पुनः बैठक
कान्तिपुर संवाददाता

काठमाडौँ — जनता समाजवादी पार्टीका वरिष्ठ नेता अशोक राईले सोमबारको बैठकमा सत्तासमीकरणको विषयमा छलफल नभएको बताए । पार्टी कार्यालय बालकुमारीमा शीर्ष नेताको बैठक बसेको थियो ।

जसपा वरिष्ठ नेता अशोक राई फाइल तस्बिर

बैठकमा अध्यक्ष महन्थ ठाकुर, उपेन्द्र यादव र संघीय परिषद् अध्यक्ष बाबुराम भट्टराई तथा वरिष्ठ नेताहरु अशोक राई र राजेन्द्र महतो सहभागी थिए।

बैठकमा सत्ता समीकरणको विषयमा छलफल नभएर समायोजन हुन बाँकी पार्टीका कमिटीको बारेमा छलफल भएको वरिष्ठ नेता राईले बताए । ‘पाँच गतेको कार्यकारिणी समिति बैठकको तयारीको सिलसिलामा हामी बसेका थियौं । आज सत्तासमीकरणको विषयमा कुनै छलफल भएन । खासगरी पार्टीमा केन्द्रदेखि तल्लातहका कमिटीको समायोजनको काम वाँकी छ । त्यो टुंगाउनेबारे छलफल भयो । भोलि फेरि बैठक बसेर समायोजन गर्ने काम हुन्छ । र, पर्सि बस्ने कार्यकारिणी बैठकका लागि प्रस्ताव तयार हुन्छ,’ राईले भने । सत्तासमीकरणबारे केन्द्रीय कार्यकारिणी बैठकबाट नै निर्णय हुने उनको भनाइ छ । जसपाले चैत्र ५ गते केन्द्रीय कार्यकारिणी बैठक बोलाएको छ ।

सरकार गठनका लागि संसदमा जसपा निर्णायक बनेको छ । जसपाले आफ्ना माग र नयाँ सरकार गठनका विषयमा सत्तारुढ एमाले, प्रतिपक्षी कांग्रेस, माओवादी केन्द्रसँग छलफल गरेको थियो।

गत वैशाख ११ गते प्रधानमन्त्री केपी शर्मा ओलीले राजनीतिक दलसम्बन्धी अध्यादेश ल्याएसँगै तत्कालीन राष्ट्रिय जनता पार्टी (राजपा) नेपाल र समाजवादी पार्टीबीच एकीकरण भएर जसपा गठन भएको थियो । तर, पार्टी एकता भएको १० महिना बितिसक्दासमेत जसपा नेपालमा संगठन समायोजनका काम टुङ्गिन सकेको छैन ।

प्रकाशित : चैत्र २, २०७७ १९:१४
पूरा पढ्नुहोस्
प्रतिक्रिया
पठाउनुहोस्
×