लोकतन्त्रविरुद्धको विकृति हटाउन कांग्रेस नेतृत्वको सरकार : पौडेल - समाचार - कान्तिपुर समाचार
कान्तिपुर वेबसाईट
AdvertisementAdvertisement

लोकतन्त्रविरुद्धको विकृति हटाउन कांग्रेस नेतृत्वको सरकार : पौडेल 

प्रकाश बराल

बागलुङ — कांग्रेसका वरिष्ठ नेता रामचन्द्र पौडेलले राष्ट्रियता र लोकतन्त्रमाथिको विकृति अन्त्य गर्न कांग्रेस नेतृत्व आवश्यक भएको बताएका छन्  ।


नेपाल प्रेस युनियनले शनिबार बिहान बागलुङमा आयोजना गरेको पत्रकार सम्मेलनमा पौडेलले प्रधानमन्त्री केपी शर्मा ओलीले भित्र्याएको विकृतिमा अदालतले अर्को विकृति थपिदिएको टिप्पणी गरे । ‘अदालतको फैसला पनि अर्को विकृति हो,’ पौडेलले भने, ‘नैतिकता गुम्दा पनि राजीनामा नदिने केपीको काम अर्को विकृति हो ।’

सबै विकृति अन्त्य गर्ने र लोकतन्त्रको रक्षाका लागि कांग्रेस नेतृत्वमा जानुपर्ने आवश्यकता आएको पौडेलको भनाइ छ । ‘केपी ओलीले भित्र्याएको विकृतिमा अदालतले अर्को विकृति थपिदियो,’ पौडेलले भने, ‘माग्दै नमागेको विषयमा हात हालेर देशको राजनीतिक विषयमा थप जटिलता थपिएको छ ।’

देश डुब्न लाग्दा कम्युनिस्टले केही गरेनन् भनेर बस्नुभन्दा पनि कांग्रेसले नेतृत्व लिनु पर्ने पौडेलले बताए । ‘लामो समयसम्म कांग्रेस प्रतिपक्षमै बस्नुपर्छ भनेर सभापतिलाई रोकेको थिएँ, हिजोको बैठकमा जसरी पनि ओली हटाउनुपर्छ भनेर म्यान्डेट दिएका छौँ,’ पौडेलले भने, ‘विकृतिविरुद्ध कांग्रेसले टुलुटुलु हेरेर बस्न मिल्दैन ।’

देशभित्रका प्रतिक्रान्तिकारी र अन्तर्राष्ट्रिय षड्यन्त्रबाट ओलीलाई टिकाउने खेल भएपछि ओलीमुक्त सरकार चाहिएको उनको टिप्पणी थियो । ‘केपी ओली जतिदिन शासनमा बस्छन् त्यति देश बर्बादीमा जाँदैछ,’ पौडेलले भने, ‘राष्ट्रको भविष्य खतरामा परेकोले माओवादी र जसपा मिलेर ओली हटाउन काम सुरु भयो ।’

सकेसम्म कांग्रेसको नेतृत्व, नभए माओवादी वा जसपाकै नेतृत्व ल्याएर पनि ओली हटाउनुपर्ने पौडेलको भनाइ थियो ।

प्रकाशित : फाल्गुन २९, २०७७ ०९:५६
प्रतिक्रिया
पठाउनुहोस्

मिथिलाको महाकुम्भ मध्यमा परिक्रमा सुरु

सन्तोष सिंह

जनकपुर — मिथिलाको महाकुम्भ मानिएको १५ दिवसीय मध्यमा परिक्रमा शनिबारदेखि आरम्भ भएको छ । धनुषाको मिथिला बिहारी नगरपालिकाको कचुरीबाट मिथिला बिहारीको डोला परिक्रमा शनिबार यात्राका लागि प्रस्थान गरेपछि १५ दिने परिक्रमा विधिवत रुपमा आरम्भ भएको हो ।

मिथिला बिहारीको डोला अग्निकुण्डमा दिउँसो विश्राम गरेर किशोरजीको डोलासहित जनकपुरको हनुमाननगर पुग्ने छ । हनुमाननगरमा रात्रि विश्रामपछि मिथिला बिहारी र किशोरीजीको डोला आइतबार भारतको कल्याणेश्वरको लागि प्रस्थान गर्ने छ ।

जनकपुरको हनुमान नगरबाट बिहारको कल्याणेश्वर र गिरिजास्थान हुँदै महोत्तरीको मटिहानी, जलेश्वर, मडै, ध्रुवकुण्ड, कंचनवन हुँदै धनुषा जिल्लाको औरही आइपुग्ने छ । परिक्रमा यात्रीले खालीखुट्टा १५ दिने यात्रा तय गर्ने छन् । परिक्रमामा धनुषा, महोत्तरी, सिरहा, सर्लाहीसहित भारतका सीमावर्ती जिल्लाका श्रद्धालुहरु सामेल हुने गरेका छन् । फागु पुर्णिमाको दिन अन्तगृह परिक्रमा समाप्त भएपछि त्यसको भोलिपल्ट मात्रै तराईका जिल्लाहरुमा होली मनाउने परम्परा छ ।

माध्यमिकी परिक्रमामा यात्रा नेपालको धनुषा र महोत्तरीमा १३ तथा भारतमा २ गरी १५ विश्रामस्थल छन् । मिथिला महात्म्यमा विश्रामस्थलका पौराणिक एवं धार्मिक महत्वबारे बेग्लाबेग्लै चर्चा गरिएको छ । मिथिला महात्म्यअनुसार १८ औा शताब्दीदेखि धार्मिक यात्रालाई माध्यमिकी परिक्रमाको रुपमा मनाइदौ आएको छ । यस यात्रामा सहभागी हुने श्रद्धालु भक्तजनले नेपालको १ सय ७ तथा भारतको २६ गरी १ सय ३३ किलोमिटर भूमिमा पैदलयात्रा गर्नुपर्छ ।

महाशिवरात्री सम्पन्नलगत्तै प्रारम्भ हुने धार्मिक यात्रा होली खेलेर समापन गर्ने परम्परा छ ।

प्रकाशित : फाल्गुन २९, २०७७ ०९:२९
पूरा पढ्नुहोस्
प्रतिक्रिया
पठाउनुहोस्
x
×