पार्टी एकता गर्दा समयमा नै ढंग नपुग्दा समस्या भयो : उपप्रधानमन्त्री पोखरेल- समाचार - कान्तिपुर समाचार
कान्तिपुर वेबसाईट
AdvertisementAdvertisement

पार्टी एकता गर्दा समयमा नै ढंग नपुग्दा समस्या भयो : उपप्रधानमन्त्री पोखरेल

कान्तिपुर संवाददाता

काठमाडौँ — उपप्रधानमन्त्री एंव रक्षामन्त्री ईश्वर पोखरेलले विचार, संगठन र नेतृत्वको ख्याल नगरी पार्टी एकता गरिएकाले समस्या भएको बताएका छन् ।

१ सय ११ औं अन्तर्राष्ट्रिय महिला दिवसको अवसरमा सोमबार काठमाडौंमा आयोजित कार्यक्रममा उनले पार्टी एकता गर्दाको समयमा ढंग नपुगेका कारण समस्या भएको बताएका हुन् ।

विचार, संगठन र नेतृत्वभन्दा पनि चुनावमा बहुमत ल्याउने विषयलाई मात्रै प्राथमिकतामा राखेकाले अहिले समस्या भएको उनको भनाइ थियो । आइतबारको सर्वोच्च अदालतको फैसला पछि एकीकृत पार्टीहरुको अवस्था २०७५ साल जेठ ३ गते आगाडिको अवस्थामा पुगेको उल्लेख गर्दे उनले अब नेकपा एमालेले विचार, संगठन अनि योग्य नेतृत्व राखेर नयाँ ढंगले पार्टी एकतालाई अघि बढाउने बताए ।

उनले भने,“हिजो २०७५ साल जेठ ३ गते पार्टी एकता गर्दा ढंग नपुराएकै हो । त्यही ढंग नपुर्‍याएका कारण आज काँचै पल्टिएर बाहिर आयो । अब एकता गर्दा हामीले ढंग पुर्‍याएर गर्नुपर्छ । सबै थिति मिलाएर उचित तरिकाले गर्नुपर्छ । ” सर्वोच्च अदालतको फैसलापछि नयाँ ढंगले पार्टीलाई एकताबद्ध बनाउने उनले बताए ।

केही समय अगाडि नेपाल कम्युनिष्ट पार्टी नेकपामा प्रधानमन्त्री ओली समूहकातर्फबाट थप गरिएका केन्द्रीय सदस्यहरु पनि नेकपा एमालेकै केन्द्रीय सदस्य हुने भन्दै सबैलाई विश्वस्त हुन उनले आग्रह गरे ।

उनले भने,“नेकपा एमालेको ९ औं महाधिवेशनले चुनेको केन्द्रीय कमिटीको बैठक हुन्छ । त्यो बैठकले अस्ति थपिनुभएका साथीहरुलाई नै फेरि थपेर विस्तारित कमिटी बनाउँछ । अब केही हुँदैन । तर लय र स्टेप मिलाउनका लागि नेकपा एमालेको पहिले केन्द्रीय कमिटीको बैठक हुन्छ । केन्द्रीय नेताहरुलाई बैठकमा बोलाइन्छ । नआउने अब अन्तैतिर जान्छु भन्ने पनि निस्केलान् निस्के भने पनि कोहीवात छैन जानुहुन्छ । ”

उनले नेकपा एमाले सूर्य चिन्हसहित सबैलाई समेटर अगि बढ्ने बताए । छिनछिनमा सरकार बदलिने, हेरफेर भइरहने कुरा भयो भने मुलुकमा अस्थिरता पैदा हुने र त्यसले समग्र आर्थिक र विकासको गतिलाई प्रभाव पार्ने भएकाले आफूहरुले त्यसो गर्न हुँदैन भन्ने अडान राख्दा पार्टीभित्रैबाट अहसहयोग भएको दाबी उनले गरे । प्रधानमन्त्री केपी ओलीको नाममा भोट मागिएको र ओलीलाई नै जनताले विश्वास गरेकाले उनको विकल्प खोज्ने विषय अस्वभाविक भएको तर्क उनले गरे ।

उनले प्रतिनिधिसभा पुनर्स्थापनासँगै मुलुकमा अस्वभाविक क्रियाकलाप हुन थालेको र त्यस्ता घिनलाग्दा काम नेपाल कम्युनिष्ट पार्टी नेकपाभित्रैका नेताहरुबाट भइरहेको दाबी गरे ।

प्रकाशित : फाल्गुन २४, २०७७ १९:३३
प्रतिक्रिया
पठाउनुहोस्

प्रधानमन्त्रीलाई बादी युवाको १५ बुँदे मागपत्र

रुपा गहतराज

नेपालगन्ज — १२ जिल्लाबाट नेपालगन्जमा जम्मा भएका बादी समुदायले प्रधानमन्त्रीलाई १५ बुँदे मागपत्र पठाएका छन् ।

राष्ट्रिय बादी सञ्जालको अगुवाइमा सोमबार नेपालगन्ज बजारबाट र्‍यालीसहित जिल्ला प्रशासन कार्यालयमा पुगेका उनीहरुले प्रमुख जिल्ला अधिकारी रामबहादुर कुरुम्बाङमार्फत प्रधानमन्त्री कार्यालय सिंहदरबारमा ज्ञापनपत्र पठाएका हुन् ।

मागपत्रमा बादी समुदायका बालबालिकालाई उच्च शिक्षासम्मको अध्ययन निःशुल्क हुनुपर्ने, सरकारबाट प्राप्त सेवा सुविधाहरुमा बादी समुदायको लागि छुट्टै विशेष कार्यक्रमको व्यवस्था गर्नुपर्ने, बादी समुदायका युवालाई रोजगारीमा लगाउनका लागि शैक्षिक तथा सीप परीक्षण प्रमाणपत्रको आधारमा ५ लाखदेखि १० लाखसम्म बिना ब्याजे ऋण उपलब्ध गराउनु पर्ने, भूमिहीन बादीलाई कानुन बमोजिम एकपटक भूमिसहित आवास उपलब्ध हुनुपर्ने, आमाको नामबाट नागरिकता प्रदान गर्ने सर्वोच्च अदालतको परमादेशलाई पूर्ण रुपमा कार्यान्वयन गर्नुपर्ने लगायतका माग राखीएको छ ।

सञ्जालका अध्यक्ष केशव बादी (नेपाली) का अनुसार ४३ प्रतिशत भूमिहीन, ५७ प्रतिशतसँग ऐलानी तथा श्रेस्ता जमिन रहेको छ । ५७ प्रतिशत मध्येमा ४२ प्रतिशत निजी र ५८ प्रतिशत ऐलानी तथा सरकारी जमिन रहेको उनले बताए । २०६८ को जनगणना अनुसार नेपालमा बादी समुदायको जनसंख्या ३८ हजार ६ सय ३ रहेको छ ।

प्रकाशित : फाल्गुन २४, २०७७ १९:३०
पूरा पढ्नुहोस्
प्रतिक्रिया
पठाउनुहोस्
×