दाहाल–नेपाल समूहको निष्कर्ष : एमाले र माओवादी अलग अलग जाने- समाचार - कान्तिपुर समाचार

दाहाल–नेपाल समूहको निष्कर्ष : एमाले र माओवादी अलग अलग जाने

सर्वोच्चको फैसला मान्छौं –झलनाथ खनाल
कान्तिपुर संवाददाता

काठमाडौँ — साविकको नेकपा दाहाल नेपाल समूहका वरिष्ठ नेता झलनाथ खनालले सर्वोच्च अदालतको फैसला मानेर अलग अलग जाने बताएका छन् ।

सोमबार कोटेश्वरको पेरिसडाँडामा बसेको दाहाल–नेपालसमूहको अनौपचारिक बैठकबाट बाहिरिएका खनालले अदालतले राजनीतिक फैसला गरे पनि आफूहरु अलग अलग भएर जाने बताएका हुन् ।

‘सर्वोच्च अदालतले जुन फैसला गर्‌यो यो राजनीतिक फैसला हो । यसले मुलुकको राजनीतिकमा गम्भीर नकारात्मक स्थिति सिर्जना गरेको छ । तर पनि अदालतले गरेको निर्णयलाई लागू गर्छौं,’ नेता खनालले इकान्तिपुरसँग भने, ‘अब एमाले र माओवादी केन्द्र भइयो । त्यहीँ संघर्ष गर्छौं ।’

बैठकमा अन्य नेताहरुले पनि अदालतको फैसला अनुरुप पूर्वएमाले र पूर्वमाओवादी अलग अलग भएर जाने धारणा राखेको नेता खनालले बताए । आफूहरु एमालेमै रहेर संघर्ष गर्ने पनि उनले बताए ।

प्रकाशित : फाल्गुन २४, २०७७ १९:०५
प्रतिक्रिया
पठाउनुहोस्

सातदोबाटोको पहिलो हार

कान्तिपुर संवाददाता

काठमाडौँ — सहिद स्मारक लिग 'बी' डिभिजनमा सातदोबाटोले सोमबार पहिलो हार बेहोरेको छ । हारसँगै उसको अपराजित यात्रा पनि टुंगेको छ ।

सातदोबाटोको एन्फा कम्प्लेक्समा भएको खेलमा उसलाई मध्यपुर युथ एसोसिसनले २–१ ले हराएको हो ।

सातदोबाटो यसअघि नै लिग च्याम्पियनका रूपमा 'ए' डिभिजनमा उक्लने भने तय भइसकेको छ । मध्यपुरका जितमा कैलाश लामिछाने र सन्नी लामाले एक एक गोल गरे । सातदोबाटोका तर्फबाट माल्डिन आङथुपले एक गोल फर्काए ।

हारले सातदोबाटो २५ अंकमा सीमित रह्यो । सोमबारको अर्को खेलमा पुल्चोकले प्रतियोगितामा आफ्नो पहिलो जितका लागि आरसीटीलाई २–१ ले हराएको छ ।

प्रकाशित : फाल्गुन २४, २०७७ १८:५४
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×