अज्ञात समूहद्वारा विद्यालयमा आगजनी

स्कुलको अफिस बाहिर भर्‍याङ, मट्टितेल हालिएको बोतल र त्यसमा लगाउने बिर्को भेटिएकाले कसैले आगजनी गराएको हुन सक्ने इलाका प्रहरी कार्यालय धरानका डीएसपी ज्ञानेन्द्र बस्नेतले बताए ।

आगलागीबाट करिब २० लाख रुपैयाँको भौतिक क्षति भएको बताइएको छ । धरानको भानुचोकबाट करिब ६ किलोमिटर पश्चिमोत्तरमा पर्ने पटनालीको उक्त विद्यालय धरान–बराहक्षेत्र जाने सडक खण्डमा पर्छ ।

आगलागीबाट विद्यालयको दुईथान ल्यापटप, तीनवटा दराज, नगद ९० हजार रुपैयाँ, प्रिन्टर एकथान र शिक्षक र प्रअ बस्ने कुर्सी टेबल जलेको इलाका प्रहरी कार्यालय धरानका प्रहरी नायब उपरीक्षक बस्नेतले बताए । प्रनाउ बस्नेतले भने, ‘आगलागीको कारण खुल्न सकेको छैन । अनुसन्धान गरिरहेका छौं । तर विद्यलाय प्रवेश गर्ने मख्य गेट, अफिस छिर्ने चेनगेट, अफिसको बाहिरबाट ताला लागेर बन्द रहेको अवस्थामा आगलागी हुनु शंकास्पद देखिएको छ ।’

उनले अनुसन्धानको दायरा फराकिलो बनाउनु पर्ने अवस्था देखिएको बताए । स्कुलको अफिस बाहिर भर्‍याङ, मट्टितेल हालिएको बोतल र त्यसमा लगाउने बिर्को पनि भेटिएकाले कसैले आगलागी गराएको हुन सक्ने प्रनाउ बस्नेतले बताए ।

शिक्षक र प्रधानध्यापकको कक्ष कोठामा भएको आगलागीबाट स्थापनाकालदेखिको स्कुलको सबै रेकर्ड जलेर खरानी भएको छ ।

शैक्षिक संस्थाको कार्यालय जलाउनु पर्ने खासै कारणबारे स्थानीय अभिभावक, शिक्षक र प्रअले बताउन सकेका छैनन् । तर प्रहरीले भने विद्यालयको ०५४ सालदेखि हालसम्म रहेका सबै अभिलेख, माइन्युट बुक, चेक, फर्निचर लगायत सबै खरानी हुने गरी जलाउनु पर्ने कारणको खोजी भइरहेको जनाएको छ । उनले भने, ‘विद्यालयको हिसाब किताब तलमाथि गरेर आर्थिक अनियमितताको कारण कर्मचारीले नै पनि जलाउन सक्छन् वा विभिन्न परीक्षामा कम अंक दिएको निहुँमा चित्त नबुझाएका विद्यार्थीले पनि जलाउन सक्छन् ।’

विद्यालयका प्रअ भरत खत्रीले शैक्षिक संस्थामा आगजनी गरेर लाखौं रुपैयाको क्षति पुर्‍याउने दोषी पत्ता लगाएर कडा कारबाहीको माग गर्दै प्रहरीमा उजुरी दिएको बताए । उनका अनुसार विद्यालयमा अध्ययनरत विद्यार्थीको सबै रेकर्ड जलेकाले कसै न कसैले जानीबुझी आगजनी गरेको हुनसक्ने बताए ।