ओली र दाहाललाई घेराबन्दी गरेर एकताबद्ध बनाउने पक्षमा छु : गाैतम- समाचार - कान्तिपुर समाचार

ओली र दाहाललाई घेराबन्दी गरेर एकताबद्ध बनाउने पक्षमा छु : गाैतम

कान्तिपुर संवाददाता

काठमाडौँ — नेकपा उपाध्यक्ष वामदेव गौतमले दाहाल–नेपाल र ओली समूहका दोस्रो तहका नेताहरूलाई एकताबद्ध गरी एकता अभियान अगाडि बढाउने बताएका छन् ।

बिहीबार कोभिड–१९ विरुद्धको खोप लगाउन निजामती अस्पताल बानेश्वर पुगेका उनले सञ्चारकर्मीसँग पुष्पकमल दाहाल–माधवकुमार नेपाल पक्ष र केपी शर्मा ओली पक्षका दोस्रो पुस्ताका नेतालाई एकताबद्ध गरी पार्टी एकताका निम्ति दबाब दिने बताए । एकताको पक्षमा नहुने नेताहरुलाई भोट नदिनेसम्मको अवस्था सिर्जना गर्ने उनको भनाइ छ ।

नेकपाका अध्यक्षद्वय पुष्पकमल दाहाल र केपी शर्मा ओली अझै पनि एकताको पक्षमा नआएको उनले बताए । ‘धेरै ठाउँमा उहाँहरुले बोलेको कुरा सुन्दा एकताको पक्षमा दुवै अध्यक्ष अझै आइसक्नु भा'छैन', उनले भने, 'मेरोचाहिँ प्रयत्न के छ भने केपी ओलीतिर रहेका सेकेन्ड जेनेरेसनका र दाहालतिर रहेका सेकेन्ड जेनेरेसनका कमरेडहरुलाई एकताबद्ध गर्ने, तलबाट एउटा ठूलो पंक्ति तयार गर्ने र एकताको पक्षमा र जुन नेता एकताको पक्षमा हुनुहुन्न उहाँलाई भोट नदिने । यो अभियान अब हामीले चलाउँदै छौं र चारैतिरबाट यी दुइटा नेतालाई घेराबन्दी गर्न सकियो भने एकता गर्न सकिएला ।'

पहिलो एकता केपी र पुष्पकमलबीचकै एकतालाई मान्ने पनि उनले बताए । 'पहिलो एकता केपी र पुष्पकमलबीचकै एकतालाई मान्ने हो, अरूले एकता गर्दैमा त्यो एकता हुँदैन । जनताले मान्दैन, विश्वले पनि मान्दैन । दुइटालाई एकताबद्ध गरेपछि फेरि यो पार्टी एकताबद्ध भयो भन्ने हुन्छ', उनले भने, 'तर उहाँहरुलाई त्यो एकतामा ल्याउनका निम्ति उहाँहरूको वरिपरि बसेकाहरुलाई घेराबन्दी तोडेर एकताको पक्षमा रहेको नेपाली जनताको शक्ति, कम्युनिस्ट आन्दोलनप्रति शुभचिन्तक समर्थन गर्ने शक्तिले घेराबन्दी गरेर उहाँहरूलाई एकताबद्ध गराउने पक्षमा म छु ।’

उपाध्यक्ष गौतमले विभाजन–उन्मुख रहेको नेकपाको कुनै पक्षमा पनि नलागी एकता अभियानमा लाग्ने स्पष्ट पारे । पार्टी एकताका निम्ति आह्वान गर्ने नेताको पक्षमा आफू उभिन सक्ने पनि उनको भनाइ छ ।

प्रकाशित : फाल्गुन २०, २०७७ १३:२६
प्रतिक्रिया
पठाउनुहोस्

शासकलाई प्रश्न गर्ने कल्पनाका कविता

‘आफ्नो उमेरअनुसार कम्तीमा २–४ ठाउँ प्रेमका मादक कविता लेख्नुपर्ने हो कल्पनाले तर यस्तो लाग्छ, उनमा त बैंस पनि रिसकै चढेको छ ।’
दीपक परियार

पोखरा — गम्भीर स्वभाव । बिरलै देखिने मुस्कान । कवि कल्पना चिलुवाललाई अर्की कवि सरस्वती प्रतीक्षाले ‘रिसाहा कवि’ को उपमा दिइन् । कल्पनाको कवितासंग्रह ‘चुल्ठो’ को बुधबार पोखरामा परिचर्चा गर्दै कवि प्रतीक्षाले उनका कविता आक्रोश र विद्रोह बनेर पोखिएको बताइन् । 

कवितासंग्रह ‘चुल्ठो’ को बुधबार पोखरामा आयोजित परिचर्चा कार्यक्रममा कवि कल्पना चिलुवाल (बायाँ), सुमिना र सरस्वती प्रतीक्षा । तस्बिर : दीपक परियार/कान्तिपुर

‘कतै उपभोक्तावादी बजारसँग रिस, देशलाई यातनागृह बनाउने शासकहरूसँग रिस, हत्यारा न्यायाधीशहरूसँग रिस त कतै दलित र गैरदलितबीचको खाडलसँग रिस,’ प्रतीक्षाले भनिन्, ‘आफ्नो उमेरअनुसार कम्तीमा २–४ ठाउँ प्रेमका मादक कविता लेख्नुपर्ने हो कल्पनाले तर यस्तो लाग्छ, उनमा त बैंस पनि रिसकै चढेको छ ।’

कल्पनाका कवितालाई कुनै एउटा वादको फित्ताले मात्रै नाप्न खोजियो भने त्यो उनका कविताप्रति अन्याय हुन जाने प्रतीक्षालाई लाग्छ । ‘एउटा वाद होइन, थुप्रै वादका कोलाज भने कल्पनाका कवितामा भेटिन्छन्,’ प्रतीक्षा भन्छिन्, ‘कल्पनाका कवितामा कसैले एउटै वाद मात्रै देख्छ भने त्यो इन्द्रेणी एउटै रङले मात्रै बनेको भने जस्तै निरर्थक भनाइ हुन्छ ।’

प्रतीक्षाका अनुसार नारीवाददेखि प्रगतिवादसम्म, यथार्थवाददेखि अस्तित्ववादसम्म, मानवतावाददेखि माक्र्सवादसम्म सबै सबै रङले पोतिएका छन् कल्पनाका कविता । शीर्ष कविता ‘चुल्ठो’ मा परम्परागत चुल्ठोमा दासी बनाइएका नारीको मुक्तिको आवाज छ । थुप्रै कवितामा प्रबल नारीवादी स्वर सुन्न पाइन्छ । विद्यमान सरकार, शासक, शासन प्रणालीप्रति उनीभित्र यति जीवित तिक्तता छ कि त्यो तिक्तता उनका राजनीतिक कवितामा पढ्न पाइन्छ । उनको तिक्तता कतै आक्रोश र कतै विद्रोह बनेर पोखिएको छ ।

‘समसामयिक राजनीतिक परिवेशका विद्रूप चित्र हेर्नु छ भने कल्पनाका कविता हेर्दा हुन्छ,’ प्रतीक्षाले थपिन्, ‘उनको कविताको क्यानभासमा डोरम्याट बनाएर बिछयाइएका सर्वसाधारणको ऐठन छ । कम्युनिस्ट घोषणापत्रले आफ्ना खुट्टा पुछ्ने वामपन्थी नेताहरूको कुकृत्यको पर्दाफास छ । पूर्वछापामारको बेइज्जतीपत्र छ । हाम्रो समयको राजनीतिक स्खलनको दस्ताबेज हो चुल्ठो ।’

तर लेखनशैलीमा आफ्नो मौलिकपन नहुनु कल्पनाको सबैभन्दा ठूलो कमजोरी ठान्छिन् उनी । ‘आफैंभित्रको सुन्दर कविता नपढेका कारण जे कुरामा पनि विद्रूप देख्ने बानी उनलाई परेको हो कि भन्ने शंका गर्न सकिन्छ,’ उनले भनिन्, ‘मानवताका मुहारमा झल्कने प्रेम, करुणा र स्नेहलाई नरम भएर हेरिदिए कल्पनाका कविताको आयतन अझै बृहत्तर हुन सक्थ्यो कि †’

साहित्यकार डा. कृष्णराज अधिकारीले स्तरीय बनाउने नाममा जटिल विम्बको प्रयोग गर्नबाट कल्पनाका कविता मुक्त रहेको बताए । ‘कल्पनाका कविताको सबैभन्दा सबल पक्ष सरलता हो,’ पुस्तकको परिचर्चा गर्दै उनले भने, ‘कवितामा विद्रोह चेत अर्को शक्ति हो । शासकसँग आँखा जुधाएर प्रश्न गर्न सक्ने दुर्लभ कविता लेख्ने कवि हुन् कल्पना ।’

परिचर्चाकार सुमिनाले कल्पनाका कवितामा विशुद्ध वर्तमान समाजको दर्पण मात्रै नभएर परिवर्तनका लागि आवश्यक विचारहरू पनि भएको बताइन् । ‘उनका कविताले पाठकको मन र मस्तिष्कमा एक प्रकारको तहल्का मच्चाउँछन्, आँधीबेहरी सिर्जना गर्ने क्षमता राख्छन्,’ उनले भनिन्, ‘पाठकलाई कुण्ठा पढाएर तिक्ततातर्फ मात्रै धकेल्ने कविता छैनन्, बरु उमंग, ऊर्जा भर्दै सकारात्मकतातिर डोहोर्‍याउने कविता छन् ।’

पोखरालाई कर्मथलो बनाएकी कवि कल्पनाले कृतिमा आममानिससँग सरोकार राख्ने कविता संगृहीत गरेको बताइन् । ‘कवितामार्फत आममान्छेसँग जोडिन पाउँदा खुसी लागेको छ,’ उनले भनिन्, ‘लेख्ने कलम मेरो भए पनि कविताको श्रेय पोखरा र पोखरावासीप्रति जान्छ ।’ बेला पब्लिकेसन्सले बजारमा ल्याएको कृतिमा ५६ कविता छन् ।

प्रकाशित : फाल्गुन २०, २०७७ १२:४४
पूरा पढ्नुहोस्
प्रतिक्रिया
पठाउनुहोस्
×