जिउँदै पुरेर मारिएकी महिलाका आफन्तले शव बुझेनन्- समाचार - कान्तिपुर समाचार

जिउँदै पुरेर मारिएकी महिलाका आफन्तले शव बुझेनन्

हरिहरसिंह राठौर

काठमाडौँ — धादिङ एक्स्काभेटर चालकले जिउँदै पुरेर मृत्यु भएकी त्रिपुरासुन्दरी–१ की सरस्वती कुमालका आफन्तले ठेकेदार पक्राउ र क्षतिपूर्ति नदिएसम्म पोस्टमार्टम नगर्ने बताएका छन् ।

मृतकका परिवारजनले दोषीलाई कर्तव्य ज्यान मुद्दा र उचित क्षतिपूर्तिको माग राख्दै शव बुझ्न मानेका छैनन् । शव सल्यानटार प्राथमिक स्वास्थ्य केन्द्रमा राखिएको छ । बुधबारसम्म उनीहरुलाई पक्राउ नगरे शव ल्याएर गाउँपालिकामै धर्ना दिने आफन्तजनले चेतावनी दिएका छन् ।

‘बुधबार बिहानसम्म दोषीलाई उपस्थित गराउँछौं भन्ने प्रहरीले आश्वासन दिएको छ,’ सल्यानटारका पूर्व गाविस अध्यक्ष फणिकान्त छत्कुलीले भने । दाङ घर भएका चालक बुढाथोकी र ठेकेदार युनियन बन्जाराको खोजी भइरहेको जिल्ला प्रहरी प्रमुख महेन्द्र खड्काले बताए ।सोमबार दिउँसो त्रिपुरासुन्दरी–१ जिपजिपे पाखामा सडक खनिरहेको एक्स्काभेटरको ठक्करबाट ४५ वर्षीया कुमाल घाइते भएकी थिइन् ।

उनलाई उद्धार गर्नुको साटो चालक भीमबहादुर बुढाथोकीले एक्स्काभेटरमार्फत धकेलेर खसालेका थिए । त्यसपछि माटो झारेर पुरेका थिए । स्थानीयले खोजतलास गर्दा सरस्वतीको शव घोप्टो अवस्थामा फेला परेको थियो । उत्तेजित स्थानीयले एक्स्काभेटरमा आगजनी गरेका थिए ।

प्रकाशित : फाल्गुन १८, २०७७ २२:०६
प्रतिक्रिया
पठाउनुहोस्

बीबीसी मास्टर सेफ उपविजेता साहको खुलासा- 'नागरिकता लिन घूस दिनुपर्‍यो'

सुरज कुँवर

काठमाडौँ — बीबीसी मास्टर सेफ प्रोफेसनल सिरिज–२०२० का उपविजेता सन्तोष साहले नेपाली नागरिकता बनाउँदा घूस दिनुपरेको खुलासा गरेका छन् । मंगलबार चन्द्रागिरि हिल्समा आयोजित सम्मान कार्यक्रममा नेपाली सेफहरूमाझ उनले सुरुका दिनमा आफ्नो जीवनकाल अत्यन्तै संघर्षपूर्ण रहेको उल्लेख गर्दै सजिलै नागरिकता नपाएको र घूस दिनुपरेको खुलासा गरेका हुन् । हाल बेलायती राहादानी लिइसकेका सेफ साहले गलत कुरा कहिल्यै नलुक्ने उल्लेख गरे ।

मंगलबार चन्द्रागिरि रिसोर्टमा आयोजित कार्यक्रममा चन्द्रागिरि नगरपालिका मेयर घनश्याम गिरि र होटल संघ नेपाल (हान) का प्रथम उपाध्यक्ष बिनायक शाह सेफ सन्तोष साहलाई सम्मान प्रदान गर्दै । तस्बिर : सुरज कुँवर/कान्तिपुर

भारतीय रेस्टुरेन्टमा झन्डै दुई दशक बिताएका उनलाई पछिल्लो पटक सामाजिक सञ्जालमा भारतीय नागरिकको आरोप लगाइएको थियो । उनले सामाजिक सञ्जालका आरोपको खण्डन गर्दै भने, ‘म पक्का नेपाली हुँ । सिराहको कर्जन्हामा जन्मेको हुँ । नागरिकता पनि छ । नागरिकताका लागि धेरै दौडिनुपर्‍यो । घूस दिनुपर्‍यो । जे पनि दिनुपर्‍यो । हाम्रो सिस्टमै त्यही हो ।’ उनले प्रमाण नभएकाले बरु चाँडै नागरिकता पाउने गरेको पनि बताए ।

उनले कुनै पनि मानिस उचाइमा पुगेपछि गलत कुरा नलुक्ने बताउँदै आफ्नो नागरिकता बनाउँदा घूस दिनुपरेको खुलासा गरेका हुन् । पर्यटन बोर्डमा आयोजित अर्को सम्मान कार्यक्रममा उनले हाल आफ्नो विदेश (लन्डन) को पासपोर्ट भएको तर पासपोर्ट जहाँको भए पनि आफूमा नेपालको माया धेरै भएको बताए । कान्तिपुरसँग कुरा गर्दै उनले ११ वर्षको उमेरमा पहिलो पटक १७ रुपैयाँमा पाउरोटी बेचेर चप्पल किनेको अनुभव पनि सुनाए । उनले यो विषयमा चन्द्रागिरिमै पनि सेफहरूमाझ बोलेका थिए । ‘पहिलो पटक पाउरोटी बेचेर चप्पल किनेको थिएँ । माटो लाग्छ भनेर पहिलो दिन चप्पल खुट्टामा होइन हातमा लगाएर हिँडेको थिएँ ।’ परिवारमा ६ जना दाजुभाइ तथा दिदीबहिनीका कान्छा सन्तान उनले ६ वर्षकै उमेरमा बुवा गुमाउनुपरेकाले अत्यन्तै संघर्षगर्नु परेको बताए । ‘म साधारण मान्छे हुँ । तपाईंहरूले मलाई दिएको सम्मान आउने पुस्ताका लागि हो,’ उनले चन्द्रागिरिमा भने ।

नेपाली खान्कीलाई अन्तर्राष्ट्रियकरण गराउन महत्वपूर्ण योगदान पुर्‍याएको जनाउँदै बीबीसी मास्टर सेफ २०२० का पहिलो नेपाली उपविजेता सेफ सन्तोष साहलाई मंगलबार नेपाल पर्यटन बोर्ड, होटल संघ नेपाल, चन्द्रागिरि हिल्स प्रालि, रेस्टुरेन्ट एसोसिएसन अफ नेपाल (रेबान) र सेफ एसोसिएसनले सम्मान गरेका थिए । पर्यटन बोर्डमा संस्कृति, पर्यटन तथा नागरिक उड्डयन मन्त्रालयका सचिव तथा बोर्डका अध्यक्ष यादवप्रसाद कोइराला र बोर्डका प्रमुख कार्यकारी अधिकृत डा. धनञ्जय रेग्मीले प्रमाणपत्र तथा खादा ओढाएर सम्मान गरे ।

बीबीसी वानको चर्चित मास्टर सेफ प्रतियोगितामा नेपाली खानाका विभिन्न परिकार प्रस्तुत गरेर निर्णायक तथा दर्शकहरूको माया पाइराखेका साहले मौलिक नेवारी परिकार योमरी, बेथेको साग, रोस्टेड काँक्रोको बिया, तरुलको खाना, तामाको अचार, भेडाको मासु, सिस्नु र आलुको तरकारी, भाङको चट्नी, मकैको रोटी, प्याजको अचार, स्याउको चटनीलगायत नेपाली खानाका परिकारहरू प्रस्तुत गरेका थिए ।

प्रकाशित : फाल्गुन १८, २०७७ २१:३२
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×