ताप्लेजुङको दोभान बजारमा भीषण आगलागी- समाचार - कान्तिपुर समाचार

ताप्लेजुङको दोभान बजारमा भीषण आगलागी

बजारको आधा भाग जल्यो
आनन्द गौतम

काठमाडौँ — ताप्लेजुङको मेरिङदेन गाउँपालिकाको दोभान बजारमा मंगलबार बिहानदेखि भीषण आगलागी भइरहेको छ । बिहान ९ बजेतिर एक घरबाट सल्किएको आगो बस्तीभरि फैलिएको हो ।

तस्बिर : रेडियो तमोरको फेसबुकबाट

अहिलेसम्म आधाजति बजार जलिसकेको स्थानीयले बताएका छन् । स्थानीय गोपाल खवासका अनुसार आगो भोला पौडेलको घरबाट सल्किएको हो । पौडेलको घरमा रहेको कपडा पसलमा बिजुली सर्ट भएर आगो लागेको उनले जानकारी दिए ।

आगलागी नियन्त्रणका लागि सदरमुकाम फुङलिङ बजारबाट दमकल दोभान बजार पुगेको छ । आगलागी फैलन नदिन डोजरले कच्ची घरहरू भत्काइँदै छन् ।

तस्बिर : रेडियो तमोरको फेसबुकबाट

घटनास्थलमै रहेका गाउँपालिका अध्यक्ष गणेशबहादुर लिम्बूले अहिलेसम्म बजारको मुख्य क्षेत्र जलिसकेको बताए । ‘फुङलिङमा रहेको एक मात्र दमकल आएर आगो थप फैलन त रोकेको छ,’ उनले भने, ‘तर आगलागी भइरहेको स्थानमा भने नियन्त्रणमा लिन सकिएको छैन । नजिक गएर हेर्ने अवस्था नभएकाले कति घर जले यसै भन्न सकिन्न ।’ उनका अनुसार तुरुन्त आगो फैलिएकाले स्थानीयले घरभित्रका सामान निकाल्न भ्याएनन् । ‘केहीले महत्त्वपूर्ण कागजातहरूसम्म निकाल्न भ्याए,’ लिम्बूले भने, ‘जिल्लामा अहिले सीडीओ नभएकाले पनि के गर्ने, कसो गर्ने भन्ने अन्योल छ ।’

ताप्लेजुङका प्रजिअ झरेन्द्रप्रसाद चापागाईं केही दिनअघि नै सरुवा भई झापा गइसकेका छन् । झापाका प्रजिअ उमेश पाण्डेलाई ताप्लेजुङ सरुवा गरिएको छ ।

बिहानको समयमा मानिसहरू ब्युँझिसकेको र आगो लाग्नेबित्तिकै बाहिर निस्कन पाएकाले मानवीय क्षति हुनबाट जोगिएको पनि गाउँपालिका अध्यक्ष लिम्बूले जानकारी दिए । दोभान जिल्लाकै दोस्रो ठूलो व्यापारिक केन्द्र हो ।

प्रकाशित : फाल्गुन १८, २०७७ १०:४८
प्रतिक्रिया
पठाउनुहोस्

यो वर्ष कोरोना महामारी अन्त्य हुँदैन : विश्व स्वास्थ्य संगठन

‘महामारी अन्त्य नभए पनि कोरोनबाट अस्पताल बस्नुपर्ने अवस्था र मृत्युदर भने अवश्य घटाउन सकिनेछ ।’
इकान्तिपुर डेस्क

काठमाडौँ — विश्व स्वास्थ्य संगठन(डब्लूएचओ) ले यस वर्षको अन्त्यसम्म पनि कोरोना महामारीको अन्त्य नहुने बताएको छ । डब्लूएचओका आपत्कालीन विभागका निर्देशक डा. माइकल ऱ्यानले आइतबार जेनेभामा आयोजित मिडिया ब्रिफिङ क्रममा यो वर्ष कोरोना महामारीको अन्त्य नहुने बताएका हुन् ।

डा. ऱ्यानले भने, ‘यही वर्षको अन्त्यसम्म कोरोना महामारीको अन्त्य हुन्छ भनेर सोच्नु असुहाउँदो र अपरिपक्व कुरा हो । तर यदि हामी सही ढंगले अघि बढ्यौँ भने अस्पताल भर्ना हुने बिरामीको संख्या र कोरोनाबाट हुने मृत्युलाई भने पक्कै घाटाउन सक्छौं ।’

त्यस्तै डब्लूएचओका महानिर्देशक डा. टेड्रोस गेहब्रेयसस एड्हानोमले कोरोना महामारीको नियन्त्रणमा खोपमा मात्रै भर पर्न नहुने बताएका छन् । उनले भने, ‘खोपले पक्कै पनि मानिसको ज्यान बचाउँछ । तर मुलुकहरु खोपमा मात्रै निर्भर हुनुहुँदैन, त्यसो गरे ठूलो गल्ती हुनेछ ।’ कोरोना महामारीको नियन्त्रण र रोकथामका लागि खोपका साथै सार्वजिनक स्वास्थ्य मापदण्डहरु पूर्ण रुपमा पालन गर्नुपर्ने उनको भनाइ थियो । उनले भने, ‘स्वास्थ्य निकायहरुले परीक्षण, कन्ट्याक्ट ट्रेसिङ, आइसोलेसन, क्वारेन्टाइन र गुणस्तरीय हेरचाहमा विशेष ध्यान दिनुपर्छ ।’ व्यक्तिगत रुपमा पनि मानिसहरुले भीडभाड नगर्ने, भौतिक दूरी कायम गर्ने, मास्क लगाउने, हात धुनेलगायतका कामलाई निरन्तरता दिनुपर्ने डा. टेड्रोसको भनाइ छ ।

त्यस्तै महानिर्देशक टेड्रोसले केही मुलुकले स्वस्थ र युवा पुस्तालाई कोरोना खोप अभियानमा प्राथमिकता दिएकोमा चिन्ता व्यक्त गरे । त्यस्तै उनले कोरोनाविरुद्धको लडाइँमा देशहरुले एकअर्कासँग प्रतिस्पर्धा गर्न नहुने पनि बताए । कोरोनाविरुद्ध सबै मुलुकको साझा लडाइँ हुनुपर्नेमा पनि उनले जोड दिए ।

सन् २०१९ डिसेम्बरबाट चीनको वुहानबाट फैलिएको कोरोना भाइरसबाट विश्वभर ११ करोड ४४ लाखभन्दा बढी संक्रमित भइसकेका छन् । त्यस्तै मंगलबार बिहानसम्म कोरोनाबाट मृत्यु हुनेको संख्या २५ लाख ३७ हजार नाघेको छ । जोन्स होप्किन्स विश्वविद्यालयको कोरोनाभाइरस रिसोर्स सेन्टरका अनुसार संक्रमण पुष्टि भएकामध्ये ६४ लाख ६० हजारभन्दा बढी निको भएका छन् ।

कोरोना महामारीबाट सबैभन्दा बढी प्रभावित मुलुक अमेरिकामा २ करोड ८६ लाखभन्दा बढीमा संक्रमण पुष्टि भएको छ भने ५ लाख १४ हजारभन्दा बढीको मृत्यु भएको छ ।

प्रकाशित : फाल्गुन १८, २०७७ १०:३२
पूरा पढ्नुहोस्
प्रतिक्रिया
पठाउनुहोस्
×