स्थायी र केन्द्रीय कमिटी बैठक बोलाउने दाहाल–नेपाल पक्षको सचिवालय बैठकको निर्णय
काठमाडौँ — नेकपाको दाहाल–नेपाल पक्षको सचिवालय बैठकले फागुन १९ गतेका लागि स्थायी कमिटी र केन्द्रीय कमिटी बैठक बोलाउने निर्णय गरेको छ ।
नेकपाको संसदीय दलको कार्यालय सिंहदरबारमा सोमबार बसेको सचिवालय बैठकले पछिल्ला राजनीतिक घटनाक्रमका सन्दर्भमा छलफल गर्न छिट्टै स्थायी र केन्द्रीय कमिटी बैठक बोलाउने निर्णय गरेको प्रवक्ता नारायणकाजी श्रेष्ठले जानकारी दिए ।
त्यसै गरी बैठकले पार्टीको आधिकारिकताका लागि आफूहरूले गरेको दाबीका आधारमा संविधान र दल ऐनअनुरूप छिट्टै निर्णय गर्न अनुरोध गरेको पनि उनले बताए । ‘पार्टीको सचिवालय बैठकले पछिल्लो राजनीतिक घटनाक्रमका सन्दर्भमा पार्टीको स्थायी कमिटी र केन्द्रीय कमिटीको बैठक छिट्टै बोलाउने निर्णय गरेको छ । साथसाथै निर्वाचन आयोगले पार्टीको आधिकारिकतासम्बन्धमा हामीले दाबी गरेको अनुरोधका आधारमा संविधान र दल ऐनअनुरूप छिट्टै निर्णय गर्नका निम्ति पनि अनुरोध गरेका छौँ,’ उनले भने ।
प्रधानमन्त्री केपी शर्मा ओलीले प्रमुख सचेतक देव गुरुङलाई हटाउने स्वेच्छाचारी निर्णय गरेको भन्दै सो कुरा मान्य नहुने पनि प्रवक्ता श्रेष्ठले बताए ।
बैठकले केन्द्रीय सदस्यहरूलाई नागरिकता र पार्टीको परिचय खुल्ने कागजातसहित उपस्थित हुन सर्कुलरसमेत जारी गरेको केन्द्रीय सदस्य डोरप्रसाद उपाध्यायले बताए ।
प्रकाशित : फाल्गुन १७, २०७७ ११:३९