आमसभा स्थगनपछि आज पोखरामा कार्यकर्ता भेलालाई सम्बोधन गर्दै ओली
पोखरा — गण्डकी प्रदेशस्तरीय कार्यकर्ता भेलालाई सम्बोधन गर्न आज सोमबार प्रधानमन्त्री केपी शर्मा ओली पोखरा आउने भएका छन् । १५ गतेलाई अमरसिंह चौरमा तय गरिएको नेकपा ओली समूहको आमसभा स्थगित भएपछि आज कार्यकर्ता भेला गर्न लागिएको हो ।
प्रधानमन्त्री ओली सोमबार बिहान ११:३० बजे पोखरा विमानस्थलमा अवतरणपछि नदीपुरस्थित गण्डकी प्रदेश प्रशिक्षण प्रतिष्ठानको भवन शिलान्यास गर्ने कार्यक्रम छ । त्यसपछि उनी पार्टीको प्रदेश कमिटीले पोखरा सभागृहमा आयोजना गरेको प्रदेशस्तरीय कार्यकर्ता भेलामा सहभागी हुने नेकपा प्रदेश कमिटीका सचिव गोविन्द नेपालीले जानकारी दिए ।
कार्यकर्ता भेलालाई सम्बोधनपछि प्रधानमन्त्री ओली पोखरा रंगशाला जाने कार्यक्रम छ । त्यहाँ उनले निर्माणाधीन अन्तर्राष्ट्रिय फुटबल स्टेडियमसहित भलिबल कोर्ट, क्रिकेट मैदान, ब्याडमिन्टन हल, बहुउद्देश्यीय कभर्ड हल, टेनिस कोर्टलगायत खेल पूर्वाधारको निरीक्षण गर्दै छन् ।
प्रकाशित : फाल्गुन १७, २०७७ ०८:५४