ओली सरकारले मोडबाट खसालिदिएको देशको गाडी सर्वोच्चले रोडमा ल्यायो : नेता थापा- समाचार - कान्तिपुर समाचार
कान्तिपुर वेबसाईट
AdvertisementAdvertisement

ओली सरकारले मोडबाट खसालिदिएको देशको गाडी सर्वोच्चले रोडमा ल्यायो : नेता थापा

राजकुमार कार्की

सिन्धुली — कांग्रेस केन्द्रीय सदस्य एवं सांसद गगन थापाले केपी ओली सरकारले मोडबाट खसालिदिएको देशको गाडीलाई सर्वोच्च अदालतले रोडमा ल्याएको टिप्पणी गरेका छन् । 

सिन्धुलीको तीनपाटन गाउँपालिकाको चकमकेमा शनिबार आयोजित सभामा सम्बोधन गर्दै नेता थापाले सर्वोच्चले मोडबाट खसालिएको गाडी सडकमा ल्याउने काम गरे पनि अझै धेरै मोडका सडक रहेको बताए । 'मोड धेरै छन्, त्यस्तो सडकमा गाडी हाँक्ने चालक सन्की छन्', उनले भने, 'यस्तो अवस्था पार लगाउन कांग्रेस जिम्मेवारपूर्वक लाग्नु पर्दछ ।'

सर्वोच्च अदालतको आदेशपछि देशको अवस्था फेरिएको तर नेकपाको तमासा भने नफेरिएको भन्दै थापाले एकथरि नेकपालाई बढी लड्डु खाएर पखाला लागेको छ अर्कोथरिलाई लड्डु खान पाएनौं भन्ने चिन्ता रहेको बताए । ओली नेकपा उत्ताउलो भएको र दाहाल, नेपाल नेकपा आत्तिएकाले कांग्रेसले देशलाई निकास दिनुपर्ने जिम्मेवारी आएको थापाको कथन छ ।

पूर्वमन्त्री रहेका थापाले पाँच वर्ष कांग्रेसलाई जनताले सरकारमा बस्ने म्यान्डेट नदिएको खुलाए । प्रतिपक्षमा बसेको कांग्रेस प्रतिपक्षमै बस्ने र देशलाई निकास दिन सक्ने गरीमात्रै अगाडि बढ्ने उनको भनाइ थियो । 'हामी सरकारमा जाने हो तर अहिले होइन अब आउने चुनावमा सानदारका साथ जितेर जाने हो', उनले भने नेकपाले छोडेको भाग खान होइन आफैले बहुमत ल्याएर जाने हो ।'

प्रकाशित : फाल्गुन १५, २०७७ १९:३३
प्रतिक्रिया
पठाउनुहोस्

कान्तिपुरकर्मी बुनु थारु सम्मानित 

कान्तिपुर संवाददाता

काठमाडौँ — कान्तिपुरकर्मी बुनु थारु सम्मानित भएकी छन् । स्वास्थ्य दर्पण मिडिया नेटवर्क प्रालिले आफ्नो नवौं वार्षिकोत्सवको अवसरमा थारुसहित ७ जना पत्रकार र चिकित्सकहरुलाई सम्मान गरिएको हो । 

राजधानीमा शनिबार आयोजित एक कार्यक्रममा प्रालिले स्वास्थ्य क्षेत्रमा योगदान दिएबापत चिकित्सक तथा पत्रकारहरुलाई सम्मान गरेको हो ।

प्रदेश १ बाट वरिष्ठ न्यूरोलोजिष्ट डा. वीरेन्द्रकुमार विष्ट, प्रदेश २ बाट स्त्री तथा प्रसूति रोग विशेषज्ञ डा. लक्ष्मी थापा, वाग्मती प्रदेशबाट वरिष्ठ रेडियोलोजिष्ट डा. पशुपति रेग्मी र वरिष्ठ अर्थोपेडिक सर्जन डा. सुदीपमान वैद्य र गण्डकी प्रदेशबाट वरिष्ठ फिजिसियन डा. वसन्तकुमार ताम्राकार सम्मानिति भएका छन् ।

त्यसैगरी लुम्बिनी प्रदेशबाट वरिष्ठ अर्थोपेडिक सर्जन डा. प्रकाशबहादुर थापा, कर्णाली प्रदेशबाट वरिष्ठ रेडियोलोजिष्ट डा. रविन खड्का र सुदूरपश्चिम प्रदेशबाट वरिष्ठ स्त्री तथा प्रसूतिरोग विशेषज्ञ डा. खगेन्द्रराज भट्टलाई सम्मान गरिएको थियो ।

कांग्रेस नेता प्रकाशमान सिंहको प्रमुख आतिथ्यमा भएको कार्यक्रममा युवा चिकित्सक मुटुरोग विशेषज्ञ डा. शंकर लौडारी, फिजिसियन डा. निरजकुमार सिंह, जनरल ल्याप्रोस्कोपी सर्जन डा. सूर्यज्योति श्रेष्ठ, स्वीस नागरिक रुथ गोरगेज र नवलपुर जिल्लाका स्वास्थ्यकर्मी हरिकुमार शाही पनि सम्मानित भएका थिए । सो अवसरमा बाँके जिल्लाको खजुरा गाउँपालिका र वाग्मती प्रदेश चितवन जिल्लाको इच्छाकामना गाउँपालिकालाई कोभिड–१९ व्यवस्थापनमा उल्लेखनीय काम गरेको भन्दै संस्थागत सम्मान गरिएको थियो ।

कार्यक्रममा स्वास्थ्य पत्रकारितामा आबद्ध पोखरा टेलिभिजनका सुरज श्रेष्ठ, नेपाल समाचारपत्रकी भगवती तिमल्सिना, रेडियो सगरमाथाकी सम्झना महर्जन, गोरखापत्र दैनिकका सरोज ढुङ्गेल, अन्नपूर्ण पोष्ट दैनिकका दिनेश गौतम र हेल्थन्यूज डटकमका नमराज भट्ट पनि सम्मानित भएका थिए ।

स्वास्थ्य दर्पण मिडिया नेटवर्क प्रालिका अध्यक्ष तथा प्रबन्ध निर्देशक सन्दीपकुमार श्रेष्ठले यहॉसम्मको यात्रा कठिन भए तापनि आगामी दिनमा निरन्तरताका साथ स्वास्थ्य क्षेत्रमा काम गर्ने बताए ।

प्रकाशित : फाल्गुन १५, २०७७ १९:३२
पूरा पढ्नुहोस्
प्रतिक्रिया
पठाउनुहोस्
×