नेकपा विवाद नटुंगिएसम्म कांग्रेसले भावी सरकारको बारेमा निर्णय नगर्ने - समाचार - कान्तिपुर समाचार

नेकपा विवाद नटुंगिएसम्म कांग्रेसले भावी सरकारको बारेमा निर्णय नगर्ने 

कान्तिपुर संवाददाता

काठमाडौँ — सत्तारुढ नेकपा विवाद नटुंगिएसम्म कांग्रेसले भावी सरकारको बारेमा निर्णय नलिने भएको छ । 

पार्टी सभापति शेरबहादुर देउवाको निवास बुढानिलकण्ठमा बिहीबार बसेको पार्टी पदाधिकारी बैठकले भावी सरकारको बारेमा अहिले कुनै पनि धारणा नबनाउने निष्कर्ष निकालेको हो । बैठकपछि नेता कृष्णप्रसाद सिटौलाले भने, 'कांग्रेसले हतार गरेर निर्णय गर्नु काम छैन । संसद् पुन:स्थापनापछि नेकपा एक छ । उनीहरुको विवाद कसरी टुंगिन्छ । त्यसपछि हाम्रो भूमिका क्लियर गर्छौं ।'

उनले नेकपाका दाहाल-नेपाल समूह र ओली समूहले भेट्न खोज्यो भने दुवै पक्षसँग भेट्ने, छलफल गर्ने तर अहिले नै कुन पक्षलाई समर्थन गर्ने भन्ने निष्कर्ष ननिकाल्ने विषयमा एकमत भएको बताए ।

त्यस्तै नेता अर्जुननरसिंह केसीले नेकपा अलग-अलग पार्टी नै बन्ने निश्‍चित नभएसम्म कांग्रेस यो वा त्यो पक्षलाई समर्थन गर्ने भन्ने निर्णय नगर्ने विषयमा समझदारी भएको बताए । उनले नेकपा विभाजनको दिशा अगाडि बढेमा छुट्टै बैठक बसेर धारणा बनाउने कान्तिपुरसित बताए । नेकपा कुन आधिकारिकता भन्ने विषय निर्वाचन आयोगले टुंग्याउन बाँकी छ ।

पुस ५ गते प्रधानमन्त्री ओलीको सिफारिसमा भएको प्रतिनिधिसभा विघटनको निर्णय सर्वोच्च अदालतले बदर गरिदिएपछि नयाँ सत्ता समीकरण बनाउने खेल सुरु हुँदै छ । नेकपा दाहाल-नेपाल समूहले संसद् बैठक सुरु भएपछि प्रधानमन्त्री एवं केपी शर्मा ओलीलाई पदच्यूत गराउने बाटो खोजिरहेको छ भने ओलीले आफू प्रधानमन्त्रीमा निरन्तरताका लागि वा आफ्नो पक्षले सरकार सञ्‍चालनको प्रयास गर्ने कसरतमा देखिएका छन् । दाहाल-नेपाल समूहले भने कांग्रेस, जसपालगायत दलसँग सत्ता समिकरणका लागि संवाद समेत थालिसकेका छन् ।

प्रकाशित : फाल्गुन १३, २०७७ १८:३१
प्रतिक्रिया
पठाउनुहोस्

कर्णाली करिडोर : १ सय २२ किमि ट्रयाक खुल्यो

राजबहादुर शाही

मुगु — कर्णाली करिडोरअन्तर्गत कालीकोटको खुलालुदेखि हुम्लाको बालुकुनासम्म १ सय २२ किलोमिटर सडकको ट्रयाक खुलेको छ । खुलालुदेखि हुम्लाको सलीसल्लासम्मको १ सय २३ किलोमिटरमध्ये अब एक किलोमिटर मात्र ट्रयाक खोल्न बाँकी छ ।

२०७१ चैतदेखि नेपाली सेनाले सडक निर्माणको काम थालेको थियो । निर्माणको जिम्मा लिएको ७ वर्षमै १ सय २२ किमि सडक निर्माणको काम पूरा भएको कार्यदलका प्रमुख (सेनानी) मिलन कार्कीले बताए । ‘बाँकी १ किलोमिटर सडकको काम आगामी वैशाखसम्म सक्ने योजना छ,’ उनले भने, ‘लक्ष्यअनुसार काम भए चालू आर्थिक वर्षभित्रै सडक सरकारलाई हस्तान्तरण गर्छौं ।’ उनका अनुसार ट्रयाक निर्माणको काम पूरा भएपछि केही ठाउँमा सडक चौडा बनाउने, टेवा पर्खाल लगाउनेलगायत काम हुनेछन् ।

अहिले कालीकोटको खुलालुदेखि हुम्ला बालुकुनासम्मको १ सय २१ किलोमिटर सडकमा जिप र साना सवारी साधन सञ्चालन भइरहेको सेनानी कार्कीले बताए । उनका अनुसार यातायात सञ्चालन भएपछि कालीकोट, हुम्ला, मुगु र बाजुराका बासिन्दाको आवतजावत सजिलो भएको छ भने दैनिक उपभोग्य सामग्री ढुवानी सडक बनेको छ । करिडोरको ट्रयाक खुलेपछि नेपालगन्ज, सुर्खेतलगायतका ठाउँ आउजाउ गर्न धेरै सुविधा पुगेको सोरु गाउापालिका–४ का अंगबहादुर शाहीले बताए । ‘सडक निर्माणले रोजगारी पनि पाएका छौं,’ उनले भने, ‘कृषिजन्य सामग्रीले सजिलै भाउ र बजार पाएको छ ।’

हुम्लाको सरिसल्लादेखि सिमकोटसम्मको ५१ किलोमिटरमध्ये ३५ किमि सडक निर्माणको काम सडक डिभिजन र स्थानीय तहमार्फत भइरहेको छ । अब करिडोरको १६ किलोमिटर मात्र ट्रयाक खुल्न बाँकी रहेको सडक डिभिजन कार्यालयले जनाएको छ । बाँकी रहेको १६ किलोमिटर सडक निर्माणको काम पनि सेनाले गरे करिडोर छिट्टै सञ्चालनमा आउने सर्केगार्ड गाउँपालिका उपाध्यक्ष जोशी धामीले बताए । ‘सेनालाई जिम्मा दिए काम छिटो हुन्थ्यो,’ उनले भने, ‘हामीले पनि निर्माणलाई तीव्रता दिइरहेका छौं ।’ उनका अनुसार अहिले उक्त सडक खण्डमा करिब २ सय ५० जना दक्ष कामदार खटिएका छन् । उक्त खण्डमा पनि विष्फोटनको जिम्मा सेनालाई नै दिइएको उनले जानकारी दिए ।

कार्यदलका अनुसार अहिलेसम्म करिडोर निर्माणको काममा खटिएका ६ जनाले ज्यान गुमाइसकेका छन् । कालिकोटमा ४ र हुम्ला खण्डमा २ जनाको सडक निर्माणका क्रममा ज्यान गएको थियो । मृतकका परिवारलाई प्रतिव्यक्ति १० लाख रुपैयाँ राहत दिइएको सेनाले जनाएको छ । करिडोर निर्माणमा २ अर्ब ८४ करोडको बजेट प्रस्ताव गरिए पनि अहिलेसम्म १ अर्ब ४५ करोड रुपैयाँ खर्च भइसकेको छ । चालू आर्थिक वर्षमा विनियोजन भएको २० करोड रुपैयाँबाट सडक निर्माणको काम चलिरहेको कार्कीले बताए ।

५ ठाउँमा बेलीब्रीज

कर्णाली करिडोरअन्तर्गत विभिन्न ५ ठाउँमा नेपाली सेनाले ५ वटा बेलीब्रीजसमेत निर्माण गरेको छ । एउटा बेलीब्रीजको निर्माणको काम जारी रहेको सडक निर्माण कार्यदलले जनाएको छ । कालिकोट खण्डमा २, बाजुरा खण्डमा १ र हुम्लामा २ वटा पुल निर्माणको काम सकिएको सेनानी कार्कीले बताए । उनका अनुसार कालीकोटको खुलालुमा पुल निर्माणको काम जारी छ । हुम्लाको सरिल्लास्थित कर्णाली नदीमा भने सडक डिभिजन कार्यालयले बेलीब्रीज निर्माण गरिरहेको उनले बताए ।

प्रकाशित : फाल्गुन १३, २०७७ १७:५९
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×