शिक्षक श्रेष्ठ हत्या प्रकरण : नेत्रविक्रम चन्दसहित ४२ जनामाथि अपहरण तथा कर्तव्य ज्यान मुद्दा दर्ता- समाचार - कान्तिपुर समाचार

शिक्षक श्रेष्ठ हत्या प्रकरण : नेत्रविक्रम चन्दसहित ४२ जनामाथि अपहरण तथा कर्तव्य ज्यान मुद्दा दर्ता

देवनारायण साह

मोरङ — मिक्लाजुङका शिक्षक राजेन्द्र श्रेष्ठको हत्या आरोपमा प्रतिबन्धित नेकपाका महासचिव नेत्रविक्रम चन्दसहित ४२ जनाविरुद्ध जिल्ला अदादलत मोरङमा अपहरण तथा कर्तव्य ज्यान मुद्दा दर्ता गराएको छ ।


महासचिव नेत्रविक्रम चन्दको निर्देशनमा शिक्षक श्रेष्ठको अपहरणपछि हत्या गरिएको अभियोग पत्रमा उल्लेख छ । उक्त मुद्दामा मंगलबारदेखि थुनछेक बहस सुरु हुने जिल्ला अदालत मोरङका श्रेस्तेदार राजकुमार दाहालले बताए ।

मिक्लाजुङ गाउँपालिका–१, सरस्वती आधरभूत विद्यालयका प्रधानाध्यापक ५३ वर्षीय श्रेष्ठको हत्या आरोपमा मुद्दा चलाइएकामध्ये ४१ जना फरार छन् ।

चन्दा नदिएको र सुराकी गरेको आरोपमा चन्द समूहका ६ जना कार्यकर्ताले श्रेष्ठलाई घरबाट अपहरण गरी जंगलमा लगेर मंसिर २३ गते हत्या गरेका थिए । प्रहरीले अनुसन्धानपपछि ४२ जनालाई प्रतिवादी बनाएर जिल्ला सरकारी वकिलको कार्यालयमा मुद्दा पेस गरेपछि सोमबार जिल्ला अदालतमा मुद्दा दर्ता भएको हो ।

शिक्षक हत्या आरोपमा चन्द समूहका मोरङ इन्चार्ज डिबी सिलवाल भनिने धनबहादुर विकलाई चन्दा उठाउने क्रममा मोरङ प्रहरीले पक्राउ गरेको छ । सखुुवासभाको मादी नगरपालिका–४, का ३५ वर्षीय विक, कपिलवस्तुको शिवराज नगरपालिका–९ का ५३ वर्षीय विप्लव भनिने नेत्रविक्रम चन्द, रोल्पाको थवाङ गाउँपालिका–१ का ५२ वर्षीय विशम भन्ने सन्तोष बूढामगर, कालीकोटको नरहरिनाथ गाउँपालिका–६ का ५२ वर्षीय खड्गबहादुर विश्वकर्मा, जाजरकोटका ४२ वर्षीय दीपक चलाउनेविरुद्ध अपहरण र कर्तव्य ज्यान मुद्दा दर्ता गरिएको छ ।

चन्द समूहद्वारा हत्या गरिएका मोरङको मिक्लाजुङ–१ का शिक्षक राजेन्द्रकुमार श्रेष्ठ (दायाँ) को घर । यहीँबाट उनी अपहरणमा परेका थिए । तस्बिर : सरोज पोखरेल

यस्तै, मोरङको केराबारी गाउँपालिका ६ का ४५ वर्षीय प्रताप भन्ने थमनसिंह राई, खोटाङ साकेला गाउँपालिका–१ का ४१ वर्षीय शैलेश भनिने चन्द्रबहादुर बुढाथोकी, झापाको गौरीगञ्ज–१ का २६ वर्षीय सञ्जय राई, भोजपुरको षडानन्द नगरपालिका–२ का ४६ वर्षीय विवश भन्ने पुष्पलाल चौलागाई, धनकुटाको सहिदभूमि गाउँपालिका–१ का ३३ वर्षीय दर्शन भन्ने नवीन राई, धनकुटाको पाख्रिबास नगरपालिका–२ का २६ वर्षीय दर्शन थापा भन्ने विशाल मगर, काभ्रेपलाञ्चोकको चौरीदेउराली गाउँपालिका–५ का ५४ वर्षीय आकाश भन्ने माधव गौतम, सखुवासभाको चैनपुर–४ मैदानेका ३० वर्षीय उत्तरकुमार राई भन्ने युवराज राई, भोजपुरको ट्याम्केमैयुम– ७ का ४१ वर्षीय भीम भन्ने कुमार राईविरुद्ध अपहरण तथा कर्तव्य ज्यान मुद्दा दर्ता भएको छ ।

यस्तै, खोटाङको दिपरुङ्चुइचुम्मा गाउँपालिका–७ का ४३ वर्षीय सञ्जीव मगर, सोलुखुम्बुको महाकुलुङ–१ गाईखर्कका ३६ वर्षीय ङवाङनुरु भन्ने पेम्बा शेर्पा, ओखलढुङ्गाको लिखु–७ का ३१ वर्षीय अमृत सागर भन्ने योगेन्द्र बस्नेत, गोर्खाको अजिरकोट गाउँपालिका–३ का ४१ वर्षीय शिलु भन्ने उमा भुजेल, झापाको दमक–२ का ३० वर्षीय सुमनसिंह पौडेल, सोलुखुम्बुको सोताङ–१ का ३५ वर्षीय बालकुमार राई भन्ने राकेश राई, भोजपुरको रामप्रसाद राई गाउँपालिका–४ दलेगाउँका २५ वर्षीय चाम्स भन्ने मिलन राई, सखुवासभाको चैनपुर–४ मैदानेका २२ वर्षीय नाती भन्ने बासन राई, ताप्लेजुङको मिक्वाखोला गाउँपालिका–४ का २२ वर्षीय अखिल भन्ने मनोज भुजेल, वडा नम्बर–१ का २३ वर्षीय लुङ्गा भन्ने सुदम लुङखिम्बाविरुद्ध पनि मुद्दा दर्ता गरिएको छ ।

यस्तै, भोजपुरको पौवादुङ्मा गाउँपालिका–३ का २६ वर्षीय उमेश खत्री, ताप्लेजुङको मिक्वाखोला ५ का २९ वर्षीय संग्राम भन्ने पूर्णबहादुर लिम्बू, धनकुटाका २४ वर्षीय आशिष भन्ने विक्रम राई, मोरङको मिक्लाजुङ–१ का २२ वर्षीय बिर्जुम भन्ने श्रीमान् राई, ताप्लेजुङको मिक्वाखोला–१ का २५ वर्षीय विशाल लिम्बू, ताप्लेजुङको फक्तालुङ गाउँपालिका–२ का २५ वर्षीय संगम आङदम्बे, भोजपुरको पौवादुङ्मा–४ का २४ वर्षीया अनुष्का राई, ताप्लेजुङका २५ वर्षीय हेतु साउदेन, इलामको देउमाई नगरपालिका–७ का ३६ वर्षीय मौसम भन्ने जितमान राई, ४५ वर्षीय अविनाश भन्ने डम्बर मगर र मिक्लाजुङ–८ का ४५ वर्षीय महावीर भन्ने जितेन्द्र महराविरुद्ध मुद्दा दर्ता भएको हो ।

गत मंसिर २३ गते शिक्षक श्रेष्ठको घाँटी रेटेर हत्या गरेको अवस्थामा घरदेखि ५ सय मिटरमा बर्खेको जंगलमा शव भेटिएको थियो । हत्यापछि चन्द नेतृत्वको नेकपाले विज्ञप्ति जारी गरी घटनाको जिम्मेवारी लिएको थियो ।

प्रकाशित : फाल्गुन ४, २०७७ ०९:२७
प्रतिक्रिया
पठाउनुहोस्

परीक्षामा शून्य ल्याएको भन्दै कुटपिट

दुर्गालाल केसी

दाङ — गणितमा शून्य नम्बर ल्याएको भन्दै शिक्षकले विद्यार्थीलाई निर्घात कुटपिट गरेका छन् ।  राजपुर गाउँपालिका–७ को सिक्टा माविका शिक्षक हेमराज विकले गत बिहीबार विद्यार्थीलाई पिटेका हुन् ।

कक्षा १० का केही विद्यार्थीलाई आन्तरिक परीक्षामा शून्य र एक नम्बर ल्याएको भन्दै लाठीले कुटपिट गरेको पाइएको अनुगमनमा गएका अनेरास्ववियुका जिल्ला अध्यक्ष सर्जन परियारले बताए । ‘शर्मिला नेपालीलाई बढी चोट लागेको छ,’ परियारले भने, ‘उनलाई २ हजारको औषधि गर्नुपरेको रै’छ । अरू विद्यार्थीलाई पनि चोट लागेको छ ।’

स्थानीय जनप्रतिनिधिसँगको छलफलमा शिक्षकले माफी मागेको र अब त्यसो नगर्ने प्रतिबद्धता जनाएको उनले बताए । ‘यस्ता शिक्षकलाई तत्काल हटाउनुपर्छ भन्ने हाम्रो माग थियो । शिक्षकले गल्ती स्वीकार गरे,’ उनले भने, ‘विद्यालयमा विज्ञान र गणित शिक्षकको अभाव भएकाले तत्काल हटाउन नसक्ने पाइयो ।’

विक निजी स्रोत शिक्षक हुन् । उनले तीन महिनादेखि विद्यालयमा विज्ञान र गणित पढाइरहेका छन् । विद्यार्थीले लापरबाही गरेकाले सामान्य दण्ड दिएर सुधार्न खोजेको विकले बताए । ‘मैले गल्ती महसुस गरेको छु,’ उनले भने, ‘विद्यार्थीलाई यातना दिने मनसाय होइन ।’ राजपुर गाउँपालिका अध्यक्ष लोकराज केसीले शिक्षकले गलत गरेकाले कारबाही हुनुपर्ने बताए ।

सिक्टा राजपुरको विकट गाउँ भएकाले तत्काल अर्को शिक्षक पाउन कठिन हुने भन्दै अभिभावक उजुरी दिन तयार नभएका हुन् ।

प्रकाशित : फाल्गुन ४, २०७७ ०९:०९
पूरा पढ्नुहोस्
प्रतिक्रिया
पठाउनुहोस्
×