विमानस्थलको लगानी टुंगो नलागेसम्म रुख काट्न दिन्‍नँ : वनमन्त्री आले- समाचार - कान्तिपुर समाचार

विमानस्थलको लगानी टुंगो नलागेसम्म रुख काट्न दिन्‍नँ : वनमन्त्री आले

वैज्ञानिक वन कार्यविधि खारेज
अब्दुल्लाह मियाँ

काठमाडौँ — वन तथा वातावरणमन्त्री प्रेमबहादुर आलेले लगानीको टुंगो नलागेसम्म निजगढ अन्तर्राष्ट्रिय विमानस्थलका लागि रूख कटानको विषय अघि नबढाउने प्रष्ट पारेका छन् ।

“पहिला लगानीको टुंगो लाग्नुपर्‍यो,” बुधबार मन्त्रालयमा आयोजित परिचयात्मक कार्यक्रममा पत्रकारहरुसित आलेले भने, “अर्को कुरा सर्वोच्च अदालतबाट यो विषयमा फैसला हुनुपर्‍यो ।”

निजगढ अन्तर्राष्ट्रिय विमानस्थलसम्बन्धि वातावरणीय प्रभाव मूल्यांकन प्रतिवेदन (ईआईए) खारेज र रूख कटानसम्बन्धी अलग–अलग मुद्दा करिब दुई वर्षदेखि सर्वोच्च अदालतमा विचाराधीन छन् । “सर्वोच्चबाट किनारा नलागेसम्म रुख कटानको विषय कुनै हालतमा अघि बढाउँदिँन”, उनले भने, “यसै त प्रदेश २ मा वन थोरै छ, त्यसैले अनावश्यक हिसाबले रुख काट्नु हुँदैन भन्ने मेरो बुझाइ छ ।”

उनले विमानस्थलको रनवे र अन्य आवश्यक निर्माणबाहेक अनावश्यक हिसाबले हरिया रुख कटानको पक्षमा आफू नभएकोसमेत प्रष्ट्याए । “विमानस्थलसँगै स्मार्ट सिटी बनाउने पनि भनिएको रहेछ”, उनले भने, “त्यसमा मेरो सहमति छैन, रनवेका लागि जति चाहिने हो त्यति मात्रै वनको जग्गा प्रयोग गर्नुपर्छ र आवश्यक क्षेत्रको मात्रै रुख कटान हुनुपर्छ ।”

गेमचेन्जर आयोजनाभित्र राखिएको उक्त विमानस्थल निर्माणका लागि सरकारले अहिलेसम्म लगानीकर्ता भेटेको छैन । जुरिच कम्पनीले यो विमानस्थलबाट हात झिकिसकेको छ । गत साता मन्त्री आलेले विमानस्थल प्रस्तावित क्षेत्रको स्थलगत निरीक्षणसमेत गरेका थिए । “पर्यटन मन्त्रीज्यूको आग्रहमा मैले पनि विमानस्थल बन्ने क्षेत्र गएर हेरें”, उनले सुनाए, “धेरैको विमानस्थल बन्नुपर्छ भन्ने धारणा रहेछ, त्यसमा मेरो पनि सहमति छ तर धेरै रुख विनाश गरिनु हुँदैन भन्ने मेरो बटमलाइन हो ।”

तत्कालीन वनमन्त्री शक्तिबहादुर बस्नेतले स्वीकृत गरेको ईआईए प्रतिवेदनमा साना ठूला गरी २४ लाख रुख काटिने उल्लेख छ । उक्त ईआईए प्रतिवेदन विकाससम्बन्धी अन्य आयोजनाबाट कपी पेस्ट गरी तयार गरिए पनि तत्कालीन वातावरण महाशाखा प्रमुख महेश्वर ढकालले हतारहतार मन्त्री बस्नेतबाट स्वीकृत गराएका थिए । वातावरण र वन विज्ञहरुले उक्त प्रतिवेदन खारेज गर्नुपर्ने अडान लिएका छन् ।

वैज्ञानिक वन कार्यविधि खारेज

सरकारले वैज्ञानिक वन व्यवस्थापनसम्बन्धी कार्यविधि खारेज गरेको छ । गत आइतबारको मन्त्रिपरिषद् बैठकले कार्यविधि खारेज गरेको मन्त्री आलेले बताए । मन्त्री बन्नु अघिदेखि नै वैज्ञानिक वन व्यवस्थापन कार्यक्रमको विपक्षमा रहेका मन्त्री आलेकै प्रस्तावमा उक्त कार्यविधि खारेज भएको हो । मन्त्रिपरिषद्को निर्णयलाई मन्त्रालयका सचिव विश्वनाथ ओलीलगायत सहसचिवहरुले सहज हिसाबले लिएका छैनन् ।

आलेले आयोजना गरेको पत्रकार भेटघाट कार्यक्रममा मन्त्रालयमै भएर पनि सचिव ओलीलगायत सहभागी भएनन् । विगतमा यस्ता पत्रकार सम्मेलनमा सचिवलगायत उपस्थित हुने चलन थियो । “प्रधानमन्त्रीज्यूलाई बिफ्रिङ गर्न नपाएकाले यस्तो निर्णय भएको हो”, मन्त्रालयका प्रवक्ता सहसचिव प्रकाश लम्सालले कान्तिपुरसित भने, “यसमा हामी चुक्यौं ।”

मुलुकभित्रै काठ उत्पादन बढाउने उद्देश्यले सरकारले १० वर्षदेखि वैज्ञानिक वन कार्यक्रम लागू गरेको थियो । यो कार्यक्रमअन्तर्गत् काटिएका लाखौं सीएफटी काठ तराईका जिल्लामा ९ महिनादेखि अलपत्र छ ।

मन्त्री आलेले वैज्ञानिक वनअन्तर्गत काटिएका काठबारे छिट्टै निर्णय गर्ने बताए । “१५ दिनभित्र उपयुक्त विधि अपनाएर सबै काठ खुला गर्छौं”, उनले भने । वैज्ञानिकबाहेकका काठ भने आइतबारको मन्त्रीपरिषदले फुकुवा गरेको छ ।

यो पनि पढ्नुहोस्ः

वैज्ञानिक वनबाहेकका काठ फुकुवा

प्रकाशित : माघ १४, २०७७ १७:३२
प्रतिक्रिया
पठाउनुहोस्

एपीएफ फाइनलमा, डिफेन्डिङ च्याम्पियन पुलिस बाहिरियो

कान्तिपुर संवाददाता

काठमाडौँ — डिफेन्डिङ च्याम्पियन नेपाल पुलिस क्लबको चुनौतीलाई ३० रनले पन्छाउँदै नेपाल एपीएफ क्लब प्रधानमन्त्री कप पुरुष राष्ट्रिय क्रिकेटको फाइनल पुगेको छ ।

भुवन कार्कीको अलराउन्ड प्रदर्शनमा एपीएफ दोस्रोपल्ट उपाधि नजिक पुगेको हो । भुवनले निर्णायक समयमा ४२ रन बनाएपछि टस हारेर ब्याटिङ आएको एपीएफले कीर्तिपुरस्थित त्रिवि क्रिकेट मैदानमा निर्धारित ५० ओभर खेल्दै ९ विकेट गुमाई २ सय ३ रन बनायो । जवाफमा पुलिस ४९.२ ओभरमा १ सय ७३ रनमा आउट हुँदा भुवनले ४ विकेट लिए । बिहीबार वाग्मती प्रदेश र त्रिभुवन आर्मी क्लबबीच अर्को सेमिफाइनल हुनेछ । त्यसको विजेतासँग एपीएफले शनिबार फाइनल खेल्नेछ ।

फिल्डिङका क्रममा घाइते भएका आरिफ शेख उभिनै नसक्ने स्थितिमा पुगेका थिए । एङ्कल दोब्रिएपछि उनको खुट्टा सुन्निएपछि अस्पताल लैजानुपरेको थियो । अस्पतालबाट ब्यान्डेज लगाएर फर्किंदा आरिफलाई उभिन दुई सहयोगी चाहिएको थियो । ४७ औं ओभरमा राशिद खान ३४ रनमा आउट भएपछि सबैलाई आश्चर्यमा पार्दै आरिफ आफैं ब्याटिङ गर्न मैदान पुगे, जतिखेर पुलिसलाई जितनिम्ति ४७ रन चाहिन्थ्यो ।

चोभार इन्डतर्फ सीमित संख्याका दर्शकले ब्याटिङ गरुन्जेल आरिफलाई हौस्याइरहे । एक रन दौडिन हम्मे परेका आरिफले कमलसिंह ऐरीलाई स्ट्रेट छक्का प्रहार गरे । ४९ औं ओभरको पहिलो दुई बलमा अविनाश बोहरालाई लगातार दुई चौका प्रहार गरेका आरिफले उनै अविनाशको बलमा आउट हुनुपूर्व १४ बल खेल्दा १६ रन बनाए । जोखिम मोलेर ब्याटिङ गरेका आरिफलाई प्रतिद्वन्द्वी टोलीका कप्तान शरद भेषावकरसहितले प्रंशसा गरे ।

पुलिसबाट पवन सर्राफले सर्वाधिक ४० रन बनाए । ६१ बलमा २ चौका र १ छक्का प्रहार गरेका उनी आउट हुँदा पुलिस ४१ ओभरमा १२५–७ को स्थितिमा थियो । कुशल भुर्तेल शून्य, सुनील धमला ३ र अमित श्रेष्ठ ८ रनमा आउट भएपछि पुलिसले सुरुदेखि दबाबमा खेल्नुपरेको थियो । दीपेन्द्रसिंह ऐरी र अनिल साहले चौथो विकेटमा ४६ रनको साझेदारी गरे । यी दुईले एपीएफले छाडेका एक दर्जनको क्याचको फाइदा पूरा उठाउन सकेनन् ।

कमलले अनिललाई २१ रनमा बोल्ड गरे । उनले ४० बलमा ३ चौका प्रहार गरे । दीपेन्द्र ३३ रन बनाई शरदको बलमा विकेटकिपर सुवास खकुरेलबाट समातिए । दीपेन्द्रले ६९ बल खेल्दै २ चौका प्रहार गरे । कप्तान मन्जित श्रेष्ठ ३ र राशिद आउट भएपछि आरिफ ब्याटिङमा आएका थिए । राशिदले ५१ बलमा ३ चौका र १ छक्का प्रहार गरे । आउट हुने अन्तिम खेलाडी सागर ढकालले ११ रन बनाए ।

भुवनको हालत पनि आरिफकै जस्तो थियो । फिल्डिङका क्रममा चोट लागेका उनी मैदान बाहिर बस्नुपरेको थियो । पुनः मैदान छिर्दै उनले थप २ विकेट लिए । भुवनले ९.२ ओभरमा १ मेडन राख्दै २१ रन खर्चेर कुल ४ विकेट लिए । शरदले १० ओभरमा ३६, अविनाशले ३१ र कमलले ५२ रन खर्चेर २–२ विकेट लिए ।

आशिफ शेख १, सुवास १९, शरद १८ र सुमित महर्जन १ रनमा आउट भएपछि यसअघि १४ औं ओभरमा ४३–४ को स्थितिमा पुगेको एपीएफलाई शंकर राना, सन्दीप जोरा र भुवनले उकासेका थिए । शंकर र सन्दीपले पाँचौं विकेटमा ६४ रनको साझेदारी गरे । सन्दीप ४३ बलमा ३ चौका र १ छक्का प्रहार गरी ३४ रनमा आउट भए । शंकरले ९६ बल खेल्दै ४ चौका मदतमा ४४ रन बनाए ।

अमरसिंह राउटेला ४ रनमा आउट भएपछि भुवनले कमलसँग आठौं विकेटमा ३८ रनको साझेदारी गरे । कमलले १३ बलमा २ चौकासहित १९ रन बनाए । भुवनले ५६ बलमा १ चौका र २ छक्का प्रहार गरे । इनिङ्सको अन्तिम दुई बलमा छक्का र चौका प्रहार गरेका अविनाश ११ रन (५ बल) अविजित रहे । राशिदसँग नयाँ बल लिएर आएका आरिफले लगातार १० ओभरमा १ मेडन राखेर ३१ रन दिई ३ विकेट लिए । ललितनारायण राजवंशी र दीपेन्द्रले २–२ तथा राशिद र सागरले १–१ विकेट लिए ।

प्रकाशित : माघ १४, २०७७ १७:३१
पूरा पढ्नुहोस्
प्रतिक्रिया
पठाउनुहोस्
×