अमेरिकी राजदूत बेरीले भेटे देउवालाई- समाचार - कान्तिपुर समाचार

अमेरिकी राजदूत बेरीले भेटे देउवालाई

कान्तिपुर संवाददाता

काठमाडौँ — प्रधानमन्त्री केपी शर्मा ओली र नेकपा अध्यक्ष पुष्पकमल दाहालपछि अमेरिकी राजदूत र्‍यान्डी बेरीले सोमबार बेलुकी कांग्रेस सभापति शेरबहादुर देउवासँग पनि भेटवार्ता गरेका छन् ।

बूढानीलकण्ठस्थित देउवा निवासमा उनीहरूबीच अमेरिकाका नयाँ राष्ट्रपति जो बाइडेन प्रशासनको प्राथमिकताबारे छलफल भएको थियो । बेरीले बाइडेन प्रशासनका प्राथमिकताबारे देउवालाई जानकारी गराएका थिए ।

बाइडेनले कार्यभार सम्हालेयता अमेरिकाले लोकतन्त्रलाई सुदृढ पार्ने, जलवायु परिवर्तनका विरुद्ध लड्ने र विश्वभर महिलाअधिकारको उत्थान गर्ने विषयमा प्रतिबद्धता जनाइरहेका छन् । जसलाई राजदूत बेरीले ओली, दाहाल र देउवासँगको भेटवार्तामा पनि दोहोर्‍याएका थिए ।

देउवासँगको भेटपछि आफ्नो ट्विटमा बेरीले नयाँ राष्ट्रपतिका प्रशासनको विश्व प्राथमिकताबारे छलफल गर्न आफूले नेपाल सरकार र राजनीतिक दलका नेताहरूसँग भेटवार्ता गरिरहेको उल्लेख गरेका छन् ।

बेरीले ओलीसँग माघ ८ गते बालुवाटार पुगेर भेटवार्ता गरेका थिए । त्यस्तै दाहालसँग सोमबार बिहान खुमलटार पुगेर भेटवार्ता गरेका थिए ।

प्रकाशित : माघ १३, २०७७ १२:३३
प्रतिक्रिया
पठाउनुहोस्

जसले दोहोरो संक्रमण भोगे

वर्षौंदेखि एचआईभी संक्रमण भोग्दै आएकाहरु कोरोनाको पनि चपेटामा परे तर हार मानेनन् । हालसम्म ३० जना एचआईभी संक्रमितमा कोरोना पुष्टि भएकामा सबै निको भएका छन् ।
फातिमा बानु

काठमाडौँ — तीन दशकदेखि एचआईभी संक्रमणसँग जुध्दै आइरहेकी ४७ वर्षीया सुनिता डंगोल (नाम परिवर्तन) लाई गत कात्तिकको एक दिन शरीर करकरी खायो । ज्वरो आउने, चिटचिट पसिना आउने, शरीर कमजोर हुने जस्ता कोरोना संक्रमण हुँदा देखिने सबैजसो लक्षण देखिए ।

उनलाई लाग्यो, ‘शरीरमा पहिल्यैदेखि भाइरस थिए, अब नयाँखाले भाइरस पनि थपिए, जीवन यति नै रहेछ ।’

परीक्षणपछि उनलाई कोरोना संक्रमण पुष्टि भयो । त्यतिबेला शारीरिक र मानसिक दुवै अवस्थाले शिथिल महसुस गरेको उनले सुनाइन् । संक्रमणको जोखिम छ भनेर थाहा हुँदाहुँदै पनि उनी सामाजिक कार्यमा खटिएकी थिइन्, महामारीबीच पनि एचआईभी संक्रमितहरूको अधिकारका लागि लागिपरेकी थिइन् । कहाँ, कोबाट संक्रमण सर्‍यो, उनलाई हेक्का पनि रहेन ।

‘शारीरिक र मानसिक छटपटीले काठमाडौंमा बस्नै मन लागेन,’ उनले भनिन्, ‘मरे पनि गाउँमै मर्छु जस्तो लाग्यो, संक्रमित भएको पाँच दिनमा छोरी लिएर गाउँ गएँ ।’ गाउँमा पनि उनी लामो समयसम्म थला परिन्, लक्षण कम हुँदै गएपछि भने उनलाई अब बाँच्छु कि भन्ने आशा जाग्यो ।

निको भइसकेपछि उनी आफूजस्तै एचआईभी र कोरोना दुवै संक्रमण भएकालाई हौसला दिन सक्रिय छिन् । ‘हाम्रो शरीरमा यसै पनि रोगसँग लड्ने क्षमता कम हुन्छ,’ उनले भनिन्, ‘त्यसैले धेरैलाई कोरोना संक्रमण थपिएपछि मरिन्छ नै भन्ने लाग्छ तर त्यस्तो हुँदैन रहेछ ।’

उनीजस्तै ३५ वर्षीया अर्की एचआईभी संक्रमित तारा महतो (नाम परिवर्तन) पनि कोरोना संक्रमणमुक्त भइन् । उनी १९ वर्षअघिदेखि एचआईभी संक्रमणसँग जुझ्दै आइरहेकी छन् । गत दसैंताका एकाएक गन्ध थाहा नपाउने, शरीर दुख्ने, थकान हुनेजस्ता लक्षण देखिएपछि उनी आत्तिइन् । परीक्षणपछि उनलाई पनि कोरोना संक्रमण पुष्टि भयो । ‘२० दिन क्वारेन्टाइनमा बसें, गम्भीर लक्षण पनि केही देखिए,’ उनले भनिन्, ‘बिस्तारै लक्षण हराउँदै गयो, डर पनि हरायो ।’ अहिले उनी संक्रमणमुक्त छिन्, उस्तै स्वस्थ र आत्मविश्वासी पनि ।

राष्ट्रिय एचआईभी महासंघकी महासचिव इन्द्रा भुसालका अनुसार अझै पनि धेरै एचआईभी संक्रमितमा कोरोना संक्रमणले ज्यानै जान्छ कि भन्ने डर यथावत् छ । रोगसँग लड्ने क्षमता कम हुनु, दीर्घ रोग लाग्दाझैं जीवनभर औषधि खानुपर्ने भएकाले उनीहरूमा त्रास रहेको उनले बताइन् । संघले समुदायमा जाने, दोहोरो संक्रमण भएकालाई परामर्श दिने, औषधि छुटेकालाई घरमै औषधि पुर्‍याउन पहल गरिरहेको छ ।

एचआईची संक्रमितले भाइरससँग लड्ने एन्टिभाइरल औषधि खाइरहने भएकाले उनीहरूमा कोरोना संक्रमणले कम असर गरेको मान्छन्, सहिद शुक्रराज ट्रपिकल तथा सरुवा रोग अस्पतालका सरुवा रोग विशेषज्ञ डा. शेरबहादुर पुन । ‘एन्टिभाइरल औषधि खाएकै कारण उनीहरूलाई कोरोनासँग लड्ने शक्ति मिलेको हो भन्ने कुनै वैज्ञानिक तथ्य पत्ता लागेको भने छैन,’ उनले भने, ‘यो वर्गका व्यक्तिमा कम संक्रमण हुनु, कोही गम्भीर र मृत्यु नहुने तथ्य भएको आधारमा भने यस्तो हो कि भनेर अड्कल काट्न सकिन्छ ।’

दोहोरो संक्रमण हुँदैमा नडराउन, जनस्वास्थ्यका मापदण्ड अपनाउन उनले एचआईभी संक्रमितलाई सुझाए । स्वास्थ्य सेवा विभागको राष्ट्रिय एड्स तथा यौन रोग नियन्त्रण केन्द्रको सन् २०१८ सम्मको तथ्यांकअनुसार नेपालमा ५४ हजारको हाराहारीमा एचआईभी संक्रमित छन् । जसमध्ये ३० जनालाई कोरोना संक्रमण पुष्टि भएको केन्द्रका जनस्वास्थ्य प्रशासक मदनकुमार श्रेष्ठले बताए ।

‘एचआईभी संक्रमितलाई कोरोना संक्रमण कम भएको जस्तो लाग्छ, तर यसबारे कुनै अध्ययन भने गरेका छैनौं,’ उनले भने, ‘महामारीका बेलामा कुनै संक्रमितको पनि औषधि नछुटोस् भनेर विभिन्न संस्थाहरूको सहयोगमा संक्रमितको घरसम्मै औषधि पुर्‍याउने व्यवस्था भने गरेका छौं ।’ उनका अनुसार नेपालमा हालसम्म एचआईभी संक्रमितको कोरोना संक्रमणका कारण मृत्यु भएको पुष्टि भएको छैन ।

प्रकाशित : माघ १३, २०७७ १२:३०
पूरा पढ्नुहोस्
प्रतिक्रिया
पठाउनुहोस्
×