निर्वाचन तोकिएकै मितिमा हुन्छ : प्रधानमन्त्री ओली- समाचार - कान्तिपुर समाचार

निर्वाचन तोकिएकै मितिमा हुन्छ : प्रधानमन्त्री ओली

‘निर्वाचनमा जान डराउने अनि लोकतन्त्रका कुरा गर्ने ? मैले शासनमा बसिरहन्छु भनेको छैन । जनताको मत लिने भनेको छु ।’
दुर्गालाल केसी

दाङ — प्रधानमन्त्री केपी शर्मा ओलीले निर्वाचन तोकिएकै मितिमा हुने दाबी गरेका छन् । लुम्बिनी प्रदेशको राजधानी राप्ती उपत्यकाको लालमटियामा सोमबार नेकपा (ओली समूह) ले आयोजना गरेको सभालाई सम्बोधन गर्दै उनले जनताको फैसला लिन आतुर रहेको बताए ।

उनले आफू जबर्जस्ती प्रधानमन्त्री बन्न नखोजेको बताए । ‘के मैले जनताले भनेको मान्दिनँ, जबर्जस्ती प्रधानमन्त्री हुन्छु भनेको छु र ? म के दुई ठाउँमा चुनाव हारेर पनि प्रधानमन्त्री हुने जस्केलाको बाटो हिँडेको छु र ?’ उनले भने, ‘अध्यक्ष हारेपछि मलाई अध्यक्ष चाहियो भनेर केटाकेटीजस्तो क्याङक्याङ गरेको छु र ? त्यो मेरो तरिका होइन । मेरो तरिका जनताको बीचमा जाने हो ।’

जनताको साथ लिएर देश बनाउने उद्देश्य रहेको उल्लेख गर्दै उनले त्यस उद्देश्यलाई असफल बनाउन केही नेता लागिपरेको बताए । जनताको मत लिन खोज्नु गलत नभएको र कसैले असफल बनाउन खोज्दैमा नहुने उनले बताए । ‘म असफल हुन्नँ, जनता असफल हुँदैनन् । मैले जनताको बीचमा जान्छु भनेको छु । के यो गलत हो ?’ उनले भने, ‘निर्वाचनमा जान डराउने अनि लोकतन्त्रका कुरा गर्ने ? मैले शासनमा बसिरहन्छु भनेको छैन । जनताको मत लिने भनेको छु ।’

सरकारको नेतृत्व गर्दा पनि कुनै हिसाबले काम गर्न नदिएपछि प्रतिनिधिसभा विघटनको निर्णयमा पुगेको उनले बताए । ‘अलिकति अगाडि बढ्न खोज्यो, खुट्टा समाउँछन्, फेरि अलिकति अगाडि बढ्न खोज्यो दौराको फेर समाउँछन्,’ उनले भने, ‘कामै गर्न नदिएपछि जनताले नै दण्डित गरुन् भनेर चुनाव घोषणा गरेको हुँ । अब त्यस्ता गलत तत्त्वलाई जनताले नै ठीक गर्छन् ।’

कोही नेताले हिंसाको धम्की दिँदैमा अब कोही नडराउने उनले बताए । चौतारी र रेस्टुरेन्टमा बसेर आफैंलाई अध्यक्ष भएँ भनेर घोषणा गर्दैमा नहुने उनको भनाइ थियो । ‘रेस्टुरेन्टमा बसेर आफैंलाई अध्यक्ष घोषणा गरिदिने ? त्यसलाई पनि निर्वाचन आयोगले खत्तम पारिदिएको छ, कोही अध्यक्ष भएका छैनौ भनेर,’ उनले भने, ‘पार्टीको बैठकमा नआएर रेस्टुरेन्टमा बसेर केपी ओलीलाई साधारण सदस्यबाट पनि निकाले रे ! तपाईंहरूलाई हाँसो लागेन यो सुनेर ?’

जनताको साथ लिएर देशलाई धेरै अगाडि बढाउने सपना देखेको उनले बताए । अब कोही पनि भोकै नपर्ने र भोकै नमर्ने अवस्था आउन थालेको उनले बताए । ‘हामी कसैलाई भोकै मर्न दिँदैनौं, गरिबी हटाउने अभियानमा छौं,’ उनले भने, ‘हामीले एकै दिन ३ सय ९ वटा अस्पताल शिलान्यास गरेका छौं,’ उनले भने, ‘यस्ता असाधारण काम कतै भएका छैनन् । हामी देशमा धेरै काम गर्न चाहन्छौं । यसका लागि सबैको साथ चाहिएको छ ।’

सडक, शिक्षा, भूकम्पले भत्काएका संरचना पुनर्निर्माणजस्ता काममा सरकारले ध्यान दिएको उनले बताए । ‘वन भएका सडकमा चार लेन र नभएकामा ६ लेनको सडक बनाउँदै छौं,’ उनले भने, ‘पुल, बाटा धेरै बनेका छन् । सबैलाई थाहा छ । जनता विकासको पक्षमा छन्, सरकार यसको नेतृत्व गरिरहेको छ ।’

भौतिक पूर्वाधारमन्त्री वसन्त नेम्वाङ, खानेपानीमन्त्री मणि थापा, लुम्बिनी प्रदेशका मुख्यमन्त्री शंकर पोखरेल, नेताहरू शान्ता चौधरी, रेवतीरमण शर्मालगायतले पनि सभालाई सम्बोधन गरेका थिए ।

प्रकाशित : माघ १३, २०७७ ०७:४५
प्रतिक्रिया
पठाउनुहोस्

महासंघको कर तथा राजस्व समिति विस्तार

कान्तिपुर संवाददाता

काठमाडौँ — नेपाल उद्योग वाणिज्य महासंघको कार्यकारिणी समिति सदस्य सन्दीपकुमार अग्रवाल कर तथा राजस्व समितिको सभापति चयन भएका छन् ।

समितिमा गोविन्द ढुंगेल, पूर्वकारिणी समिति सदस्य कृष्णप्रसाद दुलाल र लक्ष्मी ग्रुपका निर्देशक नीरञ्जन श्रेष्ठ पनि चुनिएका छन् । त्यस्तै समिति सदस्यमा फ्रेट फरवार्डर एसोसिएसन अफ नेपालका प्रथम उपाध्यक्ष राजेन्द्र संग्रौला र नेपाल औषधि उत्पादक संघका निवर्तमान अध्यक्ष दीपकप्रसाद दाहाल छन् ।

समितिको आमन्त्रित सदस्यमा महासंघको उद्योग समिति सभापति भरतराज आचार्य, निर्यात प्रवर्द्धन समितिका सभापति मनीषलाल प्रधान, व्यापार समितिका सभापति विजय सिंह वैद्य, अन्तर्राष्ट्रिय लगानी प्रवर्द्धन समितिका सभापति आनन्दकुमार वगाडिया, बैंक, वित्तीय तथा बिमा समितिका सभापति साहिल अग्रवाल छन् ।

महासंघका अध्यक्ष शेखर गोल्छाले समितिमा विभिन्न जिम्मेवारीमा चयन भएका सदस्यलाई औपचारिक पत्र हस्तान्तरण गरे । अध्यक्ष गोल्छाले महासंघ सचिवालयमा कर राजस्वसम्बन्धी समस्या एवं गुनासो सम्बोधन गर्न एक इकाइ स्थापना गर्ने योजना रहेको पनि सुनाए ।

प्रकाशित : माघ १३, २०७७ ०७:३३
पूरा पढ्नुहोस्
प्रतिक्रिया
पठाउनुहोस्
×