११ दलसँग आयोगको छलफल- समाचार - कान्तिपुर समाचार

११ दलसँग आयोगको छलफल

दलका प्रतिनिधिबीच निर्वाचनको विषयमा मत बाझियो
जगदीश्वर पाण्डे

काठमाडौँ — निर्वाचन आयोगले वैशाख १७ र २७ का लागि घोषित निर्वाचन प्रक्रियामा सक्रियतापूर्वक सहयोग गर्न राजनीतिक दलहरूलाई आग्रह गरेको छ । सरकारले पुस ५ गते प्रतिनिधिसभा विघटन गरेर निर्वाचनको नयाँ मिति तोकेपछि आयोगले आइतबार ११ वटा राजनीतिक दलका प्रतिनिधिलाई बोलाएर निर्वाचन प्रक्रियाबारे छलफल गरेको हो ।

प्रमुख निर्वाचन आयुक्त दिनेशकुमार थपलियाले आ–आफ्नो मातहतका प्रदेश, जिल्ला, स्थानीय तह, वडास्तरीय समिति तथा भ्रातृ संगठनमार्फत निर्वाचन कार्यक्रममा सक्रिय सहभागिता, समन्वय र सहयोगका लागि दलहरूलाई अनुरोध गरे ।

तर आयोगको छलफलमा निर्वाचनलाई लिएर दलका प्रतिनिधिहरूको मत बाझिएको छ । उनीहरूले निर्वाचनको पक्ष–विपक्षमा धारणा राखे । नेकपा (ओली समूह) बाट प्रधानमन्त्रीका कानुनी सल्लाहकारसमेत रहेका बाबुराम दाहालले निर्वाचनको पक्षमा आफ्नो विचार राखेका थिए । बैठकमा सहभागी एक प्रतिनिधिका अनुसार दाहालले सरकारको घोषणाअनुसार निर्वाचन हुनुपर्ने सुझाव दिए । ‘राजनीतिक दलहरू जनतामा जान डराउनुभएन । यो स्वाभाविक प्रक्रिया हो,’ दाहालले भनेका थिए । नेकपा (दाहाल–नेपाल समूह) का नेताद्वय लीलामणि पौडेल र राजेन्द्र पाण्डेले भने निर्वाचन प्रक्रिया नै वैधानिक नभएको दाबी गरेका थिए । ‘आयोगको तयारी आफ्नो ठाउँमा छ । तर यसको प्रारम्भिक प्रक्रियाप्रति पार्टीको असन्तुष्टि हो,’ उनीहरूको धारणा थियो ।

कांग्रेस नेता आनन्दप्रसाद ढुंगानाले सरकारको निर्वाचन घोषणा विवादित बने पनि निर्वाचनमा कांग्रेस सहभागी हुने र आयोगले यसको तयारी गर्नु स्वाभाविक भएको बताए । आयोगका प्रवक्ता तथा सहसचिव राजकुमार श्रेष्ठले जारी गरेको विज्ञप्तिमा मतदाता नामावली दर्ता कार्यक्रम ७७ जिल्ला निर्वाचन कार्यालयबाट हुँदै आएकामा निर्वाचनको मिति घोषणापश्चात् कानुनी व्यवस्थाबमोजिम उक्त कार्य स्थगन गरिएको जानकारी दिएका छन् । मतदाता नामावली अद्यावधिक कार्य चुस्तदुरुस्त सम्पन्न गर्न/गराउन र मतदानस्थल तथा केन्द्र निर्धारणसम्बन्धी कार्यमा राजनीतिक दलहरूका तर्फबाट सक्रिय र प्रभावकारी भूमिका निर्वाह गर्न उनले अनुरोध गरेका हुन् ।

आयोगले निर्वाचनका लागि मतदान केन्द्र र मतदानस्थल निर्धारण कार्यविधि–२०७७, निर्वाचन व्यवस्थापनमा लैंगिक तथा समावेशी नीति–२०७७ र निर्वाचन व्यवस्थापनमा मानव संसाधन नीति–२०७७ स्वीकृत गरी कार्यान्वयनमा ल्याइसकेको छ । सामाजिक सञ्जाल व्यवस्थापन नीति, निर्वाचन आचारसंहिता, प्रदेश र स्थानीय तहमा निर्वाचन सम्पर्क व्यक्ति तोक्नेलगायतका कार्य अन्तिम चरणमा रहेको तथा निर्वाचन व्यवस्थापनका सबै कार्य व्यवस्थित र योजनाबद्ध भइरहेको समेत आयोगले जनाएको छ ।

आयोगका अनुसार बैठकमा उपस्थित दलका प्रमुख एवम् प्रतिनिधिले मतदान केन्द्र र मतदानस्थल निर्धारण गर्दा भौगोलिक विकटता, केन्द्र तथा स्थलको सेवा सुविधा, मतदाताको सहज पहुँचको अवस्था र भौतिक पूर्वाधारको अवस्थालाई समेत ध्यान दिनुपर्ने सुझाव दिएका छन् ।

मतदाता नामावलीमा उजुरी र दाबी विरोधका लागि निर्धारित समय कम भएकाले थप हुनुपर्ने, प्रचारप्रसार व्यवस्थित बनाउनुपर्ने, १८ वर्ष उमेर पूरा गरेका सबै मतदाताले मतदान गर्न पाउने सुनिश्चितता गर्नुपर्ने र निर्वाचन खर्चको पारदर्शिता हुनुपर्ने विषयमा पनि उनीहरूले कुरा राखेका थिए । उनीहरूले विदेशमा रहेका नेपालीले समेत मताधिकारको प्रयोग गर्न पाउने व्यवस्था हुनुपर्ने, कोरोना भाइरसको स्वास्थ्य प्रोटोकल निर्धारण गर्नुपर्नेलगायतका सुझाव दिएका थिए ।

प्रकाशित : माघ ५, २०७७ ०७:५४
प्रतिक्रिया
पठाउनुहोस्

दाहालको प्रश्‍न : ‘केपीको सेटिङको रहस्य के हो ?’

कान्तिपुर संवाददाता

काठमाडौँ — नेकपा (दाहाल–नेपाल) का अध्यक्ष पुष्पकमल दाहालले निरंकुशता लादेर मुलुकलाई अँध्यारो सुरुङमा हाल्ने षड्यन्त्र भइरहेको दाबी गरेका छन् । उनले यसको संकेतका रूपमा ‘सेटिङ’ का कुरा सुनिन थालेको बताए ।

फाइल फोटो । कान्तिपुर

‘यहाँ निकै ठूलो षड्यन्त्र भइराखेको छ । इतिहासलाई पूरै धकेल्ने, घुमाएर निरंकुशताको ठाउँमा पुर्‍याउने र देशलाई अँध्यारो युगमा हाल्ने षड्यन्त्र भएको छ । खुब सुनिन्छ नि आजभोलि, सेटिङ भइसक्यो रे । यो सेटिङ भन्ने शब्द अहिले डरलाग्दो छ,’ राजधानीमा आइतबार अनेरास्ववियुको कार्यक्रमलाई सम्बोधन गर्दै दाहालले भने ।

दाहालले अदालत र निर्वाचन आयोगमा पनि प्रधानमन्त्री केपी शर्मा ओलीले राजनीतिक निर्णय हुनुपर्छ भनिरहेको बताए । तर आफूहरूको विश्वास अदालत र आयोगप्रति रहेको उनको भनाइ थियो । ओली र उनका मान्छेले अदालत र आयोगलाई समेत धम्क्याउँदै हिँडेको दाहालले बताए । ‘केपी र उनी नजिकका मान्छेहरूले सेटिङ भइसक्यो, सूर्य हाम्रै हुन्छ, अदालतले पनि हामीले भनेअनुसार नै गर्छ भनेको देख्दा यो सेटिङ शब्दभित्र के रहस्य हो भन्ने चिन्ता लागेको छ,’ उनले भने, ‘म यो मञ्चबाट सर्वोच्च अदालत र निर्वाचन आयोगलाई शंका गर्न चाहन्नँ । केपीको सेटिङलाई त शंका गर्न पाइयो नि हामीले ?’

दाहालले कुनै पनि षड्यन्त्रपूर्ण र प्रतिगामी गतिविधि रोक्न ‘प्रतिक्रान्तिकारीहरू’ को मुटु हल्लिने खालको आवेगमय आन्दोलन चाहिएको बताए । ओलीले ‘शाकाहारी’ आन्दोलनलाई नगन्ने उल्लेख गर्दै दाहालले भने, ‘हाम्रो आन्दोलन अलि आवेगमय हुनुपर्‍यो, अलि जुझारु, आक्रामक हुनुपर्‍यो । शाकाहारी जस्तो हुनु भएन । बाघ, सिंह गर्जे जस्तो हुनुपर्ने भयो । प्रतिक्रान्तिकारीहरूको मुटु हल्लिनुपर्‍यो ।’

प्रतिगमनलाई कुनै हालतमा सफल हुन नदिने उल्लेख गर्दै दाहालले कार्यकर्ताको रक्षाका लागि आन्दोलनको अग्रपंक्तिमा आफू हुने बताए । उनले कार्यकर्तालाई जोगाउन आफ्नो टाउको फुटाउन पनि तयार रहेको दाबी गरे । ‘माघ ९ गतेको प्रदर्शनमा हामी अग्रपंक्तिमा हुन्छौं । हिजो गिरिजाबाबु, माधव, झलनाथजीहरूले लाठी खाएजस्तै किन–किन मेरो टाउको चिलाएको हो कि के हो ? तपाईंहरू पछाडि, म अगाडि बस्छु । लाठी खान मन लागेको छ । म त्यो स्पिरिटमा छु,’ दाहालले भने, ‘यो प्रतिगमनलाई कुनै हालतमा सफल हुन दिइने छैन । हजारौं सहिद र योद्धाको सपना खेर जाने छैन ।’

सिंगो देश ओलीको असंवैधानिक कदमको विरोधमा उभिएको उल्लेख गर्दै दाहालले त्यसको नेतृत्व आफूहरूले लिनुपर्ने बताए । ‘खुसीको कुरा, केपीको कदमको विरोधमा प्रायः सबै जनता, सबै सेक्टर छन् । आन्दोलनका लागि योभन्दा राम्रो जनमत हुन सक्दैन । यति ठूलो जनमतको स्विच दबाउने काम गर्नु छ । त्यसको नेतृत्व हामीले लिनु छ,’ उनले भने । उनले आक्रामक र जुझारु ढंगले जाने गरी आन्दोलनका कार्यक्रम बनाउन कार्यकर्तालाई निर्देशन दिए । ‘राजा–महाराजाहरूको श्रीपेच निकालेर फुटबल खेलेको इतिहास छ । देशलाई प्रतिक्रान्तिको भड्खालो र अँध्यारोमा हालेको हेर्न सकिँदैन । हिजो पनि मर्न हिँडेका हौं । जरुरी पर्छ भने मर्न तयार, तर झुक्न तयार छैनौं,’ दाहालले भने ।

यसअघि आइतबार नै दाहाल–नेपाल पक्षीय राष्ट्रिय युवा संघ नेपालको केन्द्रीय कमिटी बैठकमा दाहालले लामो राजनीतिक आन्दोलनबाट प्राप्त नयाँ संविधानमाथि प्रधानमन्त्री ओलीले प्रहार गरेकाले आफूहरू आक्रामक हुनुपर्ने बाध्यता सिर्जना भएको बताएका थिए ।

प्रकाशित : माघ ५, २०७७ ०७:३५
पूरा पढ्नुहोस्
प्रतिक्रिया
पठाउनुहोस्
×