भारतले ईपीजी रिपोर्ट बुझ्नुपर्छ : परराष्ट्रमन्त्री ज्ञवाली

‘भारतको कुरा जवाफ दिने म सही व्यक्ति होइन । रिपोर्टका सम्बन्धमा बुझाई र दृष्टिकोण फरक छ भन्ने लाग्छ । तर, रिपोर्ट एउटा वास्तविकता हो । त्यसले यसलाई बुझ्नुपर्छ,’ ज्ञवालीले भने । त्यसैगरी उनले रिपोर्टलाई अध्ययन गरेर क्रमश: कार्यान्वयनमा लैजानुपर्ने बताए ।

२०७३ सालमा नेपाल र भारतबीच रहेका १९५० लगायतका सन्धि र सम्झौता पुनरावलोकनका लागि सुझाव दिन ईपीजी गठन गरिएको थियो । ईपीजीको दुई वर्षे समयावधि २० असार २०७५ मा सकिएको हो । गत वर्ष असार १५–१६ मा काठमाडौंमा बसेको ईपीजीको अन्तिम बैठकले सुझावहरु समेटेर संयुक्त प्रतिवेदनलाई अन्तिम रुपमा दिएको थियो । सोही बैठकले रिपोर्टलाई टुंगो लगाउँदै दुवै देशका प्रधानमन्त्रीलाई बुझाउने निर्णय गरेको थियो । त्यसपछि मात्र रिपोर्ट सार्वजनिक गर्ने सहमति भएको थियो । तर, संयुक्त प्रतिवेदन तयार भएको साढे दुई वर्ष बितिसक्दा पनि भारतले रिपोर्ट बुझ्न आनाकानी गर्दै आएको छ ।

शुक्रबार नयाँदिल्लीमा सम्पन्न नेपाल–भारत परराष्ट्रमन्त्रीस्तरीय संयुक्त आयोगको बैठकमा पनि नेपाली पक्षले यो विषयलाई उठाएको थियो । त्यसअघि भारतीय विदेश मन्त्री एस जयंशकरसँगको भेटमा पनि मन्त्री ज्ञवालीले ईपीजी मुद्दा उठाएका थिए । तर, ती दुवै छलफलमा भारतीय पक्षले ईपीजी रिपोर्टका बारेमा प्रस्ट धारणा नराखेको स्रोतले बताएको छ । जसले गर्दा भारतले उक्त रिपोर्ट कहिले बुझ्ने भन्ने अन्यौल कायमै रहने निश्चित भएको छ ।

सम्बन्धित समाचार

भारतीय रक्षामन्त्री सिंहसँग परराष्ट्रमन्त्री ज्ञवालीको भेटवार्ता