केयू उपकुलपतिमा ४४ प्रतिस्पर्धी- समाचार - कान्तिपुर समाचार
कान्तिपुर वेबसाईट
AdvertisementAdvertisement

केयू उपकुलपतिमा ४४ प्रतिस्पर्धी

सक्षम र नैतिकवान व्यक्ति नियुक्ति गर : डा. केसी
सुदीप कैनी

काठमाडौँ — काठमाडौं विश्वविद्यालय (केयू) को उपकुलपति बन्‍न ४४ जनाले आफ्नो व्यक्तिगत विवरण सिफारिस समितिलाई बुझाएका छन् । उपकुलपति नियुक्त गर्न गठित सिफारिस समितिले व्यक्तिगत विवरण बुझाउन सार्वजनिक रुपमा सूचना जारी गरेको थियो ।

त्यसअनुसार पुस २७ गतेभित्र ४४ आवेदन परेको शिक्षा मन्त्रालयले स्रोतले जनाएको छ । विश्वविद्यालय सभाले शिक्षामन्त्री एवं सहकुलपति कृष्णगोपाल श्रेष्ठको अध्यक्षतामा ३ सदस्यीय समिति गठन गरेको थियो ।

केयूमा उपकुलपति नियुक्त गर्न पहिलो पटक सार्वजनिक रुपमा गरिएको दरखास्त आह्वानमा ३७ जना प्राध्यापकले व्यक्तिगत विवरण बुझाएका स्रोतले जानकारी दियो । बाँकी व्यक्तिगत विवरण सहप्राध्यापक, उपप्राध्यापक र प्राज्ञिक क्षेत्र बाहिरका व्यक्ति रहेका छन् । वर्तमान उपकुलपति रामकण्ठ माकाजु, पूर्व रजिष्ट्रारहरु भद्रमान तुलाधर, भोला थापा, शिक्षाविद् मनप्रसाद वाग्ले, प्राध्यापक जर्नादन लामिछाने लगायतले विवरण पेश गरेका छन् । खगेन्द्रप्रसाद लामिछाने, विरेन्द्रराज तिवारी, निलाम्बर झा, विभुतिरञ्जन झाले पनि व्यक्तिगत विवरण बुझाएको स्रोतले जनायो ।

सिफारिस समितिले बुधबार व्यक्तिगत विवरणहरुको रुजु गरेको थियो । व्यक्तिगत विवरणको अध्ययन गरेर माघ ५ गते पुन: समितिको बैठक बस्‍ने कार्यतालिका छ । समितिमा संस्थापक उपकुलपति सुरेशराज शर्मा र विश्वविद्यालय संरक्षण समितिका अध्यक्ष दमननाथ ढुंगाना सदस्य छन् ।

सिफारिस समितिले ३ जनाको नाम सिफारिस गर्ने र तीमध्ये १ जनालाई कुलपति तथा प्रधानमन्त्रीले उपकुलपति नियुक्ति गर्ने व्यवस्था छ । अघिल्लो पटक पनि भोला थापा र जर्नादन लामिछानेसहित माकाजुको नाम सिफारिस भएको थियो । ४ वर्षअघि माकाजु दोस्रो कार्यकालका लागि नियुक्ति भएका थिए । उनको कार्यकाल माघ ७ गते सकिदैछ । उनले तेस्रो पटक पनि उपकुलपति बन्न व्यक्तिगत विवरण बुझाएका हुन् । उनी मेडिकल कलेजको सम्बन्धन र शुल्कमा विवादमा तानिएका थिए । माकाजुलाई विश्वविद्यालय रकम धुलिखेल अस्पतालको नाममा अनियमितता गरेको आरोप पनि छ । प्राध्यापक कर्मचारीहरुले एउटा व्यक्ति दुई पटक भन्दा बढि एउटै पदमा बस्न नहुने माग राख्दै आएका छन् ।

त्यस्तै, चिकित्सा शिक्षा सुधारका अभियान्ता डा. गोविन्द केसीले केयूमा सक्षम र नैतिकवान व्यक्ति नियुक्ति हुनुपर्ने दोहोर्‍याएका छन् । बिहीबार विज्ञप्ति जारी गरेर नियुक्ति प्रक्रिया न्यायोचित र निष्पक्ष हुनुपर्ने उनले बताएका हुन् ।

उमेद्वारहरुको योग्यता, अनुभव र भिजनलाई हेरेर नियुक्तिका लागि सिफारिस हुनुपर्ने विज्ञप्तिमा उल्लेख छ । सरकारले यसअघि विश्वविद्यालयमा उपकुलपति नियुक्तिको मापदण्डको कानुनी व्यवस्था गर्ने र त्यसअघि योग्यता र कार्यक्षमताको आधारमा नियुक्ति गर्न सहमति गरेको थियो । डा. केसीले पुस १९ गते पनि विज्ञप्ति जारी गरेर विवादित पदाधिकारीको पुन:नियुक्ति नगर्न सरकारको ध्यानाकर्षण गराएका थिए ।

प्रकाशित : माघ १, २०७७ १७:२०
प्रतिक्रिया
पठाउनुहोस्

प्रधानमन्त्री कप क्रिकेट प्रतियोगिताको प्रदेशस्तरीय छनोट खेलमा रुपन्देही च्याम्पियन

सन्जु पौडेल

तिलोत्तमा — रुपन्देहीको भैरहवामा सम्पन्न प्रधानमन्त्री कप राष्ट्रिय क्रिकेट प्रतियोगिता पुरुषतर्फको लुम्बिनी प्रदेशस्तरीय छनोट खेलमा रुपन्देही प्रदेश च्याम्पियन बनेको छ ।

बिहीबार सिद्धार्थ रंगशालामा भएको खेलमा बाँकेलाई १ सय ७ रनको फराकिलो अन्तरले पराजित गर्दै रुपन्देही च्याम्पियन भएको हो । बाँके उपविजेता बन्यो । टस जितेर ब्याटिङ गरेको रुपन्देहीले निर्धारित ४० ओभरको खेलमा ८ विकेट क्षतिमा १ सय ८७ रनको योगफल तयार गर्‍यो । उसका लागि सन्दिप रजालीले सर्वाधिक ८९ रन बनाए ।

त्यस्तै, प्रकाश केसीले ३५, कृष्ण कार्कीले १९ र विक्रम भुसालले १४ रन बनाएका थिए । बलिङमा बाँकेका अजय साहनी र आकाश विष्टले ३/३ तथा दीपेन्द्र राउत र सिद्धान्तराज शाहीले १/१ विकेट लिए ।

जवाफी ब्याटिङ गरेको बाँके २६ दशमलब ३ ओभरमा सबै विकेट गुमाएर ८० रनमै समेटियो । उसका लागि रमेश सिंहले १९ र सुविन्द्र पाण्डेले १० रन बनाए पनि अन्य ब्याट्सम्यानले दोहोरो अंक जोड्न सकेनन् । बाँकेलाई रोक्न रुपन्देहीका अनिल खरेलले ५ विकेट लिए । यस्तै, नितेश थापाले २, धिरज शाही, कृष्ण कार्की र दुर्गेश गुप्ताले समान १/१ विकेट लिए ।

प्रतियोगितामा रुपन्देहीका सन्दिप रजाली म्यान अफ द फाइनल भएर ५ हजार रुपैयाँ नगद पुरस्कारसहित पुरस्कृत भए । रुपन्देहीकै विक्रम भुसाल म्यान अफ द सिरीज भए । उनले १० हजार रुपैयाँ प्राप्त गरे । विजेता र उपविजेता टिमलाई नेपाल क्रिकेट संघका पूर्व केन्द्रिय सदस्य आशा गुरुङ लगायतले ट्रफी र प्रमाणपत्र प्रदान गरेका थिए ।

प्रतियोगितामा उत्कृष्ट प्रदर्शन गरेका खेलाडी छनोट गरी काठमाडौंमा हुने प्रधानमन्त्री कप राष्ट्रिय क्रिकेटका लागि लुम्बिनी प्रदेश स्तरीय टिम छनोट गरिने नेपाल क्रिकेट संघ लुम्बिनी प्रदेशका सचिव सन्जय गुरुङले बताए ।

प्रकाशित : माघ १, २०७७ १७:१७
पूरा पढ्नुहोस्
प्रतिक्रिया
पठाउनुहोस्
×