कालीकोटमा बाबुले घरमा आगो लगाउँदा दुई छोराको मृत्यु- समाचार - कान्तिपुर समाचार
कान्तिपुर वेबसाईट
AdvertisementAdvertisement

कालीकोटमा बाबुले घरमा आगो लगाउँदा दुई छोराको मृत्यु

तुलाराम पाण्डे

कालीकोट — नरहरिनाथ ७ माल्कोट दुदुल्लीका २९ वर्षीय भैरै बटालाले खरको छाना भएको आफ्नै घरमा आगो लगाउँदा दुई छोरोको जलेर मृत्यु भएको छ । घरायसी झगडाले बुधबार बिहान ४ बजे घरमा छोरा सुतिरहेको अवस्थामा आगो लगाएको प्रहरीले जनाएको छ । मदिरा सेवन गरी कुटपिट भएपछि पुस ९ गतेदेखि २७ वर्षीया पत्नी लालकौरा माइतीघर कुमालगाउ गएकी थिइन् । 

घरमा आगलागी हुँदा भैरैका १२ वर्षीय छोरा गणेश, ९ वर्षीय मनबहादुरको मृत्यु भएको हो भने ४ वर्षीय कान्छा छोरा खगेन्द्र घाइते छन् । घरमा आगो लगाएपछि आफूले पनि विष सेवन गरेको र ४ वर्षीय कान्छा छोरा खगेन्द्रलाई विष खुवाएको जिल्ला प्रहरी प्रमुख डिएसपी चक्रबहादुर शाहले बताए । उनकाअनुसार घाइते बालकको प्राथमिक उपचार केन्द्र कुमाल गाउँमा उपचार भइरहेको छ । भैरेलाई प्रहरीले पक्राउ गरेर मान्म ल्याएको छ ।

मदिरा सेवन गरेर पत्नीलाई कुटपिट गरेकाले उनी माइती बसिरहेकी कुमालगाउँकी अनिता बुढाले बताइन् ।

यसैबीच, खाडाचक्र १ मान्म बजार बस्ने ६७ वर्षीय रामबहादुर कार्कीको विष सेवनबाट मृत्यु भएको छ । उनले पनि पारिवारिक तनावले सोमबार दिउँसो मुसा मार्ने औषधि सेवन गरेको प्रहरीले जनाएको छ ।


प्रकाशित : पुस २९, २०७७ १७:२७
प्रतिक्रिया
पठाउनुहोस्

२४ घण्टामा थप ४४५ जनामा कोरोना संक्रमण पुष्टि

कान्तिपुर संवाददाता

काठमाडौँ — पछिल्लो २४ घण्टामा बुधबार थप ४४५ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । योसँगै हालसम्म नेपालमा २ लाख ६६ हजार १४३ संक्रमितको संख्या पुगेको छ । 

त्यसैगरी २४ घण्टामा ४१४ जना कोरोना संक्रमणबाट निको भएर डिस्चार्ज भएका छन् । योसँगै निको हुनेको संख्या २ लाख ५९ हजार ७२२ पुगेको छ । देशभरी सक्रिय संक्रमितको संख्या भने ४ हजार ४३४ छ ।

मन्त्रालयका अनुसार हालसम्म पीसीआर विधिबाट १९ लाख ९७ हजार ९ परीक्षणहरु गरिएका छन् । हालसम्म क्वारेन्टाइनमा रहनेको संख्या २३७ रहेको छ । कोरोना संक्रमणबाट २४ घण्टामा ५ को मृत्यु भएको छ । हालसम्म कोरोना संक्रमणबाट मृत्यु हुनेको संख्या १ हजार ९३७ जना रहेको छ ।

प्रकाशित : पुस २९, २०७७ १६:४०
पूरा पढ्नुहोस्
प्रतिक्रिया
पठाउनुहोस्
×