नेकपा र सरकारले नेपालको राष्ट्रियता कमजोर पारे : सांसद देव

राष्ट्रिय सभाको शुक्रबारको बैठकमा सांसदले भने, '‘तपाईंहरु बारम्बार राष्ट्रियता र देशभक्तिको कुरा गर्नुहुन्छ । दक्षिण र उत्तरको जुन चहलपहल र चलखेल भइरहेको छ, 'फास्ट ट्रयाक' बाट काठमाडौं आउने/जाने जुन परिदृश्य देखिएको छ । यसले राष्ट्रियतालाई कति बलियो गर्छ ? स्वनिर्णयलाई कति बलियो गर्छ ? मैले तपाईंहरुको जवाफ मागे,’ उनले भने ।

समावेशी लोकतन्त्रबाट मात्रै राष्ट्रियता बलियो हुने भए पनि नेकपा र सरकारले यसबारे कहिल्यै नसोचेको देवको भनाइ थियो । 'देशको राष्ट्रियता र राष्ट्रिय अखण्डता इन्क्लुसिभ डेमोक्रेसीबाट बलियो हुन्छ । तराई, पहाड र हिमालको एकताबाट बलियो हुन्छ । त्यहाँ तपाईंहरु चुक्नुहुन्छ, चुक्नु भयो ।'

कम्युनिस्ट पार्टीका नेताहरुले बारम्बार देश भक्ति र राष्ट्रियता कुरा गर्ने र कहिलेकाहीं आक्रमक ढंगले कांग्रेसलाई गाली गरेपनि अहिले विदेशी चलखेलबारे चुप बसेकाप्रति सांसद देवले आपत्ति जनाए ।

उनले आफ्नो पार्टीले सर्वोच्च अदालतले गर्ने फैसला मानेर जाने पनि स्पष्ट पारे । सांसद देवले सरकार यति होल्डिङ्ससहित भ्रष्टाचारका विभिन्न पासोमा परेको पनि बताए ।

सांसद देवले देश असाध्यै जटिल अवस्थामा प्रवेश गरेको र यहाँबाट उद्धार हुन्छ कि हुँदैन भन्ने गम्भीर चिन्ता उत्पन्न भएको बताए । ‘देशको राजनीति कुइरोको कागजस्तो भएको छ । कालो तुँवालोभित्र उडेको काग जस्तो छ । उडेको छ तर, दिग्भ्रमित छ,’ उनले भने ।

सांसद देवले पार्टीभित्र समस्या भए त्यो पार्टीको आन्तरिक समस्या हुने, देश र संसद्को समस्या नभएको बताए । ‘पार्टीभित्र समस्यामा पर्ने संसद् विघटन गर्ने ? देशलाई खाल्डोमा जाक्ने ? दुनियाँमा कसैले पनि सोच्न सक्दैनन्, यस्तो काम गर्दै गर्दैनन् । तर, प्रधानमन्त्रीले अधिकार नभएको काम गर्नुभयो’ देवले भने ।

संघीय लोकतान्त्रिक गणतन्त्र धरापमा पर्ने हो कि भन्ने गम्भीर चिन्ता जन्मिएको सांसद देवले बताए ।