नेपाललाई अफगानिस्तान बन्नबाट जोगाउन सर्वोच्च अदालत छ : नेता पौडेल- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेपाललाई अफगानिस्तान बन्नबाट जोगाउन सर्वोच्च अदालत छ : नेता पौडेल

'सर्वोच्चका न्यायमूर्तिहरुलाई एकपटक संविधानलाई राम्रोसँग पढिदिन आग्रह छ'
सम्झना रसाइली

तनहुँ — कांग्रेसका वरिष्ठ नेता रामचन्द्र पौडेलले मुलुकलाई अफगानिस्तान जस्तो बन्नबाट जोगाउन सर्वोच्च अदालतले मात्र सक्ने बताएका छन् । कांग्रेस तनहुँले निर्वाचन क्षेत्र नम्बर १ को दमौली र निर्वाचन क्षेत्र नम्बर २ को भिमादमा आयोजना गरेको विरोध सभालाई सम्बोधन गर्दै उनले सरकारले प्रतिनिधिसभा विघटन गरेर गल्ती गरेको र अदालतले त्यसलाई सच्याउने विश्वास गरेका छन् ।

‘यो देशलाई विखण्डनमा पुग्न नदिन, यो मुलुकलाई अफगानिस्तान जस्तो बन्न नदिन अझै पनि सर्वोच्च अदालतले रोक्न सक्ने विश्वास छ’, नेता पौडेलले भने, ‘सर्वोच्चका न्यायमूर्तिहरुलाई एकपटक संविधानलाई राम्रोसँग पढिदिन, यो संविधानको अक्षर, यो संविधानको भावना र विधिदाताको मनासय बुझिदन आग्रह छ ।’

‘सर्वोच्च अदालतले सरकारको गल्ती सच्याउनै पर्छ, अब भरोसा भनेको अदालतसँग मात्र छ’, नेता पौडेलले भने, ‘मुलुकलाई संकटबाट बचाउन पनि प्रतिनिधिसभा पुनःस्थापना गरी संविधानको सर्वोच्चतालाई जोगाउनु पर्छ । यो अवस्थामा मुलुकले निर्वाचन खर्च समेत धान्न नसक्ने अवस्थामा छ ।’

‘नेपाल कम्युनिष्ट पार्टीको विवादसँग जोडेर प्रतिनिधिसभा विघटन गरिनु दुःखद् हो’, उनले भने ‘संविधानमा संसद् विघटनको व्यवस्था नै छैन, व्यवस्थामा नै नभएको कुरा सरकारले गरेको र संविधानको रक्षक राष्ट्रपतिबाट पनि गलत कामको समर्थन भएको छ ।’

मुलुक शक्तिकेन्द्रको खेलवाड गर्ने स्थल बन्दै गएको बताउँदै नेता पौडेलले प्रतिनिधिसभा विघटन प्रधानमन्त्री र राष्ट्रपतिले मात्र होइन यसको पछाडि अन्यको पनि भूमिका रहेको र यो कसरी भएको छ, बिना बादल वर्षा ? यो अहिले सम्भवनै नभएको कुरा कसरी विघटन भयो ? यसले गम्भिर प्रश्न उठाएको जिकिर गरे ।

नेता पौडेलले यो मुलुक र संविधानको रक्षका लागि अब सिद्धान्त र आदर्शप्रति समर्पित नेपाली कांग्रेस, लोकतन्त्रप्रति समार्पित नेपाली कांग्रेसलाई जनताले खोजेको दाबी गरेका छन् ।

यस्तै, विरोध सभालाई सम्बोधन गर्दै नेपाली कांग्रेसका केन्द्रीय सदस्य शंकर भण्डारीले मुलुक इतिहासकै जटिल अवस्थामा पुगेको बताएका छन् । मुलुकमा आइपरेको यो संकटबाट निकास दिन पार्टीको केन्द्रीय समितिले समयमै एउटा निष्कर्ष निकालेर ताजा जनादेशमा जानुको विकल्प नभएको बताएका छन् ।

विरोध सभामा कांग्रेसका केन्द्रीय सदस्यहरु गोविन्द भट्टराई, प्रदीप पौडेल लगायतका नेता कार्यकर्ताहरुले पार्टीमा केही कमजोरी रहे पनि दबाबपूर्ण आन्दोलन गर्न सके मात्र लोकतन्त्र बच्ने दाबी गरेका छन् ।

प्रकाशित : पुस १३, २०७७ १७:४०
प्रतिक्रिया
पठाउनुहोस्

९ एसएसपी डीआईजीमा बढुवा सिफारिस 

मातृका दाहाल

काठमाडौँ — गृह मन्त्रालयले नेपाल प्रहरीका ९ जना एसएसपीलाई डीआईजीमा बढुवाका लागि सिफारिस गरेको छ ।

गृह सचिवको अध्यक्षतामा रहेको बढुवा सिफारिस समितिले एसएसपीहरु गणेशबहादुर ऐर,पुरुषोत्तम कँडेल,राजेशकुमार लाल कर्ण,देवबहादुर बोहोरा,दिवेश लोहनी,रामकृपाल साह,उमेश रञ्जितकार,प्रकाश अधिकारी र मुकुन्दराज आचार्यलाई डीआईजीमा सिफारिस गरेको हो ।

कात्तिक अन्तिम साताको मन्त्रिपरिषद्को बैठकले नेपाल प्रहरीमा ५ जना डीआईजीको दरबन्दी थपेको थियो । त्यसबाहेक ४ जना डीआईजीको पद रिक्त थियो । रिक्त र थपिएको गरी ९ जना बढुवा सिफारिसमा परेका हुन् ।

बढुवा सिफारिस गरिएकामध्ये दिवेश लोहनी र मुकुन्द आचार्य २०४९ साल चैत ११ गते र बाँकी ७ जना २०४९ वैशाख १९ गते प्रहरी निरीक्षकबाट सेवा प्रवेश गरेका थिए । सिफारिस गरिएका सबै अधिकृतहरु एउटै विज्ञापनबाट प्रहरी सेवामा प्रवेश गरेका थिए ।

प्रकाशित : पुस १३, २०७७ १७:३७
पूरा पढ्नुहोस्
प्रतिक्रिया
पठाउनुहोस्
x
×