१७.१२°C काठमाडौं
काठमाडौंमा वायुको गुणस्तर: १६०

बालुवाटारमा भएको भेला वैधानिकता प्राप्त होइन : दाहाल

'यो हलले वामदेव र बादललाई अगाडि देख्न चाहेको छ'

काठमाडौँ — नेकपा अध्यक्ष पुष्पकमल दाहालले आफ्नो पक्षका केन्द्रीय समिति बैठकलाई सम्बोधन गर्दै अर्का अध्यक्ष केपी शर्मा ओलीले बालुवाटारमा गरेको केन्द्रीय समिति बैठकलाई भेलाको संज्ञा दिँदै त्यसले वैधानिकता प्राप्त गर्न नसक्ने बताएका छन् । 

बालुवाटारमा भएको भेला वैधानिकता प्राप्त होइन : दाहाल

'६५ प्रतिशत केन्द्रीय सदस्य यहाँ हुनुहुन्छ, केही केन्द्रीय सदस्य बाटोमा हुनुहुन्छ । निर्वाचन आयोगको नियम कानुन ऐनअनुसार याे बैठक वैधानिक र आधिकारिक हाे । बालुवाटारमा भएको भेला वैधानिकता प्राप्त लायक छैन । संवैधानिक निकायका पदाधिकारीले संविधान ऐन अनुसार विधिसम्मत ढंगले चल्छन् भन्ने अपेक्षा छ । विधिलाई ती सबैले सम्मान गर्नेछन् भन्ने अपेक्षा राखेकाे छु,' बैठकमा दाहालले भने ।

दाहालले पार्टीका वरिष्ठ नेता माधव नेपाल र झलनाथ खनाल आफूहरुको पक्षमा रहेको भन्दै यसको पनि ख्याल राख्नु पर्ने बताए । 'तत्कालीन नेकपा एमालेका वरिष्ठत नेता, वर्षाैं उक्त पार्टी चलाएका नेता यहाँ हुनुहुन्छ । यहाँ वरिष्ठ नेता हुनुहुन्छ,' उनले भने ।

सम्बोधनमा दाहालले सचिवालय सदस्यहरु वामदेव गौतम र रामबहादुर थापा पनि आफ्नो पक्षमा आउने बताए । 'रामबहादुर थापा बादललाई आज बिहान पनि भेटेर कुरा गरेको छु । वामदेवजी र थापजीसँग मेरो भावनात्मक सम्बन्ध छ । यो नै आधिकारिक पार्टी हो । उहाँहरुलाई सगौरव आउन आग्रह गर्छु,' उनले भने, 'यो हलले वामदेव र बादललाई अगाडि देख्न चाहेको छ ।'

गौतम र थापा दुवै पक्षका बैठकमा उपस्थित भएका छैनन् । बबरमहलमा दाहाल-नेपाल समूहको बैठक चलिरहँदा उनीहरु भैंसेपाटीस्थित गौतम निवासमा वार्तामा थिए ।

अर्का अध्यक्ष ओली पक्षले केन्द्रीय समिति विस्तार गरेको विषयमा टिप्पणी गर्दै दाहालले भने, 'दुई तिहाइभन्दा बढी संख्या थपेर आधिकारिकता दिन्छन् भन्ने नसाेचे हुन्छ । त्यसमा पार्टीको परम्परा, एकताको भावना जाेडिएकाे छैन ।'

प्रकाशित : पुस ७, २०७७ १६:११
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?