कांग्रेसले मंसिर २९ गते देशव्यापी विरोध प्रदर्शन गर्ने- समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेसले मंसिर २९ गते देशव्यापी विरोध प्रदर्शन गर्ने

कुलचन्द्र न्यौपाने

काठमाडौँ — प्रमुख प्रतिपक्ष कांग्रेसले मंसिर २९ गते सरकारविरुद्ध देशव्यापी विरोध प्रदर्शन गर्ने निर्णय गरेको छ । कांग्रेस वरिष्ठ नेता रामचन्द्र पौडेलमाथि बुधबार तनहुँमा भएको अभद्र व्यवहार र गिरफ्तारीको विरोध जनाउँदै कांग्रेसको शुक्रबार बसेको पदाधिकारी, पूर्वपदाधिकारीसहितको अनौपचारिक बैठकले सरकारको अलोकतान्त्रिक कदम, भ्रष्ट्राचार, अनियमितता र कोरोना नियन्त्रण तथा रोकथामको दिशामा देखाएको गैरजिम्मेवारी लगायतका मुद्दा उठाउँदै विरोध प्रदर्शन गर्ने निर्णय लिएको हो ।

कांग्रेस सभापति शेरबहादुर देउवाको बुढानिलकण्ठस्थित निवासमा बसेको बैठकले तत्काल संसद् अधिवेशन बोलाउन सरकारसँग माग गरेको कांग्रेस सहमहामन्त्री प्रकाशशरण महतले बताए ।

नेता अर्जुननरसिंह केसीले सरकारले एकपछि अर्को विरोधी विचारधारलाई निषेध र निस्तेज गर्ने काम गर्दै एकदलीय कम्युनिष्ट शासन सत्ता संचालन गर्न खोजेकाले कांग्रेस विरोधमा जान बाध्य भएको बताए । ‘मंसिर २९ गते सांकेतिक रुपमा देशव्यापी विरोध प्रदर्शन हुन्छ’, उनले भने,‘त्यसपछि सरकारका विरुद्ध अरु कडा कदमका कार्यक्रममा पनि जान सकिन्छ ।’

बैठकमा पार्टीको महाधिवेशनको तयारी, वरिष्ठ नेता रामचन्द्र पौडेल पक्षले उठाएका १६ बुँदे मागका विषयमा समेत छलफल भएको थियो ।

प्रकाशित : मंसिर १९, २०७७ १८:१५
प्रतिक्रिया
पठाउनुहोस्

गुलरियामा बस दुर्घटना हुँदा ३४ जना घाइते

कमल पन्थी

बर्दिया — नेपालगन्जबाट राजापुरतर्फ गइरहेको भे १ ख २१२४ नम्बरको बस पल्टिँदा शुक्रबार साँझ ३४ जना घाइते भएका छन् । तीमध्ये तीनजना गम्भीर घाइते भएको प्रहरीले जनाएको छ ।


जिल्ला प्रहरी कार्यालय, बर्दियाका प्रहरी निरीक्षक सुशिल थापा मगरका अनुसार दुर्घटना गुलरिया नगरपालिका—१ खैरापुरमा भएको हो ।

घाइतेको जिल्ला अस्पताल गुलरियामा उपचार भइरहेको छ । घाइतेमध्ये गेरुवा गाउँपालिका—६ की अन्दाजी ५५ वर्षीया माण्डवी थापा, मधुवन नगरपालिका—२ का ६८ वर्षीय जोखन थारु र गुलरिया नगरपालिका—४ का ५२ वर्षीय रामशंकर थारुलाई थप उपचारका लागि नेपालगञ्जस्थित भेरी अस्पतालमा पठाइएको प्रहरी निरीक्षक थापाले बताए । तीव्र गतिमा गुडाइएको बस अनियत्रित भइ पल्टेको र बस चालक फरार रहेको प्रहरीले जनाएकाे छ ।

*अध्यावधिक गरिएको

प्रकाशित : मंसिर १९, २०७७ १८:१४
पूरा पढ्नुहोस्
प्रतिक्रिया
पठाउनुहोस्
×