झन्डै एक महिनायता ओली–दाहालबीच ‘वान टु वान’ संवाद ठप्प- समाचार - कान्तिपुर समाचार
कान्तिपुर वेबसाईट
AdvertisementAdvertisement

झन्डै एक महिनायता ओली–दाहालबीच ‘वान टु वान’ संवाद ठप्प

कान्तिपुर संवाददाता

काठमाडौँ — कहिलेकाहीँ दिनमा दुईपटकसम्म त कहिले हरेक दिनजसो भेटघाट गर्ने नेकपाका दुई अध्यक्ष केपी शर्मा ओली र पुष्पकमल दाहालबीच ‘वान टु वान’ संवाद नभएको झन्डै एक महिना हुन लाग्यो ।

उनीहरुबीच पछिल्लोपटक कात्तिक २५ मा करिब १५ मिनेट मात्रै ‘वान टु वान’ संवाद भएको थियो । त्यसयता ओली र दाहालबीच बैठक वा सामूहिक भेट भए पनि ‘वान टु वान’ संवाद ठप्पै छ ।

त्यसअघि २० कात्तिकमा उनीहरुबीच ‘वान टु वान’ संवाद भएको थियो । उक्त भेटमा १९ कात्तिकमा ओली समूहले प्रदेश एक स्तरीय भर्चुअल बैठक राखेको विषयमा दाहालले आपत्ति प्रकट गरेका थिए । साथै सचिवालय बैठकको लागि पनि दाहालले आग्रह गरेका थिए । तर, ओलीले त्यसलाई अस्वीकार गरेका थिए।

त्यसअघि दुई अध्यक्षबीच १५ कात्तिकमा ‘वान टु वान’ संवाद भएको थियो । संवादमा राजदूतको नियुक्ति सिफारिसदेखि मन्त्रिपरिषद् पुनर्गठन, कर्णालीमा मुख्यमन्त्री विरुद्ध अविश्वासको प्रस्ताव र भारतीय गुप्तचर ‘रअ’का प्रमुखको नेपाल आगमन र प्रधानमन्त्रीसँगको भेटलगायताका विषयमा तिक्ततापूर्ण संवाद भएको थियो । सोही दिन दुई अध्यक्षबीच ‘अब अलग अलग जाने हो भने जाँउ’ भन्नेसम्मको संवाद भएको नेताहरुले बताएका थिए ।

त्यसपछि २२ कात्तिकमा उनीहरुबीच संयुक्तरुपमा भेट भयो । बैठकको सहमतिका लागि दाहालसहितका पाँचजना नेता पत्र बोकेर बालुवाटार गएका थिए ।

त्यसपछि ओली र दाहालबीच २५ कात्तिकमा करिब १५ मिनट मात्रै भेट भयो । भेटमा दाहालले बैठकको सहमतिका लागि आग्रह गरेका थिए । तर, ओली तयार नभएपछि दाहालसहित बहुमत सदस्यको बैठक पार्टी मुख्यालय धुम्बाराहीमा भएको थियो ।

त्यसयता भने दुई अध्यक्षबीच छुट्टाछुट्टै भेट भएको छैन । २८ कात्तिकको सचिवालय बैठकमा सामूहिक भेट भएको थियो । उक्त बैठकमा दाहालले ओली माथि संगिन आरोपसहित प्रस्ताव पेश गरेका थिए ।

त्यसपछिको सामूहिक भेट ३ मंसिर को सचिवालयमा भयो । १३ र १६ मंसिरको सचिवलाय बैठकमा पनि दुई अध्यक्षबीच भेट भएको थियो । १३ मंसिरको सचिवालय बैठकमा ओलीले दाहालमाथि संगिन आरोपसहित जवाफि प्रस्ताव पेश गरेका थिए । १६ मंसिरको सचिवालय बैठकमा ओली र दाहालबीच चर्काचर्की नै भएको थियो ।

दुई अध्यक्षबीच संवाद नभएपछि संवादको प्रयासका लागि ओली निकट नेताहरुले भने दाहालसँग भेट गरेका छन् । बुधबार महासचिव र नेकपा संसदीय दलका उपनेता सुवास नेम्वाङले छुट्टाछुट्टै दाहाललाई भेटेका थिए ।

त्यस अगाडि अर्थात् ५ मंसिरमा उनीहरुले पार्टी मुख्यालय धुम्बाराहीमा दाहालसँग भेटेका थिए । त्यसबीचमा मुख्यमन्त्री एवं स्थायी कमिटी सदस्य शंकर पोखरेलले पनि दाहाललाई भेटेका थिए । सचिवालय सदस्य ईश्वर पोखरेलले शुक्रबार (१९ मंसिर) मा दाहाललाई भेटेर दुई अध्यक्षबीच संवादका लागि आग्रह गरेका थिए ।

ओलीसमूह दाहालले पेश गरेको प्रस्ताव फिर्ता लिएर भदौ २६ को सहमतिमा फर्किनु पर्ने अडानमा छ । दाहाल–नेपाल समूह भने भदौ २६ को निर्णय भन्दा अगाडि बढेर दुवै अध्यक्षका प्रस्ताव स्थायी र केन्द्रीय कमिटीमा लगेर बहुमतको निर्णयबाट ओलीको राजीनामा माग्ने तयारीमा छ । त्यसअघि २० मंसिरमा सचिवालय बैठक बस्दैछ ।

योबीचमा ओली समूहका नेताहरुले दाहाललाई भेटेर दुई अध्यक्षबीच संवाद गर्न सुझाव दिएका छन् । तर, दुई अध्यक्षबीच ‘वान टु वान’ संवाद गराउने उनीहरुको प्रयास सफल भने हुन सकेको छैन ।

प्रकाशित : मंसिर १९, २०७७ १७:१२
प्रतिक्रिया
पठाउनुहोस्

वीरगन्जमा मापदण्ड विपरीत अस्पताल सञ्चालन

भूषण यादव

वीरगन्ज — वीरगन्ज महानगरपालिका–१६ रजतजयन्ती चोकमा रहेको नेपाल इन्डो हस्पिटल एन्ड आई सेन्टर मापदण्ड विपरीत सञ्चालनमा रहेको पाइएको छ ।

जिल्ला प्रशासन कार्यालय पर्साको नेतृत्वमा शुक्रबार अनुगमन टोली पुग्दा उक्त अस्पतालको फार्मेसी (औषधि पसल) सम्बन्धित विषय अध्ययन नै नगरेका व्यक्तिले सञ्चालन गरिरहेका थिए । बिलिङ काउन्टरमा दुई किसिमको बिल जारी गरिएको पाइएको थियो । नेपाल मेडिकल काउन्सिल उत्तिर्ण नगरेका स्वास्थ्यकर्मी अस्पतालको आईसियु कक्षमा बिरामीको उपचार गरिरहेका थिए ।

अस्पतालले सञ्चालन गरेको प्रयोगशालामा समेत सम्बन्धित विषय अध्ययन नगरेका प्राविधिकले रिपोर्टमा हस्ताक्षर गरेका थिए । संयुक्त अनुगमन टोलीमा रहेका जनस्वास्थ्य कार्यालय पर्साका स्वास्थ्य अधिकृत जयमोद ठाकुरले स्वास्थ्य मापदण्ड विपरीत अस्पताल सञ्चालनमा रहेको पाइएको बताए ।


‘नेपाल मेडिकल काउन्सिलमा दर्ता नभएका २/३ जना स्वास्थ्यकर्मी अस्पतालको आईसियु र अन्य वार्डमा काम गरेको पाइएको छ,’ उनले भने, ‘आवश्यक कारबाहीका लागि टिप्पणी उठाएका छौं ।’ ठाकुरका अनुसार अस्पताल सञ्चालन गर्न जुन मापदण्ड पालना गर्नुपर्ने हुन्छ त्यो पूरा गरी सञ्चालनको अनुमति महानगरपालिकाले दिएको थियो । त्यो शर्त पालना गरिएको छैन् । ड्युटी रोष्टर अनुसार कर्मचारी समेत खटाइएको छैन । मापदण्ड बमोजिम शय्यासमेत नराखिएको ठाकुरले बताए । ‘आईसियु र अन्य वार्डमा बिरामी रहेकाले हालका लागि फार्मेसी बन्द नगरिएको हो,’ उनले भने, ‘दुईतिन दिन काम गर्न दिने र त्यसपछि प्रशासनले कानुनी प्रक्रियाले अगाडि बढाउने छ ।’ सहायक प्रमुख जिल्ला अधिकारी भिकान्त पौडेलले स्वास्थ्य मापदण्ड पालना नगरी अस्पताल सञ्चालन भएको उजुरीको आधारमा अनुगमन गरिएको जनाए ।

‘फार्मेसी अध्ययन नगरेका व्यक्तिले औषधि बिक्री गरेको, मापदण्ड विपरीत सञ्चालन भएको, कर छलीलगायतका विषयमा उजुरी परेपछि संयुक्त अनुगमन समितिले छापामारेको हो,’ अनुगमन समितिको नेतृत्व गरेका सहायक प्रजिअ पौडेलले भने, ‘विस्तृत छानबिन गर्न बाँकी छ । अनुसन्धान हुँदै छ । हामी सार्वजनिक गर्छौ ।’

समितिले अस्पतालको आवश्यक कागजात, बिलबिजक, रजिष्टर लगायतका सामान नियन्त्रणमा लिएको छ । वीरगन्ज महानगरपालिकाले ०७६ भदौ दुईमा २५ शय्याको अस्पताल सञ्चालनको अनुमति दिएको थियो । सञ्चालन अनुमति दिँदा महानगरपालिकाले केही पूर्वाधारहरु समेत पूरा गर्नु पर्ने जनाएको थियो । ‘तर, एक वर्षपछि नविकरण गर्द महानगरपालिकाले पूर्वाधारहरु निर्माण भए कि भएनन् भनेर अनुगमन समेत गरेको छैन्,’ अनुगमन समितिका एक सदस्यले भने, ‘०७७ कात्तिक २५ मा नविकरण गर्दा पनि सञ्चालन अनुमति दिँदा थप्नु पर्ने पूर्वाधारहरुलाई नै थप्नु पर्ने उल्लेख गरेको छ ।’

प्रकाशित : मंसिर १९, २०७७ १६:४६
पूरा पढ्नुहोस्
प्रतिक्रिया
पठाउनुहोस्
×