नेकपा विवाद : एकै दिन ओली र दाहालले भेटे राष्ट्रपति- समाचार - कान्तिपुर समाचार
कान्तिपुर वेबसाईट
AdvertisementAdvertisement

नेकपा विवाद : एकै दिन ओली र दाहालले भेटे राष्ट्रपति

कान्तिपुर संवाददाता

काठमाडौँ — विवादले पार्टी एकता नै संकटमा परिरहेका बेला बिहीबार नेकपाका दुवै अध्यक्षले राष्ट्रपतिसँग भिन्दाभिन्दै भेटवार्ता गरेका छन् । बिहान प्रधानमन्त्री एवं पार्टी अध्यक्ष केपी शर्मा ओली र साँझ अर्का अध्यक्ष पुष्पकमल दाहालले राष्ट्रपति विद्यादेवी भण्डारीसँग भेटवार्ता गरेका हुन् । नेकपाभित्र आन्तरिक संकट गहिरिँदै गएपछि राष्ट्रपति भण्डारीले पुन: भेटघाट थालेकी छन् । 

बुधवार ओली सहभागी नभएको नेकपाको सचिवालय बैठकले सचिवालय र स्थायी कमिटी बैठक तीन दिन पछाडि सारेपछि त्यसबीचमा अनौपचारिक छलफल अगाडि बढाउने निर्णय भएको थियो । त्यसको अर्को दिन पार्टीका दुवै अध्यक्षले राष्ट्रपति भण्डारीसँग भेटघाट गरेका हुन् ।

मन्त्रिपरिषद् बैठक अगाडि बिहान प्रधानमन्त्री एवं पार्टी अध्यक्ष ओलीले शितलनिवास पुगेर राष्ट्रिपति भण्डारीसँग झन्डै दुई घण्टा लामो छलफल गरेका थिए । छलफलको विषयबस्तुबारे शितलनिवास र बालुवाटारबाट केही बताइएको छैन ।

त्यसैगरी अर्का अध्यक्ष दाहालसँगको भेटमा भएका कुराकानीबारे औपचारिक जानकारी दिइएको छैन । गत कात्तिक १८ मा नेकपा विवाद चर्किएको बेला नेकपा उपाध्यक्ष वामदेव गौतमले राष्ट्रपतिसँग भेटेका थिए । भेटपछि गौतमले पार्टी एकता बचाउन राष्ट्रपतिले आग्रह गरेको र आफूले सकारात्मक जवाफ दिएको बताएका थिए ।

गत वर्ष मंसिर ४ मा त शीतलनिवासमा राष्ट्रपति भण्डारीलाई साक्षी राखेर नेकपा दुई अध्यक्षबीच सरकार र पार्टी सञ्चालनको कार्यविभाजनमा सहमति नै भएको थियो । नेकपा विवाद निर्णायक मोडमा पुगेका बेला भण्डारीले विवाद समाधानमा सक्रियता देखाउँदै आएकी छिन् । नेकपा विवादमा राष्ट्रपति भण्डारीको चासो र समाधानमा सक्रियतालाई लिएर उनको आलोचनासमेत हुँदै आएको छ ।

प्रकाशित : मंसिर १८, २०७७ १९:२९
प्रतिक्रिया
पठाउनुहोस्

कांग्रेसद्वारा कावासोतीमा राँके जुलुस

नारायण शर्मा

नवलपरासी — तनहुँमा पुल उद्घाटन गर्न नदिएर आफ्ना नेता रामचन्द्र पौडेललाई प्रहरीले नियन्त्रणमा लिएको भोलिपल्ट कावासोतीमा कांग्रेसले बिहीबार राँके जुलुस प्रदर्शन गरेको छ ।

नेविसंघ, तरुण दलसहित कांग्रेस कार्यकर्ताले बिहीबार साँझ कावासोती बजारमा सरकारविरोधी नारा लगाउँदै राँके जुलुस प्रदर्शन गरेका थिए । उनीहरुले भ्रष्ट ओली सरकार राजीनामा दे, कम्युनिष्ट सरकार मुर्दावादजस्ता नारा लगाएका थिए ।

कावासोतीस्थित गणेशमान चोकबट शुरु भएको जुलुस जिल्ला प्रहरी कार्यालय हुँदै फलफूल चोकमा टुंगिएको थियो । बुधबार तनहुँको एउटा पुल उद्घाटन गर्न पुगेका कांग्रेस वरिष्ठ नेता रामचन्द्र पौडेलको कार्यक्रममा सरकार सर्मथकहरुले अवरोध गरेपछि सुरक्षाको कारण भन्दै प्रहरीले पौडेललाई केहीबेर नियन्त्रणमा लिएर छोडेको थियो । त्यसकै विरोधमा अहिले यहाँ कांग्रेसले विरोध गरेको तरुण दल नवलपरासीका अध्यक्ष सूर्य गुरुङले बताए ।

प्रकाशित : मंसिर १८, २०७७ १८:३४
पूरा पढ्नुहोस्
प्रतिक्रिया
पठाउनुहोस्
×