नेपालसँग समझदारी विकास हुँदैछ : भारतीय विदेशमन्त्री जयशंकर- समाचार - कान्तिपुर समाचार

नेपालसँग समझदारी विकास हुँदैछ : भारतीय विदेशमन्त्री जयशंकर

सुरेशराज न्यौपाने

काठमाडौँ — भारतका विदेशमन्त्री एस जयशंकरले विगतमा नेपालसँग केही असमझदारीहरु भए पनि पछिल्ला दिनमा दुवै देशबीच समझदारी विकास हुँदै गएको बताएका छन्  ।

भारतीय अंग्रेजी दैनिक द हिन्दुसँगको अन्तर्वार्तामा नेपालसँगको सम्बन्धको प्रसंगमा विदेश मन्त्री जयशंकरले त्यस्तो धारणा राखेका हुन् । ‘हो कुनै बेला हामीबीचमा केही समस्या थियो तर, अहिले हामी प्रस्ट रुपमा देख्न सक्छौं, पछिल्ला केही सातामा भारत र नेपालले मिलेर अगाडि बढ्ने निर्णय गरेका छन् र त्यो आपसी समझदारीमै भइरहेको छ,’ जयंशंकरले भनेका छन् ।

जयंशकरको संकेत पछिल्लो समय भारतका तर्फबाट लगातार भएका उच्चस्तरीय भ्रमणको शृखंलातर्फ थियो । नक्सा विवादका कारण एक वर्षदेखि दुई देशबीच संवादहीनता कायम रहेकै अवस्थामा डेढ महिनाअघि भारतीय जासुसी संस्था ‘रअ’ प्रमुख सामन्तकुमार गोयल काठमाडौं आएका थिए ।

त्यसलगत्तकै भारतीय स्थलसेना प्रमुख मनोजमुकुन्द नरवणे र भारतीय विदेश सचिव हर्षवद्र्धन शृंगला काठमाडौं ओर्लेका थिए । भारतीय उच्च अधिकारीहरुबाट भएका लगातारका यी भ्रमणलाई भारतको नेपालसँगको संवादहीनता तोड्ने प्रयासका रुपमा अथ्र्याइएको छ । विशेषगरी दुई देशबीचको संवादहीनताका फाइदा उठाउँदै उत्तरी छिमेकी चीनको नेपालमा आफ्नो प्रभावलाई बढाउँदै लगेको र त्यसकारण पनि काठमाडौंलाई ‘इन्गेज’ राखिराख्ने रणनीतिअन्तर्गत भारतका तर्फबाट उच्च अधिकारीहरुको नेपाल भ्रमण भएको दाबी गरिएको छ ।

साथै अन्तर्वार्तामा जयंशकरले छिमेकीहरुबीच समस्या हुनु सामान्य रहेको समेत उल्लेख गरेका छन् । ‘कुनै दुई छिमेकी भन्नुस् जसका बीचमा समस्या नभएको होस्,’ जयंशकरले भनेका छन् । त्यसैगरी उनले दुई देशबीच पछिल्लो एक वर्षदेखि कायम नक्सा विवादलाई घरेलु राजनीतिको नतिजाको रुपमा समेत संकेत गरेका छन् । उनले अधिकांश छिमेकीहरुमा लोकतान्त्रिक व्यवस्था रहेको हुँदा सबैले आ–आफ्ना हिसाबले राजनीति गर्ने गरेका कारण समेत विवाद देखिने गरेको जनाएका छन् ।

‘उनीहरुको आफ्नो राजनीति छ । हाम्रो आफ्नै राजनीति छ । विवाद त भइहाल्छन् । मुख्य कुरा विवादलाई कसरी व्यवस्थापन गर्छौं भन्ने हो । प्रमुख प्रश्न भनेको समस्याको समाधानका लागि साझा बिन्दु कसरी पहिल्याउने भन्ने हो ?,’ जयंशकरले अन्तर्वार्तामा भनेका छन् । तर, छिमेकसँगको सम्बन्धमा पछिल्ला वर्षहरुमा व्यापक बद्लाव आएको समेत उनले दाबी गरेका छन् ।

त्यसैगरी जयंशकरले संविधानको विषयलाई लिएर भारतले जनाएको आपत्तिलाई कुनै एउटा घटना विशेषका रुपमा हेर्नुपर्ने र त्यसैका आधारमा दुई देशबीचको सम्बन्धका बारेमा निष्कर्षमा पुग्न नहुने बताएका छन् ।

भारतले नेपालको संविधान जारी गर्दा आफ्ना चासोहरुलाई बेवास्ता गरेको भन्दै विरोध जनाएको थियो । संविधानमा आफ्नो सुझाव समेट्नका लागि दबाब दिनका लागि त्यतिबेला विदेश सचिव रहेका जयशंकर आफै काठमाडौं ओर्लेका थिए । तर, नेपालका प्रमुख राजनीतिक दलहरुले भारतको दबाबलाई अस्वीकार गरे र संविधान जारी गरेरै छाडे ।

त्यसबाट आक्रोशित बनेको भारतले नेपालमाथि करिब ६ महिना लामो अघोषित नाकाबन्दी नै लगाएको थियो । उक्त नाकाबन्दीका कारण नेपालमा भारतविरोधी भावना थप चर्किन पुग्यो । नाकाबन्दीको नेपालमात्र मात्र नभएर अन्तर्राष्ट्रियरुपमा पनि चर्को विरोध भएपछि भारतले त्यसलाई हटाएको थियो ।

प्रकाशित : मंसिर १८, २०७७ १०:२७
प्रतिक्रिया
पठाउनुहोस्

जबर्जस्ती गर्भपतन गराएको भन्दै प्रहरी निरीक्षकविरुद्ध जाहेरी

घनश्याम खड्का

म्याग्दी — जिल्ला प्रहरी कार्यालय म्याग्दीबाट पोखराको बैदाम सरुवा भई गएका प्रहरी निरीक्षक ध्रुव शर्माविरुद्ध जबरजस्ती गर्भपतन गराएको र बहुविवाह गरेको आरोपमा जाहेरी दर्ता भएको छ ।

शर्माकी पत्नी बेनी नगरपालिका–७ की स्मृति शर्माका तर्फबाट आफन्त एकेन्द्र महतले दिएको जाहेरीमा पद र हतियारको दुरुपयोग गरी डर देखाई जबरजस्ती गर्भपतन गराएको र पोखरामा छुट्टै विवाह गर्न अर्की युवतीसँग टीकाटालो गरेको उल्लेख छ ।

उनीहरूले निरीक्षक शर्मा सम्पर्कविहीन भएपछि प्रहरीमा उजुरी गर्दा सुरुमा लिन नमानेको र जालझेल गर्न खोजेको आरोपसमेत लगाएका छन् । ‘शर्माविरुद्ध श्रीमतीका तर्फबाट आफन्तले गर्भ संरक्षण विरुद्धको कसुर र बहुविवाहसम्बन्धी दुईवटा मुद्दामा जाहेरी दर्ता गर्नुभएको छ । अनुसन्धान थालेका छौं,’ जिल्ला प्रहरीप्रमुख डीएसपी किरणजंग कुँवरले भने, ‘उहाँको सरुवा नियमित हो, घटनामा जोगाउन होइन ।’

कुँवरले पीडितको जाहेरी लिन प्रहरीले आनकानी गरेको, जालझेल गरेको भन्ने आरोप सत्य नभएको दाबी गर्दै सरकारी वकिल वा हुलाकबाटसमेत जाहेरी दर्ता गर्न मिल्ने बताए । ‘शर्माले यौनशोषणपछि विवाहको नाटक गरी शारीरिक तथा मानसिक यातना दिएकाले बहिनी अहिले विक्षिप्त छिन् । गर्भपतन गर्न बाध्य पारेको र पोखरामा अर्को विवाह गर्न लागेको जानकारी पाएपछि आफन्तको सहयोगमा उजुरी दिएका हौं,’ स्मृतिकी दिदी स्तुति सुवेदीले भनिन् ।

शर्मा र स्मृतिले गत वैशाखमा बेनीकै मन्दिरमा विवाह गरेका थिए । त्यसअघि नै स्मृति गर्भवती बनेकाले गत चैतमा गर्भपतन गराइएको जाहेरीमा उल्लेख छ । स्मृतिका अनुसार शर्माले पेस्तोल देखाई गर्भपतन नगरे मार्ने र आफू पनि मर्ने भन्दै डर देखाएर पर्वतको कुस्मास्थित मेरीस्टोप्समा लगी गर्भपतन गराएका थिए । गर्भपतनपछि सम्बन्धमा खटपट सुरु हुँदा अधिकारकर्मी र डीएसपीसमेतको दबाबमा ध्रुव र स्मृतिको विवाह भएको थियो । शर्माले विवाह दर्ता गरी आफ्नो नामबाट नागरिकतासमेत दिलाएका छन् ।

शर्माले भने स्मृतिकै इच्छामा गर्भपतन गरिएको दाबी गरेका छन् । ‘विवाहपछि पारिवारिक विषयमा खटपट सुरु भयो । सँगै जीवन बिताउन सक्ने अवस्था नदेखेपछि मैले जिल्ला अदालत बागलुङमा परिवार र उनीसँग समेत अंशबन्डा दाबी गरी मुद्दा दायर गरें,’ उनले भने, ‘परिवारबाट एक्लै बस्न चाहेँ । यही विषयमा उनी आवेगमा आई गर्भपतन र बहुविवाहको मुद्दा दर्ता गरेकी हुन् ।’

प्रकाशित : मंसिर १८, २०७७ १०:००
पूरा पढ्नुहोस्
प्रतिक्रिया
पठाउनुहोस्
×