पार्टी मुख्यालयमा ‘सुरक्षा थ्रेट’ भन्दै बालुवाटारमै बस्यो नेकपा सचिवालय बैठक- समाचार - कान्तिपुर समाचार
कान्तिपुर वेबसाईट
AdvertisementAdvertisement

पार्टी मुख्यालयमा ‘सुरक्षा थ्रेट’ भन्दै बालुवाटारमै बस्यो नेकपा सचिवालय बैठक

कान्तिपुर संवाददाता

काठमाडौँ — सत्तारुढ नेकपाको सचिवालय बैठक प्रधानमन्त्रीको सरकारी निवास बालुवाटारमा सुरु भएको छ । पार्टी मुख्यालय धुम्बाराहीमा बस्ने तय भए पनि  ‘सुरक्षा थ्रेट’ देखाएर बैठक अन्तिम समयमा बालुवाटार सारिएको थियो । 

यद्यपि सचिवालयका एक सदस्यले सुरुमै महासचिव विष्णु पौडेलले धुम्बाराहीको बैठक बालुवाटार बस्न अध्यक्ष पुष्पकमल दाहालसँग प्रस्ताव गरेको तर, दाहालले अस्वीकार गरेपछि ‘सुरक्षा थ्रेट’ देखाएर बैठक सारिएको बताए ।

उनका अनुसार अध्यक्ष दाहालले मंगलबार बिहान महासचिवमार्फत बैठक पार्टी कार्यालयमै बस्नुपर्ने अडान राखेका थिए । तर, केही समयपछि महासचिव पौडेलले गृह मन्त्रालयको सुझावअनुसार बैठक सार्नुपरेको सूचना अध्यक्ष दाहालसहित सचिवालयका अन्य सदस्यहरु दिएका थिए ।

यसअघि शनिबार बसेको सचिवालयले मंगलबारको बैठक धुम्बाराहीमा गर्ने निर्णय गरेको थियो । अन्तिम समयमा आएर धुम्बाराहीमा बस्ने भनिएको बैठक बालुवाटार सार्दा सचिवालय अन्य सदस्यले असन्तुष्टि जनाएका छन् ।

बैठकका कार्यसूचीमा कार्तिक २८ मा कार्यकारी अध्यक्ष दाहालले पेस गरेको प्रस्ताव र मंसिर १३ मा प्रधानमन्त्री एवं अध्यक्ष केपी शर्मा ओलीले पेस गरेको जवाफी प्रस्तावमाथि छलफल हुने भएको छ ।

प्रधानमन्त्रीले पेस गरेको प्रस्तावमा उठाएका विषयबारे आजको बैठकमा दाहालले लिखित रुपमा नै जवाफ दिने सम्भावना रहेको सचिवालयका ती नेताले जानकारी दिए । तर, स्थायी कमिटीमा जाँदा आजको बैठकमा उठेका विषयहरुलाई समेत समेटेर दाहालले पूरक प्रतिवेदन नै पेस गर्ने तयारी गरेका छन् ।

प्रधानमन्त्री ओलीले दाहालको प्रस्ताव सचिवालयमा छलफल गर्न योग्य नभएको भन्दै त्यसको खारेजीको माग गरेका छन् । तर, अध्यक्ष दाहालसहित सचिवालयका बहुमत सदस्यले दुवै प्रस्तावमाथि सचिवालयमा सामान्य छलफल गरेर मंसिर १८ मा बस्ने स्थायी कमिटीमा लैजाने तयारी गरेका छन् । स्थायी कमिटीमा बहुमतले निर्णय गरेर त्यसको अनुमोदनका लागि केन्द्रीय कमिटी बैठकमा लैजाने तयारी छ ।

ओली समूहले दाहालको प्रस्ताव फिर्ता लिएर साझा प्रस्ताव बनाएर मात्रै स्थायी कमिटीमा जानुपर्ने अडानमा छ । यस्तोमा आजको सचिवालय बैठकलाई अर्थपूर्ण रुपमा हेरिएको छ ।

प्रकाशित : मंसिर १६, २०७७ १३:२६
प्रतिक्रिया
पठाउनुहोस्

वडा कार्यालय छिमेकी जिल्लामा !

वीरेन्द्र केसी

अर्घाखाँची — शीतगंगा नगरपालिका–११ को वडा कार्यालय एउटा खयरबट्टी र अर्को कपिलवस्तुको इमिलियामा छ । खयरबट्टीमा वडा कार्यालय राखिए पनि त्यहाँबाट काम हुँदैन ।

वडाध्यक्ष, सचिव इमिलियामै बस्छन् । खयरबट्टीमा कार्यालय सहयोगी मात्रै छन् । यस वडाका अधिकांश बस्तीका सेवाग्राहीलाई खयरबट्टी अपायक पर्छ । पहाड, जंगल क्षेत्र, छरिएर रहेको बस्ती पैदल पार गरेर खयरबट्टी जानुभन्दा कपिलवस्तु झर्न छिटो र सजिलो हुन्छ ।

मणिराम सारुले चार घण्टा पैदल हिँडालेर ८५ वर्षीय आमा जीवकला सारुलाई वृद्धभत्ता बुझ्न इमिलिया ल्याए । गाउँमा बाटो त छ । तर, यात्रु नपाइने भन्दै सार्वजनिक सवारी गाउँमा जाँदैनन् । ‘खयरबट्टी जान घरबाट ६ घण्टा पैदल हिँड्नुपर्छ,’ उनले भने, ‘बरु इमिलिया नजिक छ । सबैको मागअनुसार नै यहाँ कार्यालय राखिएको हो ।’

पूर्वपश्चिम राजमार्गमै जोडिएको इमिलियाबाट खयरबट्टी रिक्सा चल्छन् । एक यात्रुको भाडा दुई सय रुपैयाँ तिर्नुपर्छ । जिप, बस जाने बाटो भए पनि दिनहुँ गाडी भरिने गरी यात्रु नपाइने भएकाले जान मान्दैनन् । मौवाबारीका हिमबहादुर आलेले नागरिकता बनाउन सिफारिस लिन वडा कार्यालय पुगेर फर्कंदा एक दिन समय बित्ने बताए । उनका अनुसार त्यसपछिको एक दिनमा सदरमुकाम पुगेर नागरिकता बनाएर घर आइपुग्न भ्याइँदैन । ‘नागरिकता बनाएर घर आइपुग्न तीन दिन समय लाग्छ, कागजपत्र नमिले, हस्ताक्षर छुटे अझै दुःख हुन्छ,’ उनले भने ।

जिल्लाकै २७ प्रतिशत भूगोल क्षेत्र ओगटेको तत्कालीन सिद्धारा गाविसलाई नयाँ संरचनाअनुसार शीतगंगा नगरपालिकाका तीनवटा वडामा विभाजन गरिएको छ । दुर्गम त्यसमाथि फराकिलो क्षेत्र भएकाले पनि स्थानीयले सहजै सरकारी सेवा पाउन सकेका छैनन् । वडा कार्यालयमा नागरिकतालगायत सिफारिस बनाएर सदरमुकाम र नगरपालिका कार्यालय ठाडा जान सजिलो हुने भएकाले छिमेकी जिल्लामा कार्यालय राखिएको वडाध्यक्ष कोपिलाचन्द्र आलेले बताए ।

वडाको मौवाबारी, दोबाटो, फोर्सललगायतका गाउँबाट सेवाग्राही इमिलिया आउँछन् । यी गाउँबाट खयरबट्टीको कार्यालय नै छ/सात घण्टाको पैदल दूरीमा पर्छ । त्यहाँ गएर सिफारिस बनाउने र फर्कंदा दिन बित्छ । इमिलियाबाट भने सिफारिस लिएर सदरमुकाम पुगेर एकै दिनमा नागरिकता बनाउन सकिन्छ ।

प्रकाशित : मंसिर १६, २०७७ १२:५५
पूरा पढ्नुहोस्
प्रतिक्रिया
पठाउनुहोस्
×