चिनियाँ रक्षामन्त्री भोलि आउने- समाचार - कान्तिपुर समाचार
कान्तिपुर वेबसाईट
AdvertisementAdvertisement

चिनियाँ रक्षामन्त्री भोलि आउने

कान्तिपुर संवाददाता

काठमाडौँ — चिनियाँ स्टेट काउन्सिलर एवं रक्षामन्त्री वेई फेङ्हे एकदिने भ्रमणको व्यस्त तालिका लिएर आइतबार काठमाडौं आउने भएका छन् ।

परराष्ट्र मन्त्रालयले शनिबार बिहान जारी गरेको विज्ञप्तिअनुसार रक्षामन्त्री फेङ्हेले राष्ट्रपति विद्यादेवी भण्डारी, प्रधानमन्त्री एवं रक्षामन्त्री केपी शर्मा ओलीसहितका नेताहरूसँग भेटवार्ता गर्नेछन् । नेपाल–चीन सम्बन्धको ६५औं वर्षगाँठका अवसरमा रक्षामन्त्री फेङ्हेको भ्रमण हुन लागेको र यसले आपसी सुरक्षा समन्वयका विविध विषयमा कुराकानी हुने विज्ञप्तिमा उल्लेख छ ।

प्रधानसेनापति पूर्णचन्द्र थापाको निमन्त्रणामा आउन लागेका रक्षामन्त्री फेङ्हेले चिनियाँ दूतावासद्वारा आयोजना हुने द्विदेशीय सहयोग–समन्वयको बृहत् कार्यक्रममा सहभागिता जनाउने भएका छन् । फेङ्हे आइतबार अपराह्न काठमाडौंबाट ढाकाका लागि प्रस्थान गर्नेछन् ।

दक्षिण छिमेक भारतका विदेश सचिव हर्षवद्र्धन श्रृंगला काठमाडौंबाट फर्केको दुई दिनपछि उत्तरी छिमेक चीनका राष्ट्रपति सी जिनपिङका विश्वास पात्रसमेत रहेका रक्षा मन्त्री वेई नेपाल आउन लागेका हुन् ।

सैनिक प्रवक्ता तथा सहायक रथी सन्तोषबल्लभ पौडेल चिनियाँ रक्षा मन्त्री वेईको हुन लागेको आगामी भ्रमणले नेपाली सेनाले दुई देशबीचको पारस्परिक सम्बन्धलाई थप बढावा दिने बताए । उनले उक्त भ्रमणले कोभिड–१९ को कारणले स्थगित भएका सैन्य सहयोग, सहायता र सहकार्यहरुलाई निरन्तरता दिने कामलाई अघि बढाउन मद्दत गर्ने पनि जनाए । ‘कोरोना भाइरस संक्रमणपछिको अवस्थामा विगतमा भएका सम्झौता, सहकार्य र सहायताका विषयहरुलाई कसरी उपयोग गर्ने भन्ने हुन्छ,’ उनले भने । उनले वेईको यो भ्रमणलाई चिनियाँ नेतृत्व कसरी सम्बन्ध विस्तार गर्ने भन्ने विषयको अवसरका रुपमा नेपाली सेनाले लिएको पनि प्रस्ट पारे ।

सन् २०१९ को अक्टोबरमा चीनका राष्ट्रपति सीले नेपालको भ्रमण गरेपछि चीनका उच्च तहका पदाधिकारीहरुले नेपालको भ्रमण गरेका छैनन् । कोभिड–१९ को कारणले रोकिएको भ्रमणलाई अर्को छिमेक भारते पनि लगातार तीन जना उच्च तहका पदाधिकारीहरु पठाउँदै वार्ता र संवाद गरेपछि चीनले पनि आफ्नो उच्च तहकै पदाधिकारीलाई नेपाल भ्रमणमा पठाउन लागेको हो ।

भारतबाट केही समययता मात्र बाह्य खुफिया एजेन्डी ‘रअ’ का प्रमुख समान्य गोयल, सेनाध्यक्ष मनोज मुकुन्द रनवणे र विदेश सचिव श्रृंगलाले नेपालको भ्रमण गरिसकेका छन् ।

स्टेट काउन्सिलरसमेत रहेका रक्षा मन्त्री वेईको सत्तारुढ दल नेकपाको विवाद चर्चिरहेको बेलामा भएकाले पनि अर्थपूर्ण रुपमा हेरिएको छ । पूर्व एमाले र पूर्व एमाओवादी केन्द्र मिलेर बनेको नयाँ शक्तिमा विवाद आएपछि काठमाडौंमा रहेकी चिनियाँ राजदुत होउ यान्छीले पटक–पटक नेकपाका शीर्ष नेताहरुलाई भेटेर विवाद मिलाउनको लागि ‘सहजीकरण’ गरिरहेकी छन् ।

भारत र नेपालको आन्तरिक राजनीतिभन्दा पनि पछिल्लो समय अमेरिकी सेनाको इन्डो–प्यासिफिक रणनीतिअनुसार नेपाली सेनासँग सहकार्य गरिरहेको कारण त्यसलाई कम गर्नका लागि चिनियाँ रक्षा मन्त्रीको भ्रमण हुन सक्ने एक चीननिकट विज्ञले जानकारी दिए ।

दुवै मुलुकबाट भएको र हुने उच्चस्तरीय भ्रमणबाट नेपालले दुवै मुलुकसँग सहकार्य गरेर अगाडि बढ्ने परराष्ट्र मन्त्री प्रदीपकुमार ज्ञवालीले बिहीबार भएको संसदीय सुनुवाइ समितिमा बताइसकेका छन् ।

प्रकाशित : मंसिर १३, २०७७ ०७:५५
प्रतिक्रिया
पठाउनुहोस्

सर्वसाधारणको लगानीमा २५ मेगावाट बिजुली

कान्तिपुर संवाददाता

बुटवल — रूपन्देही र कास्कीका सर्वसाधारणको लगानीमा २५ मेगावाट विद्युत् उत्पादनको काम थालिएको छ । बुटवलस्थित भिजन लुम्बिनी कम्पनी लिमिटेडले सेती नदी जलविद्युत् आयोजना निर्माण थालेको हो ।

रूपन्देहीका करिब ५ सय र कास्कीका ६ सय सर्वसाधारणको लगानी छ । सहकारी मोडलमा जनस्तरबाट रकम संकलन गरी १ अर्ब ५० करोड सेयर पुँजीबाट विद्युत् आयोजना निर्माण थालिएको भिजन लुम्बिनीका अध्यक्ष जगतबहादुर पोखरेलले बताए । कास्कीको माछापुच्छ्रे गाउँपालिका–२ मा उत्पादित विद्युत् अबको १९ महिनाभित्र राष्ट्रिय प्रसारण लाइनमा जोड्ने योजना छ । ‘सर्वसाधारणको ससानो लगानी संकलन गरेर पनि जलविद्युत् निर्माण गर्न सकिन्छ भन्ने उदाहरण दिन काम थालेका हौं,’ उनले भने, ‘धेरैको अपनत्व भएकाले आयोजना सोचेभन्दा राम्रो भएको छ ।’

५ अर्ब लागत अनुमान गरिएको जलविद्युत् गृह निर्माणमा सर्वसाधारणको डेढ अर्ब लगानी हुनेछ । भिजनमार्फत न्यूनतम १ लाख रुपैयाँदेखि लगानी गर्ने सर्वसाधारण सेयर सदस्य छन् । सर्वसाधारणले सेयर राख्न पाउने भएपछि पछिल्लो पटक काठमाडौं, चितवनलगायत क्षेत्रका केही व्यक्तिले समेत रकम लगाएका छन् । अन्य रकम बैंक तथा वित्तीय संस्थाले ऋण लगानी गर्नेछन् । जसमा एनएमबी बैंकले २ अर्ब २० करोड, कर्मचारी सञ्चय कोषले ८० करोड र कृषि विकास बैंकले ५० करोड रुपैयाँ लगानी गर्ने सम्झौता भएको अध्यक्ष पोखरेलले बताए । प्रवर्द्धकको लगानीमध्येको १० प्रतिशत अर्थात् १५ करोड रुपैयाँ विद्युत् उत्पादन गृह क्षेत्रका स्थानीयले लगानी गर्दै छन् । जुन रकम सहकारीमार्फत संकलन भइरहेको छ ।

विद्युत्गृह निर्माणको काम अहिलेसम्म करिब २० प्रतिशत सकिएको छ । कोरोनाको बढ्दो संक्रमणका बीच पनि निर्माण कार्य तीव्र गतिमा भइरहेको आयोजना निर्देशक लेखनाथ पाण्डेले जानकारी दिए । अहिले सिभिलतर्फको सेटलिसेटलिङ बेसिन (पानी थिग्राउने पोखरी), बाँधलगायत संरचना निर्माणको काम भइरहेको छ । ‘स्थानीयसँग पर्याप्त छलफल गरेर उनीहरूको पनि लगानी हुने गरी आयोजनाको काम अगाडि बढाएकाले निर्माणमा कतै पनि अवरोध आएको छैन,’ उनले भने ।

आयोजनाको लागत ५ अर्ब अनुमान गरिएको छ । सहुलियत र न्यूनतम मूल्यमा काम गरिएकाले काम सवा ४ अर्बमै सक्ने योजना रहेको कम्पनीका सञ्चालक ज्ञानेन्द्र कसजूले बताए । प्रतिसेकेन्ड १८ घनमिटर पानी बहने सेती नदीबाट बाह्रै महिना विद्युत् उत्पादन हुनेछ ।

अध्ययनले आयोजनाबाट वार्षिक १ सय ४८ गिगावाट आवर बिजुली उत्पादन हुने देखाएको छ । जसले हिउँदको समयमा पनि ३२ प्रतिशत बिजुली उत्पादन गर्नेछ । ‘सेती नदी सस्तो, सहज र भरपर्दो आयोजनाका रूपमा लिएका छौं,’ सञ्चालक कसजूले भने ।

प्रकाशित : मंसिर १३, २०७७ ०७:५३
पूरा पढ्नुहोस्
प्रतिक्रिया
पठाउनुहोस्
×