सांसदले ठेक्का लिएको सडक अलपत्र
म्याग्दी — प्रतिनिधिसभाका सांसद नै सञ्चालक रहेको निर्माण कम्पनीले समयमै काम नसक्दा सडक कालोपत्र योजना अलपत्र परेको छ । सांसद जिपछिरिङ लामा सञ्चालक रहेको लामा कन्स्ट्रक्सन र अच्युत खरेल सञ्चालक रहेको समानान्तर कन्स्ट्रक्सनको ढिलासुस्तीले बेनी–दरवाङ सडक स्तरोन्नतिसहित कालोपत्र हुन नसकेको हो ।
ती कम्पनीले साढे १२ किलोमिटर सडक कालोपत्र गर्ने ठेक्का संयुक्त रूपमा पाएका थिए । ०७६ माघ ४ गतेभित्र सम्पन्न गर्नुपर्ने योजना पूरा नभएपछि ०७७ असोज मसान्तसम्म सक्ने गरी म्याद थपिएको थियो । योजना नियामक पूर्वाधार विकास कार्यालय बेनीका अनुसार हालसम्म योजनाको भौतिक प्रगति ४० प्रतिशत हाराहारी मात्र छ । कम्पनीले कार्यालयबाट ५ करोड ८० लाख पेस्कीबाहेक २२ करोड ३५ लाख रुपैयाँ भुक्तानी लगिसकेको छ ।
म्याग्दीका पश्चिम मंगला, मालिका र धौलागिरि तथा बागलुङको ताराखोला, बुर्तिवाङ जोड्ने सडकको सुरु खण्ड बेनी–लाम्पाटा १२.५ किमिमा ११ मिटर चौडा बनाई नालीबाहेक ७ मिटर चौडा कालोपत्रे गर्ने गरी ०७४ असोज ४ गते सम्झौता भएको थियो । साविक सडक डिभिजन कार्यालय बागलुङले ठेक्का लगाएको योजना ०७५ पुसमा गण्डकी प्रदेश सरकारलाई हस्तान्तरण भएको हो । प्रदेश सरकारले चालु आवमा यो सडक कालोपत्र गर्न ४ करोड बजेट विनियोजन गरेको छ ।
‘ठेकेदारलाई काममा फर्काउन चारवटा पत्र लेख्यौं । टेलिफोनमा थुप्रै आग्रह गर्यौं तर बेवास्ता गर्दै आएका छन् । पत्रको रेस्पोन्स नै गरेको छैन,’ जिल्ला प्रशासन कार्यालयमा हालै सम्पन्न कार्यालय प्रमुखहरूको बैठकमा पूर्वाधार विकास कार्यालय प्रमुख नवराज पौडेलले भने, ‘ठेकेदार परिचालन नहुँदा हामीमाथि पनि प्रश्न उठेको छ । अब धरौटी जफत गरी कालोसूचीमा राखेर ठेक्का तोड्नुपर्ने अवस्था आएको छ ।’
पर्याप्त बजेट विनियोजन नभएकाले समयमै काम गर्न नसकेको निर्माण कम्पनीले बताउँदै आएको छ । ‘दुई वर्ष संघ र प्रदेश सरकारको खिचातानीले बजेटै परेन,’ समानान्तरका सञ्चालक खरेलले भने, ‘दुई वर्षअघि गरेको कामको तीन करोड भुक्तानी दुई वर्षपछि पायौं । कसरी काम समयमा हुन्छ ?’ तर कार्यस्थलमा एक जना मजदुर परिचालन नभएकाले ठेकेदार कम्पनीले बहानाबाजी गरेको सरोकारवालाले बताएका छन् । सडक चाक्लो पार्ने र ड्रेन बनाउनेसमेतका कामै भएको छैन । ठेकेदारले सडक चौडा पार्न भित्तामा लगाएको ग्याभिन जाली झिकेर फालेको तर नयाँ संरक्षणका काम नगर्दा गत बर्खामा भित्ता पुरै बगेर सडक तहसनहस भएको छ ।
जिल्ला प्रशासनका अनुसार बेनी–दरवाङको दोस्रो खण्ड, मंगला गापाको बाबियाचौर–अर्मन–किम्चौर हुँदै बागलुङ ताराखोला जोड्ने सडक, गलेश्वर–भगवती–बेग सडक र पोखरे–चित्रे सडकको कालोपत्रलगायत कार्य अधुरा नै छन् ।
प्रकाशित : मंसिर ४, २०७७ १२:५८
