बीपी प्रतिष्ठानमा कोरोनाले पाँचमहिने बालिकासहित दुईको मृत्यु
सुनसरी — कोरोना संक्रमणबाट बीपी कोइराला स्वास्थ्य विज्ञान प्रतिष्ठानको कोभिड अस्पतालमा उपचाररत पाँचमहिने बालिकासहित एक महिलाको मृत्यु भएको छ । उनीहरूको शुक्रबार साँझ मृत्यु भएको अस्पतालले जनाएको छ ।
प्रतिष्ठानका सहप्रवक्ता डा. आशिष श्रेष्ठका अनुसार मृत्यु हुनेमा धरान उपमहानगरपालिका–११ सिधिंवा चोककी ५२ वर्षीया महिला र मोरङको सुन्दर हरैंचा नगरपालिकाकी पाँचमहिने बालिका छन् । उनका अनुसार पहिल्यैदेखि उच्च रक्तचाप र मधुमेहको समस्या रहेकी धरानकी महिलालाई कात्तिक ३ गते पीसीआर जाँच गर्दा कोरोना संक्रमण पुष्टि भएको थियो । उनलाई कात्तिक ५ गते कोभिड अस्पताल भर्ना गरिएको थियो ।
यसै गरी सुन्दरहरैंचाकी बालिकाको मस्तिष्कसम्बन्धी रोगको उपचार भइरहेको थियो । कात्तिक ५ गते विराटनगरको नोबेल अस्पतालमा पीसीआर जाँच गर्दा कोरोना संक्रमण पुष्टि भएपछि थप उपचारका बीपी प्रतिष्ठान पठाइएको थियो ।
यससँगै प्रतिष्ठानको कोभिड अस्पतालमा मृत्यु हुने संक्रमितको संख्या ७२ पुगेको छ ।
प्रकाशित : कार्तिक ८, २०७७ ११:०४