बलात्कार घटना खुल्नै सकस- समाचार - कान्तिपुर समाचार
कान्तिपुर वेबसाईट
AdvertisementAdvertisement

बलात्कार घटना खुल्नै सकस

यस्तो छ कारण– आफूमाथि अपराध भएको भनेर छुट्याउन नसक्नु, घटना बाहिर आए समाजमा अपहेलित हुने डरले प्रहरीकहाँ पुग्नै ढिलाइ हुनु ।
तृप्ति शाही

बैतडी — बैतडीको सिगास गाउँपालिकाकी १७ वर्षीया किशोरीले पालिकाकै एक युवकसँग भागी बिहे गरिन् । विवाहको ६ महिनामै बच्चा जन्मिएपछि घरपरिवारसँगै गाउँघरमा होहल्ला भयो । गाउँमा बस्नै नसकिने अवस्था भएपछि प्रहरीले किशोरी आमा र नवजात छोरीको उद्धार गरेर सदरमुकाम पुर्‍यायो ।

प्रहरीले उद्धार गर्दा उनकी छोरी महिना दिनकी भइसकेकी थिइन् । उद्धारपछि मात्र किशोरी सामूहिक बलात्कारमा परेको खुल्यो । उनलाई पढाउने शिक्षक, गाउँपालिकामा कार्यरत कर्मचारीलगायत अन्य तीन जना स्थानीयसमेत ५ जनाले उनीमाथि पटक–पटक बलात्कार गरेको खुलेको छ । २०७६ को कात्तिकको यो घटना २०७७ भदौमा मात्र बाहिर आएको हो ।

यस्तै बैतडीकै पञ्चेश्वर गाउँपालिकाकी १० वर्षीया बालिका ७ वर्षको उमेरदेखि बुवाबाट यौनजन्य हिंसाको सिकार भए पनि लामो समयपछि मात्र घटना बाहिर आयो । छिमेकीले बालिकाको अवस्थाबारे शंका गरेपछि गाउँपालिकाकी उपाध्यक्षलाई खबर गरे । उनले प्रहरीलाई घटनाबारे जानकारी गराएपछि प्रहरी अनुसन्धानबाट बालिकामाथि बलात्कार हुने गरेको खुल्यो । पछिल्लो पटक असारमा बालिकामाथि बलात्कार भए पनि साउनमा मात्रै प्रहरीमा पुगेपछि घटना सार्वजनिक भयो ।

यसरी ढिलो गरी प्रहरीकहाँ पुग्ने गरेका यी केही चर्चित घटना हुन् । जिल्लाका विभिन्न भेकमा हुने गरेका यौनहिंसा, बलात्कार र घरेलु हिंसाका घटना सकभर त गाउँमै मिलापत्र गराएर सामसुम पारिन्छ, केही गरी प्रहरीसम्म पुगे पनि निकै ढिलो गरी घटनाको उजुरी दर्ता भई कारबाही प्रक्रिया सुरु हुने गरेको छ । मेलौली नगरपालिकाकी एक महिला पनि जेठमा बलात्कृत भइन् । असोज १० गते मात्र उनी प्रहरीमा न्याय खोज्दै पुगेकी छन् । गर्भमा बच्चा बसेपछि मात्र उनी प्रहरीकहाँ आएको जिल्ला प्रहरी कार्यालय बैतडीका प्रहरी प्रमुख डीएसपी नारायणप्रसाद अधिकारीले बताए ।

‘जिल्लामा महिला हिंसाका घटनाहरू पहिलेदेखि बढी नै भइरहेका छन्,’ उनले भने, ‘बलात्कारका घटना पनि ढिलो मात्र जानकारी हुने गरेका छन् ।’ डीएसपी अधिकारीका अनुसार आफूमाथि अपराध भएको भनेर छुट्याउन नसक्नु, घटना बाहिर आए समाजमा अपहेलित हुने डरले भित्रभित्रै मिलाउने चाहना राख्नुले महिला हिंसा र बलात्कारजस्ता जघन्य अपराधका घटना ढिलो गरी प्रहरीकहाँ पुग्ने गरेका छन् । जबर्जस्ती करणीका घटनामा गर्भवती भएपछि समस्या हुने भएकाले मात्र कानुनी उपचारको बाटो खोज्ने गरेको पाइएको उनले बताए ।

दुर्गम भेकमा चेतनाको कमीका कारण बलात्कार जस्ता जघन्य अपराधहरू पनि ढिलो गरी न्यायिक निकायमा पुग्ने गरेको पञ्चेश्वर गाउँपालिकाकी उपाध्यक्ष बिना भट्ट बताउँछिन् । ‘कानुन र कारबाहीबारे पनि नागरिकहरू सचेत छैनन् । त्यसैले पनि अन्तिम अवस्थामा निकै ढिलो गरी खुल्ने गरेका छन् । महिलाहरूलाई घरपरिवार र सामाजिकलगायत कारणले पनि आफ्ना पीडाबारे खुल्न गाह्रो हुने गरेको छ,’ उनले भनिन् ।

चालु आर्थिक वर्षका तीन महिनामा जिल्ला प्रहरीमा जबर्जस्ती करणीका ८ वटा मुद्दा दर्ता भएका छन् । तीमध्ये ३ वटा मुद्दा धेरै ढिलो गरी प्रहरीमा आएका छन् । अन्य मुद्दाहरू पनि घटना भएको केही दिनपछि नै आएका छन् । उक्त अवधिमा जबर्जस्ती करणी उद्योगका दुईवटा मुद्दा दर्ता भएका छन् । गत आर्थिक वर्षमा जबर्जस्ती करणीका ९ र करणी उद्योगका दुईवटा गरी ११ मुद्दा दर्ता भएका थिए । यीमध्ये चालु आर्थिक वर्ष र गत वर्ष तीन/तीन घटनामा आफन्तकै संलग्नता पाइएको डीएसपी अधिकारीले बताए ।

प्रकाशित : कार्तिक २, २०७७ ०९:११
प्रतिक्रिया
पठाउनुहोस्

नाकामा धमाधम ‘बीओपी’

कान्तिपुर संवाददाता

काँकडभिट्टा — भारतसँग सीमा जोडिएका झापाका नाकाहरूमा धमाधम सशस्त्र प्रहरी बलको बोर्डर आउट पोस्ट (बीओपी) राख्न थालिएको छ । कोरोना संक्रमणपछि सीमा सुरक्षामा राखिएको सशस्त्रका अस्थायी पोस्टहरूलाई बीओपीमा परिणत गरिएको हो ।

गत असोज १९ मा दक्षिण झापाको कचनकवल ५ स्थित पाठामारीमा बीओपी स्थापना गरिएको थियो । बिहीबार मेचीनगर १५ ज्यामिरगढीमा बीओपीको अस्थायी पोस्ट थपिएको छ । सशस्त्र प्रहरी बल बराहवाहिनी गण इटहरीका डीआईजी वंशीराज दाहालले प्रदेश १ मा बीओपीको संख्या ३५ पुगेको जनाए । उनले भारतसँगको खुला नाकाको फाइदा उठाउँदै हुन सक्ने अवाञ्छित गतिविधि नियन्त्रण गर्न बीओपी खडा गरिएको जनाए । ‘बीओपीको संख्या अझै थपिनेछ,’ उनले भने । डीआईजी दाहालका अनुसार झापामा यो वर्ष ९ वटा बीओपी राखिनेछ । जिल्लामा १ सय ४४ दशमलव २ किलोमिटर खुला सीमा क्षेत्र छ । दक्षिण भेगतिर भारतको विहार र पूर्वी भेगमा पश्चिम बंगाल राज्यसँग साँधसीमा जोडिएको छ । खुला सीमाका कारण नेपाली सुरक्षाकर्मीलाई अपराध नियन्त्रण तथा तस्करी नियन्त्रणमा चुनौती हुँदै आएको छ ।

सशस्त्र प्रहरीको नम्बर २ हेडक्वार्टर झापाका सशस्त्र प्रहरी उपरीक्षक रमेशकुमार पाण्डेले सीमा सुरक्षाका लागि थप निगरानी बढाउन बीओपी थप्न सुरु गरिएको जनाए । यो वर्ष पूर्वोत्तर झापाको तिरिङ, नकलबन्दा तथा दक्षिणतिरको सतीघट्टा, ज्यामिरगढी, भद्रपुरको मेची पुल आसपास, महेशपुर, पाठामारी, पन्थापाडा र गौरादहको आँपगाछीमा बीओपी थपिने एसपी पाण्डेले जानकारी दिए । काँकडभिट्टास्थित साविकको सशस्त्र प्रहरी राजस्व गुल्मलाई पनि यसै वर्षदेखि बीओपीमा परिणत गरिएको छ । यसअघि बाहुनडाँगी, पृथ्वीनगर, केचना, घेराबारी, भागडुब्बा, कुन्जीबारी, गौरीगन्ज र टाघनडुब्बामा बीओपी स्थापना भइसकेका छन् । एसपी पाण्डेले भने, ‘तीन वर्षभित्र झापाका ३७ नाकामा बीओपी रहनेछ ।’ बीओपी राख्न जमिन अभाव र भौतिक पूर्वाधारको समस्या छ । पाठामारीमा स्थानीय सरकारले उपलब्ध गराएको जमिनमा र मेचीनगर–१५ मा भने व्यक्तिको निजी जमिनमा बीओपी राखिएको छ । मेचीनगर–१५ को एक सरकारी विद्यालयमा बस्दै आएका सशस्त्र प्रहरीलाई वैभव चिया बगानले तत्कालका लागि व्यवस्थापन गर्ने गरी जमिन र भौतिक संरचना उपलब्ध गराएको छ ।

प्रकाशित : कार्तिक २, २०७७ ०९:१०
पूरा पढ्नुहोस्
प्रतिक्रिया
पठाउनुहोस्
×