पूर्व आईजीपी खरेलद्वारा ११ लाखको अक्षयकोष स्थापना - समाचार - कान्तिपुर समाचार
कान्तिपुर वेबसाईट
AdvertisementAdvertisement

पूर्व आईजीपी खरेलद्वारा ११ लाखको अक्षयकोष स्थापना 

कान्तिपुर संवाददाता

काठमाडौँ — पूर्व प्रहरी महानिरीक्षक अच्युतकृष्ण खरेलले नेपाल प्रहरीका सन्ततिलाई शिक्षादिक्षामा सहयोग पुर्‍याउन ११ लाख रुपैयाँको छात्रवृत्ति अक्षय कोष स्थापना गरेका छन् ।

६५ औं प्रहरी दिवसको अवसरमा प्रहरी प्रधान कार्यालयमा आयोजित समारोहमा उनले उक्त घोषणा गरेका हुन् ।

अमर प्रहरीका सन्तानको शिक्षाका निम्ति एक छात्रा र एक छात्रलाई जनही ३० हजारका दरले वार्षिक रुपमा छात्रवृत्ति दिनेगरी प्रहरी प्रधान कार्यालयसँग खरेलले सम्झौता गरेका छन् ।

यो छात्रवृत्ति कर्तव्य पालनाका क्रमममा विरगति प्राप्त गर्ने जवान, हवल्दार, सहायक निरीक्षक तथा नायब निरीक्षकका सन्तानलाई प्रदान गरिने छ । 'अच्युत-मिना अमर प्रहरी पुरस्कार’ नाम दिइएको उक्त कोषका लागि खरेलले आफ्नो मृत्‍युपर्यन्त पनि यो छात्रवृत्ति निरन्तर रहने कान्तिपुरलाई बताए ।

योसँगै खरेलले नेपाल प्रहरीका चारै क्षत्रीय स्कुलमा विभिन्न कालखण्ड र विभिन्न पदमा रहँदा प्रहरी जवान र हवल्दारका गरिब तथा जेहन्दार सन्तानलाई आफ्नो मासिक पेन्सन ८ हजार ५ सय ११ रुपैयाँ पनि प्रत्येक महिना छात्रवृत्ती स्वरुप प्रदान गर्ने घोषणा गरसकेका छन् ।

३१ वर्ष प्रहरी सेवामा बिताएका खरेल माओवादी जनयुद्ध उत्कर्षमा रहेका बेला प्रहरी महानिरीक्षक बनेका थिए ।

प्रकाशित : कार्तिक १, २०७७ १७:४५
प्रतिक्रिया
पठाउनुहोस्

राष्ट्रपति, प्रधानमन्त्री र पूर्वराजाले सर्वसाधारणलाई दसैंको टीका नलगाइदिने

कान्तिपुर संवाददाता

काठमाडौँ — यस वर्षको दसैंमा राष्ट्रपति, प्रधानमन्त्रीलगायतले सर्वसाधारणलाई टीका नलगाइदिने भएको छ । कोरोना भाइरस (कोभिड १९) संक्रमण फैलने उच्च जोखिमका कारण सर्वसाधारणलाई राष्ट्रपति, प्रधानमन्त्रीलगायतले टीका नलगाइदिने भएको हो । 

विगतका वर्षहरुमा राष्ट्रपति, प्रधानमन्त्री र पूर्वराजाले समेत दुई/तीन दिनसम्म सर्वसाधारणलाई दसैंको टीका लगाइदिने गरिन्थ्यो । यस वर्षको दसैं शनिबारबाट सुरुवात भइसकेको छ । टीका लगाउने दिन कात्तिक १० गते परेको छ ।

राष्ट्रपति विद्यादेवी भण्डारीका स्वकीय सचिव भेषराज अधिकारीले विगतको जस्तो दसैंको टीका लगाउने कार्यक्रम नराखिएको बताए । उनले आधिकारीक रूपमा यसबारे केही दिनमै जानकारी दिइने बताए । 'यसपालीको दसैंमा पहिलाको जस्तो राष्ट्रपतिबाट टीका लगाइदिने कार्यक्रम कम छ । टीका लगाइदिनका लागि सार्वजनिक आह्वान हुने सम्भावना कम छ । यसबारे थप कुरा २-४ दिनभित्रै विज्ञप्ति जारी गरेर जानकारी दिइनेछ,' उनले भने ।

विगतका वर्षहरूमा राष्ट्रपतिले उपराष्ट्रपति, प्रधानमन्त्री, प्रधानन्यायाधीश, सभामुख, सुरक्षानिकायका प्रमुखहरू, संवैधानिक आयोगका प्रमुखहरू लगायत उच्च पदस्थ व्यक्तिहरूलाई दसैंको टीका लगाइदिने गरिन्थ्यो ।

त्यस्तै, प्रधानमन्त्री केपी शर्मा ओलीले पनि यस पटकको दसैंमा सर्वसाधारणलाई टीका लगाउने कार्यक्रम नरहेको बताइएको छ । प्रधानमन्त्रीको स्वकीय सचिवालयका अधिकारीहरूका अनुसार कोरोनाका कारण यसपटक त्यस्ता कार्यक्रम राखिएको छैन ।

विगतका वर्षहरूमा प्रधानमन्त्री ओलीले तीन दिनसम्म पनि सर्वसाधारणलाई दसैंको टीका लगाइदिने गरेका थिए । यसपटक कोरोनाका उनी उच्च स्वास्थ्य सतर्कता अपनाइरहेका छन । प्रधानमन्त्रीका सल्लाहकारहरू र स्वकीय सचिवालयमा रहेका व्यक्ति तथा सुरक्षाकर्मीहरूमा कोरोना संक्रमण भएसँगै बालुवाटारमा थप स्वास्थ्य सतर्कता अपनाइएको छ ।

पूर्वराजा ज्ञानेन्द्र शाहले पनि यसपटक सर्वसाधारणलाई दसैंको टीका लगाउने कार्यक्रम रद्द भएको जानकारी दिएका छन् । शाहका तर्फबाट जारी विज्ञप्तिमा दसैंमा सर्वसाधारणलाई टीका लगाइदिने कार्यक्रम नरहेको उल्लेख गरिएको छ । यस वर्ष महाअष्टमीका दिन विभिन्न शक्तिपीठहरूमा दर्शन गर्ने र विजया दशमीका दिन टीका लगाइदिने कार्यक्रम नहुने विज्ञप्तिमा लेखिएको छ ।

विगतका वर्षहरूमा पूर्वराजा शाहले दसैंका अवसरमा मुलुकका विभिन्न भागमा रहेका शक्तिपीठहरूमा गएर पूजाआजा गर्ने र दसैंमा सर्वसाधारणलाई टीका लगाइदिने गरेका थिए ।

प्रकाशित : कार्तिक १, २०७७ १७:३९
पूरा पढ्नुहोस्
प्रतिक्रिया
पठाउनुहोस्
×